Fljótasigling á Rhône & Saône

Að morgni heldur þessi heillandi sigling áfram, fram hjá kastalanum La Voulte, Tournon og háskólaborginni Valensa til St. Etienne des Sorts. MS Mistral leggur að landi á meðan við borðum hádegisverð. Eftir hádegi verður ekið um hið stórfenglega Ardèche gil, sem er 300 m hátt og 30 km að lengd, en mikill kraftur árinnar Ardéch hefur sorfið sig inn í bergið og myndað hella, boga og skör eins og Pont-d-Arc sem er 34 m á hæð. Á leið okkar njótum við stórkostlegs útsýnis yfir þetta villta landslag. En nú höldum við til skips og ljúflega siglum við áfram, fram hjá Roquemaure, Pont-St-Esprit og Donzère-Mondragon en þar verður farið um stóran skipastiga. Áður voru þarna miklar flúðir en fljótið hefur verið tamið með sterkum varnargörðum og skipastigum. Þessi gamla leið frá Miðjarðarhafi til norðurhluta Evrópu var sú eina sem lá ekki yfir fjallgarða. Á þessum slóðum stigu Rómverjar sín fyrstu skref til yfirráða í Gallíu og skildu alls staðar eftir sig ummerki. Komið verður að landi í Avignon seint um kvöldið en frá ánni skín borgin eins og glitrandi perla.

Eftir morgunverð verður haldið í skemmtilega skoðunarferð um Avignon. Borgarmúrarnir um gamla bæinn hafa varðveist með eindæmum vel en innan þeirra er að finna fjölda sögufrægra staða. Við munum staldra við nokkra þeirra á göngu okkar um borgina, s.s. Palais des Papes, höllina sem var íverustaður páfans á 14. öld, dómkirkjuna og það sem eftir er af brúnni Saint-Bénézet. Á meðan við snæðum hádegisverð á skipinu léttum við akkerum og siglum fallega leið til Arles. Síðdegis gefst tími til að skoða sig um í þessari einstöku borg, sem er ein af perlum Suður-Frakklands. Við göngum að hinu margrómaða rómverska hringleikahúsi og safni Van Gogh en listamaðurinn dvaldi í bænum um tíma og málaði þar mörg sín þekktustu verk, þ.á m. Gula kaffihúsið. Skipið liggur hér í höfn í nótt. Um kvöldið njótum við glæsilegs hátíðarkvöldverðar og skemmtiatriða á veitingastað skipsins og eigum góða stund saman.

Í dag förum við með rútunni í ferð um Camargue svæðið, sem er friðlýst vatnasvæði myndað af framburði Rhône. Þar má sjá hópa af flamingóum, svörtum nautum og hvíta, arabíska hesta. Á þessari leið verður komið við í strandbænum Saintes Maries de la Mer, sem er pílagrímsbær evrópskra sígauna. Eftir það verður ekið til Port St. Louis vestur af Marseille, þar sem hádegisverður bíður okkar um borð. Nú leggur skipið af stað í siglingu út í Fos flóann, gegnum þröngan skipaskurð til Martigues við Rhônedelta, sem minnir töluvert á Feneyjar, þar sem áin rennur út í Miðjarðarhafið.

Nú er komið að því að kveðja áhöfnina á fljótaskipinu MS Mistral eftir sannkallaða dýrðardaga. Að loknum morgunverði förum við frá skipi og verður stefnan tekin á bæinn Stresa við vatnið Lago Maggiore, sem er umvafið fjallafegurð. Þetta er annað stærsta vatn Ítalíu en tæpur fimmtungur vatnsins tilheyrir Sviss. Frá 18. öld hefur fegurð og lega vatnsins dregið til sín baðgesti og ferðamenn hvaðanæva úr heiminum. Þar verður gist í fjórar nætur á góðu hóteli í miðbæ Stresa sem býður upp á glæsilega aðstöðu m.a. inni- og útisundlaug og mjög fallegan garð með sólbekkjum, stólum og borðum. Einnig er heilsulind með saunu og tyrknesku baði.

Það er kærkomið að slaka á eftir ferðalagið. Eftir góðan morgunverð verður farið í stutta göngu um bæinn Stresa sem er einstaklega líflegur og skemmtilegur. Eftir það er frjáls tími og er því upplagt að nota glæsilega aðstöðu hótelsins, rölta um og kanna bæinn betur eða fara í göngutúr meðfram vatninu þar sem fjallafegurðin er dásamleg.

Dagurinn hefst á siglingu yfir til Isola Bella sem er ein Borromeo eyjanna. Fegurð hennar er ólýsanleg en hún ber nafn Isabellu, eiginkonu Carlo III. Borromeo ættin byggði á eyjunni höll sem þekkt er fyrir að hafa verið gististaður Napóleons og Jósefínu, eiginkonu hans. Það er mjög skemmtilegt að skoða höllina, svo ekki sé talað um garðinn umhverfis hana, stórglæsilegur lystigarður á tíu hæðum. Eftir það verður siglt til eyjunnar Pescatori sem tilheyrir Borromee eyjunum en búseta hefur verið stöðug þar frá 14. öld. Mannlífið á eyjunni heillar en tilvera eyjarskeggja byggist á fiskveiðum í Lago Maggiore vatni. Þar er upplagt að fá sér hádegishressingu áður en siglt verður til baka.

Það er ljúft að taka því rólega hér í Stresa, njóta náttúrufegurðar staðarins, nota glæsilega aðstöðu hótelsins eða fara í göngu með ströndinni. Hægt er að fara í siglingu á vatninu með ferju sem fer á milli bæjanna við vatnið. Einnig er hægt að panta sér tíma í heilsulind hótelsins.

Það er komið að heimferð eftir yndislega og ljúfa daga. Undir hádegi verður ekið til heimsborgarinnar Mílanó. Byrjað verður á að fara í stutta skoðunarferð um borgina og eftir það höfum við frjálsan tíma til að upplifa þessa heillandi borg á eigin vegum, upplagt að líta inn á kaupmenn borgarinnar sem eru ófáir og fá okkur kvöldhressingu áður en við ökum út á flugvöll. Brottför þaðan kl. 23:00 og lending í Keflavík kl. 01:15 að staðartíma, aðfaranótt 31. ágúst.

Fararstjóri getur fært dagskrárliði á milli daga eftir þörfum þegar komið er á staðinn.