Fljótasigling á Douro

Það er kærkomið að fá frjálsan dag og kynnast þessari fallegu borg betur á eigin vegum. Upplagt er að taka sporvagninn gula, sem er eitt af helstu táknum Lissabon, og fara um hæðir borgarinnar og skoða gamla miðbæinn. Eins er áhugavert að heimsækja National Pantheon, sem var frá 16. öld hefðbundin kirkja en var árið 1916 breytt í undurfagurt hvelft grafhýsi, sem margir telja fallegustu byggingu Portúgals. Sá sem heimsækir Lissabon má alls ekki fara þaðan án þess að smakka pastel de nata, litlu eggjakremstartaletturnar sem má segja að sé þjóðareftirréttur Portúgala. Í miðbænum má finna hið fræga bakarí, Pasteis de Belem frá árinu 1837, en það þykir eitt besta pastel de nata bakaríið í Lissabon. Kvöldverður á eigin vegum.

Þennan dag byrjum við í rólegheitum í Lissabon og njótum þess að skoða okkur um á eigin vegum fram að hádegi. Þá kveðjum við höfuðborgina og tökum stefnuna á borgina Porto sem er með eftirsóttustu ferðamannaborgum landsins. Porto er önnur stærsta borg Portúgals næst á eftir Lissabon en hún er einkar áhugaverð og blómleg menningarborg við Douro ána. Þar bíður okkar fljótaskipið MS Gil Eanes. Á fljótaskipinu verður gist í sjö nætur í þægilegum, vel búnum káetum. Við verðum boðin velkomin í stuttri athöfn áður en kvöldverður hefst. Eftir kvöldverð verður boðið upp á útsýnisferð með rútu um Porto en frá ánni skín borgin eins og glitrandi perla og við upplifum þær glæstu byggingar sem prýða borgina í ljósadýrð kvöldsins. Skipið ligur við landfestar í Porto yfir nóttina.

Á þessum glæsilega degi verður farið í borgarferð um Porto. Borgin var valin menningarhöfuðborg Evrópu 2001 en elsti hluti borgarinnar er á UNESCO heimsminjaskrá. Við byrjum í litríka hverfinu Calis da Ribeira sem býður upp á daglegan markað og þar er margt að skoða. Til dæmis má nefna gömlu tollskrifstofubygginguna Alfândega, São Francisco kirkjuna sem er ein fallegasta bygging Porto borgar, Bolsa kauphöllina og dómkirkjutorgið með Biskupahöllinni. Það er líka gaman að sjá flísalagninguna á São Bento lestarstöðinni og tignarlegu bronsstyttuna af syni borgarinnar, Henry the Navigator, sem var portúgalskur prins og landkönnuður. Fjórar brýr liggja yfir Douro ána frá Porto til bæjarins Vila Nova de Gaia en sú áhrifamesta og glæsilegasta er bíla- og göngubrúin Dom Luis. Útlit hennar er eins og þverskurður af Eiffelturninum í París en það var einmitt lærisveinn Gustavs Eiffel, hönnuðar Eiffelturnsins, sem hannaði brúna. Eftir þessa glæsilegu skoðunarferð heimsækjum við Azulejo verkstæðið sem er frægt fyrir sínar fallegu Azulejo flísar sem við sjáum víða á ferð okkar um Portúgal. Þetta listform á sér langa og merkilega sögu frá tímum Máranna á Íberíuskaganum. Flísarnar er málaðar með grasa, dýra og sögulegu myndefni og skreyttar í bláum og hvítum tónum. Nú bíður skipið eftir okkur með ljúffengan hádegisverð en meðan á honum stendur leysir skipið landfestar og við yfirgefum Atlantshafsströndina og stefnum í átt að Régua á sólglóandi Douro ánni. Á leiðinni er upplagt að fara upp á sólardekk og njóta þess að sigla fram hjá vín-, furu- og ólífuökrum Douro dalsins. Á leið okkar verður farið inn í Carrapatelo skipatröppuna sem er 35 metra há, hæst sinnar tegundar í Evrópu. Um kvöldið leggjum við að landi við bæinn Régua.

