Fljótasigling á Douro

Stórglæsileg fljótasigling um sólglóandi Douro dalinn í Portúgal og að landamærum Spánar þar sem landslagið er fjölbreytt og náttúrufegurðin einstök. Ævintýrið byrjar í Madríd, höfuðborg Spánar, en síðar er ekið til höfuðborgar Portúgals, Lissabon, sem er með fallegri borgum Evrópu og sannkölluð paradís ferðalangsins. Við siglum frá Porto, einni af fegurstu borgum Íberíuskagans, og líðum áfram eftir ánni Duoro á fljótaskipinu MS Amalia Rodrigues sem er sannkallað fljótandi eðalhótel. Förum fram hjá sægrænum skógivöxnum hlíðum og njótum náttúrufegurðar en mitt í vínekrunum leynast litlar kapellur, klaustur og draumkenndir staðir þar sem tíminn virðist hafa staðið kyrr. Förum í skemmtilegar ferðir í landi m.a. til borgarperlunnar Vila Real við ána Corgo þar sem við skoðum höllina Mateus og upplifum eldheita flamenkó danssýningu. Frá Vega de Terrón á Spáni verður ekið til Salamanca sem er ein af glæsilegustu borgum Castille Leo héraðsins. Siglum frá Barca d´Alva um sólskinssvæðið Região do Vinho de Porto þar sem hið fræga púrtvín er ræktað. Ljúfur er bærinn Pinhão og forna borgina Lamego sem var lofuð í fornum ritum sem ein fallegasta borg Íberíuskagans. Við kveðjum Porto eftir yndislega siglingu og fljúgum heim frá Madríd.

Verð á mann 529.900 kr.

Aukagjald fyrir einbýli 149.900 kr.

36.600 kr. aukagjald á mann fyrir káetu í tvíbýli á miðju þilfari | Ekki er hægt að fá einbýli á miðju þilfari.

45.500 kr. aukagjald á mann fyrir káetu í tvíbýli á efra þilfari | Ekki er hægt að fá einbýli á efra þilfari.


Innifalið

  • 13 daga ferð.
  • Flug með Icelandair og flugvallarskattar.
  • Gisting í 2ja manna herbergi með baði á hótelum í upphafi ferðar.
  • Morgunverður allan tímann á hótelum.
  • Einn kvöldverður í Madríd.
  • Einn kvöldverður í Lissabon.
  • Allar skoðunarferðir með rútu samkvæmt ferðalýsingu.
  • 8 daga fljótasigling frá Porto um Douerodalinn til Porto með MS Amalia Rodrigues. 
  • 7 nætur á MS Amalia Rodrigues í rúmgóðum káetum með sturtu og salerni.
  • Morgun-, hádegis- og kvöldverður á MS Amalia Rodrigues.
  • Allir drykkir með máltíðum á skipinu, vín, bjór, vatn og kaffi.
  • Móttökudrykkur á skipinu og allir drykkir á bar.
  • Hátíðarkvöldverður síðasta kvöldið á skipinu.
  • Þrjár vínsmakkanir með snarli.
  • Aðgangseyrir í valdar kirkjur og kastala.
  • Íslensk fararstjórn.

Ekki innifalið

  • Aðgangseyrir inn í söfn.
  • Hádegis- og kvöldverðir (fyrir utan það sem tekið er fram í innifalið).
  • Tveir kvöldverðir í Lissabon.
  • Þjórfé til staðarleiðsögumanns og áhafnar á MS Amalia Rodrigues.

Kort af ferðinni

FerðalýsingPrenta ferðalýsingu

13. ágúst | Flug til Madríd

Brottför frá Keflavík kl. 16:45. Mæting í Leifsstöð u.þ.b. 2,5 klst. fyrir brottför. Lending í Madríd kl. 22:55 að staðartíma. Í Madríd verður gist í tvær nætur á góðu hóteli í miðborginni.

