Napólí & Ischia

Frá líflegu höfninni í Napólí siglum við út í stærstu eyju Napólíflóa, Ischia, en hún á sér langa sögu allt aftur til bronsaldar. Hér settust Grikkir að á 8. öld f.Kr. og síðar nýttu Rómverjar jarðvarmann til að skapa stórfenglegar baðlindir og glæsihýsi sem enn bera vitni um þá tíma. Eyjan hefur lifað af jarðskjálfta, eldgos og ásókn sjóræningja og á 15. öld var hinn áhrifamikli Aragonese kastali reistur til að verjast óvinum. Á 18. og 19. öld varð Ischia aftur aðlaðandi athvarf fyrir aðalsfólk og listafólk sem kom til að njóta heilsulindanna og náttúrunnar og hefur hún haldið því hlutverki allt til dagsins í dag. Við dveljum á hóteli í bænum Forio á vesturströnd eyjunnar næstu fjórar nætur.

Í dag förum við í skoðunarferð hringinn í kring um eyjuna. Við keyrum meðfram fallegum ströndum með útsýni yfir Týrrenahafið sem liggur allt um kring. Hér eru vínekrur og aldingarðar með sítrusávöxtum í hlíðum eldfjallanna, víðar sandstrendur og grýttir sægrænir flóar og víkur. Í hjarta eyjunnar stendur gamla eldfjallið Monte Epomeo umkringt gróskumiklum kastaníuskógi. Við skoðum kastalann Aragonese sem stendur á eyju sem tengd er við land með göngubrú. Það hafa lengi verið voldugar byggingar á þessari eyju til að verjast ágangi sjóræningja, sú fyrsta á 5. öld fyrir okkar tímatal en á 15. öld varð til kastalinn sem enn stendur. Eftir heimsókn okkar út í kastalann kynnum við okkur Mozzarella ostagerð og brögðum á sólþurrkuðum tómötum og ólífuolíu úr héraði.

Litríka eyjan Procida bíður okkar í dag. Hún er smæst af eyjunum þremur í Napólíflóa og er eitt best geymda leyndarmál hans. Þessi heillandi eyja hefur haldið sínum miðjarðarhafssjarma og hér er meiri ró yfir öllu en gengur og gerist á stærri eyjunum Ischia og Caprí. Procida var valin menningarhöfuðborg Ítalíu árið 2022 og voru þá listir, saga, samfélag og hefðir hennar í hávegum höfð. Siglingin frá Ischia tekur um hálftíma og í höfninni taka fagurlega pastellituð húsin á móti okkur. Hér var alsiða að mála húsið sitt í björtum litum til að sjómennirnir gætu þekkt þau frá sjó. Við förum í skemmtilega skoðunarferð um þessa litlu eyju og stoppum svo á veitingastað um hádegisbil. Þar fáum við besta fisk sem völ er á þann daginn, beint úr sjó. Hér er mikil fiskveiðimenning, bátar við bryggju eða úti fyrir ströndinni og net lögð til þerris. Við sjáum hugguleg þorp við litlar kræklóttar götur en líka fallegar sand- og steinvölustrendur, hæðir, kletta og fagra útsýnisstaði yfir Týrennahafið. Í hæðunum fyrir ofan ströndina eru ólífu- og sítrónulundir og vínekrur. Við njótum okkar í kyrrðinni á þessari fallegu eyju.

Nú verður frjáls dagur til að skoða sig betur um í fallega bænum Forio sem er ríkur af sögu og mannlífi. Hér blandast saman töfrar Miðjarðarhafsins, náttúrufegurð og menning. Bærinn er innrammaður af klettum, hlíðum eldfjalla, gróskuríkum dölum, sandströndum og sægrænum sjó. Hér eru litlar hafnir og stígar meðfram þeim, hægt er að setjast inn á kaffi- og veitingahús, fá sér snæðing og fylgjast með mannlífinu. Einnig er gaman að rölta um þröngar steinilagðar götur inn á milli lítríkra húsanna þar sem finna má lítil torg og garða. Í útjaðri vesturenda bæjarins er fallegi listi – og grasagarðurinn La Mortella Gardens sem liggur í hlíðum Zaro. Þaðan er fallegt útsýni yfir Forio og hafið úti fyrir ströndinni.

Nú er þessari glæsilegu ferð um Napólíflóann að ljúka. Við siglum frá Ischia aftur yfir til Napólí og ökum þaðan á flugvöllinn í Róm. Brottför þaðan kl. 16:20 og lending í Keflavík kl. 19:10 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Napólí = Starhotels Terminus Napoli ****
Forio = Hotel Sorriso Thermae resort & spa ****