Fljótasigling á Rhône

Þessi ljúfi dagur byrjar á morgunverði en eftir það er skoðunarferð með rútunni okkar í klaustrið Cluny sem var eitt mikilvægasta klaustur Evrópu á miðöldum. Árið 910 var klaustrið stofnað af hinni heimsfrægu Benediktínareglu en á hápunkti hennar var nokkur hundruð klaustrum stjórnað héðan. Hin volduga klausturkirkja Cluny klaustursins var stærsta kirkja kristna heimsins allt þar til Péturskirkjan í Róm var byggð. Það er mikil upplifun að koma hér. Nú verður ekið til baka að skipinu þar sem bíður okkar hádegisverður. Við njótum þess að sitja uppi á sóldekki á ljúfri siglingu þessa rómantísku og undurfögru leið suður til forn rómversku borgarinnar Vienne við ána Rhône en þar leggjum við að rétt fyrir miðnætti.

Við eigum góðan morgun í borginni Vienne sem geymir umtalsverðar minjar frá tímum Rómaveldis og státar sig af fjallinu Mont Pipet sem prýðir borgina. Á tímum Rómaveldis var borgin önnur höfuðborg suðurhluta Gallíu og ber hún vitni um mikilvæga fortíð en m.a. má þar finna hof Ágústusar og Liviu, hringleikahúsið og litlar, kræklóttar götur. Einnig verður hér tími til að kanna líf bæjarbúa á eigin vegum. Nú bíður okkar hádegisverður á skipinu okkar og upplifum við einstakt útsýni og mikinn fjölbreytileika í landslaginu á leið suður til Arles. Eftir hádegisverð njótum við þess að sitja uppi á sóldekki og líða áfram eftir Rhône.

Undir morgun leggur skipið við bryggju í Arles. Eftir morgunverð verður farið í skemmtilega skoðunarferð um helstu staði í þessari einstöku borg sem er ein af perlum Suður-Frakklands. Á ljúfri göngu verður komið að hinu margrómaða rómverska hringleikahúsi. Við fetum í fótspor listamannsins Van Gogh en hann dvaldi í borginni um tíma og málaði þar mörg sín þekktustu verk, þ.á m. Gula kaffihúsið og Gamla spítalann. Nú bíður okkar hádegisverður um borð í MS Van Gogh en eftir hádegi förum við með rútunni í ferð um Camargue svæðið sem er friðlýst vatnasvæði myndað af framburði Rhône og telst með fallegri náttúrusvæðum Evrópu. Þar má sjá hópa af flamingóum, svörtum nautum og hvíta arabíska hesta sem eru einkennandi fyrir svæðið. Á þessari leið verður komið við í strandbænum Saintes Maries de la Mer sem er yndislegur pílagrímsbær við Miðjarðarhafið. Um kvöldið njótum við glæsilegs hátíðarkvöldverðar og skemmtiatriða á veitingastað skipsins og eigum góða stund saman í dansi og gleði fram á kvöld.

Skipið hefur nú tekið stefnu á borgina Avignon og eftir morgunverð verður haldið í fróðlega skoðunarferð um borgina þar sem við upplifum helstu staði hennar, falleg miðaldastræti, litrík hverfi og hrífandi torg. Þessi fallega borg er komin á heimsminjaskrá UNESCO. Borgarmúrarnir um gamla bæinn hafa varðveist með eindæmum vel en innan þeirra er að finna fjölda sögufrægra staða. Við munum staldra við nokkra þeirra á göngu okkar um borgina, s.s. Palais des Papes, höllina sem var íverustaður páfans á 14. öld, dómkirkjuna og það sem eftir er af brúnni Saint-Bénézet. Á meðan við snæðum hádegisverð leysir skipið landfestar og við siglum aftur norður ána Rhône og stefnum til biskupaborgarinnar Viviers þar sem skipið leggur að seinnipart dags. Einstakur blær er yfir þessum stað og er upplagt að fara í kvöldgöngu um sjarmerandi stræti, lítil torg og líta inn í St. Vincent dómkirkjuna. Draumfagurt útsýni er yfir bæinn og Rhônedalinn. Skipið liggur hér í höfn í nótt.

Meðan á morgunverði stendur tekur skipið stefnuna á bæinn Tournon-sur-Rhône og um hádegi leggjum við að bryggju. Eftir hádegi er frjáls tími til að kanna þennan klassíska vínbæ á eigin vegum og njóta útsýnis yfir á Tain-l‘Hermitage en hann er í einu merkilegasta vínyrkjuhéraði Frakklands. Um kvöldið tökum við stefnuna á borgina Lyon. 

Undir morgun komum við að landi í Lyon. Nú er komið að því að kveðja áhöfnina á fljótaskipinu MS Van Gogh eftir sannkallaða dýrðardaga. Að loknum morgunverði förum við frá skipi og verður stefnan tekin rakleiðis á Annecy sem er yndislegur bær. Bærinn, sem liggur inn á milli fjallanna, er einn þeirra elstu í frönsku Ölpunum. Yfir honum gnæfir aldagömul höll og eru mörg húsanna frá 16.-18. öld. Við förum í stutta göngu með fararstjóra okkar um þennan töfrandi bæ en eftir það verður frjáls tími til að kanna svæðið á eigin vegum og til dæmis líta inn til kaupmanna. Kvöldverður á eigin vegum.

Þá er þessi glæsilega ferð á enda. Ekið verður til Genf en brottför þaðan er kl. 14:00 og lending í Keflavík kl. 15:55 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Skipið, sem er fimm akkera, varð partur af flota franska útgerðarfyrirtækisins Croisi Europe árið 1999 og en árið 2018 fékk það glæsilega yfirhalningu. Skipið tekur hámark 100 farþega. Káeturnar eru rúmar og allar með tveimur rúmum eða hjónarúmi, sér baðherbergi með sturtu, loftkælingu, hárþurrku, sjónvarpi, öryggishólfi og stórum útsýnisglugga. Á aðalþilfari eru káetur með frönskum opnanlegum svölum. Á aðalþilfarinu er að finna huggulega setustofu með bar og glæsilegum veitingastað þar sem morgun-, hádegis - og kvöldverður er borinn fram. Á sólarþilfarinu eru sólbekkir en einnig eru þar borð og stólar. Fullt fæði er innifalið og eins allir drykkir með mat og á barnum meðan á siglingu stendur.

Vinsamlegast athugið að dagskrá ferðarinnar getur raskast vegna breytinga á vatnsyfirborði siglingaleiða, bilunar í skipastigum eða annarra óvæntra aðstæðna.