14. ágúst | Skoðunarferð um Madríd & frjáls tími

Madríd er höfuðborg Spánar og situr á miðjum Íberíuskaganum í 667 m hæð yfir sjávarmáli. Fallega skreytt hús og byggingar frá Habsborgaratímanum vekja verðskuldaða athygli. Við byrjum á að fara í skoðunarferð um áhugaverðustu staði borgarinnar en síðan gefst góður tími til að njóta þess sem borgin hefur upp á bjóða á eigin vegum. Listasöfn borgarinnar eru víðfræg og er El Prado þar fremst í flokki. Einnig er áhugavert að virða fyrir sér glæsilegu konungshöllina El Palacio Real. Loks er einstaklega gaman að rölta um þessa líflegu borg og njóta spænskra veitinga á spennandi kaffihúsum, börum eða veitingahúsum. Kaupmennirnir láta heldur ekki sitt eftir liggja. Sameiginlegur kvöldverður á hóteli.

15. ágúst | Madríd & Lissabon - paradís ferðalangsins

Nú kveðjum við Madríd og ökum fagra leið inn í Portúgal til Lissabon, höfuðborgar landsins sem byggð var á sjö hæðum eins og Róm hin forna. Í þessari yndislegu borg gistum við í þrjár nætur á góðu hóteli í miðbænum. Sameiginlegur kvöldverður á hóteli.

Opna allt

16. ágúst | Skoðunarferð um Lissabon & frjáls tími

Lissabon er ein af fallegustu borgum Evrópu, einstök borg með mikla sögu og ein af menningarborgum landsins. Gamli og nýi tíminn fléttast skemmtilega saman og glæsileiki borgarinnar er töfrandi. Farið verður í skoðunarferð um helstu staði borgarinnar, m.a. komið í Bairro Alto sem er elsti hluti Lissabon, í Alfama hverfið þar sem við sjáum dómkirkjuna og Rossio hverfið þar sem lyftan Carmo tengir saman efri og neðri hluta borgarinnar. Eftir glæsilega skoðunarferð verður auðvitað tími til að fá sér hressingu og njóta borgarinnar á eigin vegum.

17. ágúst | Fráls dagur í Lissabon

Í dag er gott að byrja á góðum morgunverði en eftir það er upplagt að kanna þessa glæsilegu borg á eigin vegum, margt er að skoða og upplifa í Lissabon og einnig er mjög skemmtilegt verslanahverfi í nágrenni hótelsins fyrir þá sem vilja aðeins líta inn í búðir.

18. ágúst | Porto & fljótasigling á Douro

Hápunktur ferðarinnar, fljótasiglingin á Douro, hefst í dag og eftir yndislega daga í Lissabon kveðjum við höfuðborgina og tökum stefnuna á borgina Porto sem er með eftirsóttustu ferðamannaborgum landsins. Porto er önnur stærsta borg Portúgals næst á eftir Lissabon en hún er einkar áhugaverð og blómleg menningarborg við Douro ána. Þar bíður okkar fljótaskipið MS Amalia Rodrigues sem er sannkallað fljótandi eðalhótel. Á fljótaskipinu verður gist í sjö nætur í mjög þægilegum, vel búnum káetum. Við verðum boðin velkomin í stuttri athöfn áður en kvöldverður hefst. Eftir kvöldverð verður boðið upp á útsýnisferð með rútu um Porto en frá ánni skín borgin eins og glitrandi perla og við upplifum þær glæstu byggingar sem prýða borgina í ljósadýrð kvöldsins. Skipið liggur hér við festar í nótt.

19. ágúst | Skoðunarferð um Porto & sigling á Régua

Á þessum glæsilega degi verður farið í borgarferð um Porto. Borgin var valin menningarhöfuðborg Evrópu 2001 en elsti hluti borgarinnar er kominn á UNESCO heimsminjaskrá. Við byrjum í litríka hverfinu Calis da Ribeira sem býður upp á daglegan markað og margt að skoða. Þar má m.a. nefna gömlu tollskrifstofubygginguna Alfândega, São Francisco kirkjuna sem er ein fallegasta bygging Porto borgar, Bolsa kauphöllina og dómkirkjutorgið með Biskupahöllinni. Það er líka gaman að sjá flísalagninguna á São Bento lestarstöðinni og tignarlegu bronsstyttuna af syni borgarinnar, Henry the Navigator, sem var portúgalskur prins og landkönnuður. Fjórar brýr liggja yfir Douro ána frá Porto til bæjarins Vila Nova de Gaia en sú áhrifamesta og glæsilegasta er bíla- og göngubrúin Dom Luis. Útlit hennar er eins og þverskurður af Eiffelturninum í París en það var einmitt lærisveinn Gustavs Eiffel, hönnuðar Eiffelturnsins, sem hannaði brúna. Fallegi bærinn Vila Nova de Gaia er heimsþekktur fyrir púrtvínsgerð en miðbær hans er hlaðinn sölubásum og börum púrtvínsfyrirtækjanna sem eiga kjallara hér og því kjörið að bragða á hinu fræga púrtvíni. Nú bíður skipið eftir okkur með ljúffengan hádegisverð en meðan á honum stendur leysir skipið landfestar og við yfirgefum Atlantshafsströndina og stefnum í átt að Régua á sólglóandi Douro ánni. Á leiðinni er upplagt að fara upp á sólardekk og njóta þess að sigla fram hjá vín-, furu- og ólífuökrum Douro dalsins. Á leið okkar verður farið inn í Carrapatelo skipatröppuna sem er 35 metra há, hæst sinnar tegundar í Evrópu. Um kvöldið leggjum við að landi við bæinn Régua.

20. ágúst | Vila Real, Mateus höllin, Pinhão & Vega de Terrón á Spáni

Þessi ljúfi dagur byrjar á ferð til borgarperlunnar Vila Real við ána Corgo. Hér ætlum við að njóta þess að rölta um bæinn þar sem glæstar byggingar blasa við, m.a. barokkráðhúsið, Igreja Nova kirkjan og gotneska Sé São Domingos kirkjan. Ekki má gleyma því að smakka á Cristas de Galo, sætabrauði bæjarins sem er í formi hanakambs. Nú er haldið áfram að Mateus höllinni en á einni hlið hennar er að finna merki Mateus Rosé, mest selda víns heims. Þó að þetta sé ein göfugasta eignin í Portúgal, þá er hrífandi fagur garðurinn og hluti byggingarinnar opið fyrir gesti. Í millitíðinni hefur skipið okkar haldið áfram til bæjarins Pinhão þar sem hádegisverður bíður okkar. Nú njótum við náttúrufegurðar Douro dals upp á sólardekki og hrífandi náttúrufegurðin lætur ekki á sér standa. Á vorin eru gróskumiklar hlíðar við Douro ána skærgrænar, síðan breytist litur vínblaðsins yfir sumarið en uppskerutími vínyrkjanna er í september og október. Það er alltaf eitthvað nýtt að dáðst að á leið okkar og í miðjum víngörðunum eru leyndar kapellur og klaustur, hlykkjóttar götur sem eru ekki aðgengilegar bílum og draumkenndir pínulitlir staðir þar sem tíminn hefur staðið kyrr. Þetta er áhrifamikil og töfrandi sigling sem endar í Vega de Terrón á Spáni með eldheitri flamenkó danssýningu. En eftir kvöldmat bíður okkar spænskt kvöld inni í setustofu.

21. ágúst | Salamanca & Barca d´Alva

Eftir góðan morgunverð verður ekið til Salamanca sem er ein af glæsilegustu borgum Castille Leo héraðsins en elsti hluti borgarinnar er á heimsminjaskrá UNESCO. Borgin, sem er við ána Rio Tormes, er ein helsta háskólaborg Spánar og háskólinn þar er með þeim elstu í Evrópu. Glæsilegar byggingar fegra borgina og sérlega skemmtilegt andrúmsloft leikur um okkur. Vert er að skoða elsta háskólann á Spáni, Casa de las Conchas sem er kenndur við pílagrímskeljarnar á framhlið skólans, Plaza Mayor sem er eitt fegursta torgið á Spáni, barokkkirkjuna La Clerecía, gömlu og nýju dómkirkjuna og rómversku brúna Puente Romano. Við höfum svo góðan tíma til að rölta um og njóta, líta í verslanir eða setjast á útikaffihús á torginu Plaza Mayor sem er mjög vinsælt af borgarbúum. Hér í Salamanca verður hádegisverður í boði skipsins á veitingastað í borginni.

22. ágúst | Ferradosa, vínsmökkun á sveitasetri í Rio Torto & bærinn Pinhão

Nú stefnum við í rólegheitum til baka í átt að Porto og upplagt er að fá sér sæti upp á sólardekki og njóta þess að sigla um Região do Vinho de Porto, sólskinssvæðið þar sem hið fræga púrtvín er ræktað. Umhverfið er dásamlegt en portúgalska skáldið Herculano lýsti náttúrufegurðinni við Douro ána sem öflugri, hátíðlegri og djúpri. Meðan á hádegisverð stendur festir skipið landfestar í Ferradosa. Eftir hádegi förum við í leiðangur um frægt vínræktarsvæði, Rio Torto, og komum við á fallegu sveitasetri í miðjum víngarðinum þar sem við munum fræðast um og smakka vín svæðisins. Því næst höldum við til Pinhão og þar gefst tími til að rölta um bæinn fyrir kvöldverð. Það er mjög áhugavert að heimsækja Pinhão lestarstöðina sem er þekkt fyrir málaðar keramikflísar (azulejos) sem norðurhluti Portúgals er frægur fyrir. Um kvöldið er hátíðarkvöldverður á skipinu sem lýkur með dansi og góðri stemningu.

23. ágúst | Lamego & siglum til Porto

Þessi ljúfi dagur byrjar með góðum morgunverði. Eftir það bíður rútan okkar en eftir stuttan akstur komum við til gömlu biskupsborgarinnar Lamego. Stolt borgarinnar er barokkkirkjan Nossa Senhora dos Remédios en að henni liggja um 700 þrep sem leiða okkur upp að tveggja turna kirkjunni. Hingað koma hundruð þúsunda pílagríma á hverju ári. Það er töfrandi að rölta um fornar götur borgarinnar sem var lofuð í fornum ritum frá 2. öld sem ein fallegasta borg Íberíuskagans. Nú bíður hádegisverður okkar á skipinu og við njótum fegurðar Douro dalsins á leiðinni til Porto.

24. ágúst | Frjáls tími í bænum Porto & Guimarães

Um morguninn siglir lítið skip með okkur frá bryggjunni og að gamla bænum í Porto þar sem við höfum tíma til að skoða okkur um á eigin vegum áður en við snæðum hádegisverð um borð í MS Amalia Rodrigues. Eftir hádegi verður farið í skoðunarferð um heillandi borgina Guimarães þar sem við skoðum m.a. háskólakirkjuna Nossa Senhora da Oliveira og mikilvægasta minnisvarða Guimarães borgar. Eftir kvöldverð er von á portúgölsku þjóðlagakvöldi í setustofunni á skipinu.

25. ágúst | Kveðjustund & heimflug frá Madríd

Nú er komið að kveðjustund eftir dásamlega daga á þessari stórglæsilegu siglingu um Douro dalinn. Eftir að hafa kvatt áhöfnina verður stefnan tekin á Madríd þar sem gefinn verður tími til að fá sér góðan kvöldverð inni í borginni áður en lagt verður af stað út á flugvöll. Brottför þaðan kl. 23:55 og lending í Keflavík kl. 02:15 aðfaranótt 26. ágúst.
Fararstjóri getur fært dagskrárliði á milli daga eftir þörfum þegar komið er á staðinn. 

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Skip

MS Amalia Rodrigues

Skipið er nefnt eftir portúgölsku söng- og leikkonunni Amalia Rodrigues og var byggt árið 2018 og tekið í notkun ári seinna. Á skipinu eru 66 káetur sem allar eru með sérbaðherbergi, sjónvarpi, öryggishólfi, loftræstingu og þráðlausri nettengingu. Stórir útsýnisgluggar eru á miðju og efsta þilfarinu. Á aðalþilfarinu er glæsilegur veitingastaður þar sem morgun-, hádegis - og kvöldverður er borinn fram og á miðjuþilfarinu er hugguleg setustofa og bar þar sem hin ýmsu skemmtiatriði fara fram. Á sólarþilfarinu er sundlaug og sólbekkir. Fullt fæði er innifalið og eins allir drykkir með mat og á barnum meðan á siglingu stendur.
Vinsamlegast athugið að dagskrá ferðarinnar getur raskast vegna breytinga á vatnsyfirborði siglingaleiða, bilunar í skipastigum eða annarra óvæntra aðstæðna.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00