Þessi ljúfi dagur byrjar á ferð að Mateus höllinni en á einni hlið hennar er að finna merki Mateus Rosé, einu mest selda rósavíni heims. Þó að þetta sé ein göfugasta eignin í Portúgal þá er hrífandi garðurinn og hluti byggingarinnar opin fyrir gesti. Nú er haldið áfram að borgarperlunnar Vila Real við ána Corgo. Hér ætlum við að njóta þess að rölta um bæinn á eigin vegum þar sem glæstar byggingar blasa við, m.a. barokkráðhúsið, Igreja Nova kirkjan og gotneska Sé São Domingos kirkjan en ekki má gleyma að smakka á Cristas de Galo, sætabrauði bæjarins, sem er í formi hanakambs. Endum þessa glæsilegu skoðunarferð á að aka til Régua, þar sem við heimsækjum Douro safnið, sem staðsett er á bökkum árinnar. Það sameinar hefð og nútímann og veitir okkur innsýn í sögu Douro árinnar og aðferðir við víngerð á þessu undurfallega svæði. Í millitíðinni hefur skipið okkar haldið áfram til bæjarins Pinhão þar sem hádegisverður bíður okkar. Við njótum náttúrufegurðar Douro dals upp á sólardekki og hrífandi náttúrufegurðin lætur ekki á sér standa. Á vorin eru gróskumiklar hlíðar við Douro ána skærgrænar, síðan breytist litur vínblaðsins yfir sumarið en uppskerutími vínyrkjanna er í september og október. Það er alltaf eitthvað nýtt að dáðst að á leið okkar og í miðjum víngörðunum eru leyndar kapellur og klaustur, hlykkjóttar götur sem eru ekki aðgengilegar bílum og draumkenndir pínulitlir staðir þar sem tíminn hefur staðið kyrr. Þetta er áhrifamikil og töfrandi sigling sem endar í Vega de Terrón á Spáni með eldheitri flamengó danssýningu. En eftir kvöldmat bíður okkar spænskt kvöld inni í setustofu.

Eftir góðan morgunverð verður ekið til Salamanca sem er ein af glæsilegustu borgum Castille Leo héraðsins en elsti hluti borgarinnar er á heimsminjaskrá UNESCO. Borgin, sem er við ána Rio Tormes, er ein helsta háskólaborg Spánar og háskólinn þar er með þeim elstu í Evrópu. Glæsilegar byggingar fegra borgina og sérlega skemmtilegt andrúmsloft leikur um okkur. Vert er að skoða elsta háskólann á Spáni, Casa de las Conchas sem er kenndur við pílagrímaskeljarnar á framhlið skólans, Plaza Mayor sem er eitt fegursta torgið á Spáni, barokkkirkjuna La Clerecía, gömlu og nýju dómkirkjuna og rómversku brúna Puente Romano. Við höfum svo góðan tíma til að rölta um og njóta, líta í verslanir eða setjast á útikaffihús á torginu Plaza Mayor sem er mjög vinsælt af borgarbúum. Hér í Salamanca verður hádegisverður í boði skipsins á veitingastað í borginni.

Nú stefnum við í rólegheitum til baka í átt að Porto. Það er upplagt er að fá sér sæti upp á sólardekki og njóta þess að sigla um Região do Vinho de Porto, sólskinssvæðið þar sem hið fræga púrtvín er ræktað. Umhverfið er dásamlegt en portúgalska skáldið Herculano lýsti náttúrufegurðinni við Douro ána sem öflugri, hátíðlegri og djúpri. Meðan á hádegisverði stendur festir skipið landfestar í Ferradosa. Eftir hádegi förum við í leiðangur um frægt vínræktarsvæði, Rio Torto, og komum við á fallegu sveitasetri í miðjum víngarðinum þar sem við munum fræðast um og smakka Portvín svæðisins. Því næst höldum við til Pinhão og þar gefst tími til að rölta um bæinn fyrir kvöldverð. Það er mjög áhugavert að heimsækja Pinhão lestarstöðina sem er þekkt fyrir málaðar keramikflísar (azulejos) sem norðurhluti Portúgals er frægur fyrir. Um kvöldið er hátíðarkvöldverður á skipinu sem lýkur með dansi og góðri stemningu.  

Þessi ljúfi dagur byrjar með góðum morgunverði. Eftir það bíður rútan okkar en eftir stuttan akstur komum við til gömlu biskupsborgarinnar Lamego. Stolt borgarinnar er barokkkirkjan Nossa Senhora dos Remédios en að henni liggja um 700 þrep sem leiða okkur upp að tveggja turna kirkjunni. Hingað koma hundruð þúsunda pílagríma á hverju ári. Það er töfrandi að rölta um fornar götur borgarinnar sem var lofuð í fornum ritum frá 2. öld sem ein fallegasta borg Íberíuskagans. Nú bíður hádegisverður okkar á skipinu og við njótum fegurðar Douro dalsins á leiðinni til Porto.

Um morguninn geta þau sem vilja siglt með litlum bátum frá bryggjunni og að gamla bænum í Porto þar sem við höfum tíma til að skoða okkur um á eigin vegum áður en við snæðum hádegisverð um borð í MS Gil Eanes. Eftir hádegi verður farið í skoðunarferð um heillandi borgina Guimarães þar sem við skoðum m.a. háskólakirkjuna Nossa Senhora da Oliveira og mikilvægasta minnisvarða Guimarães borgar. Eftir kvöldverð er von á portúgölsku þjóðlagakvöldi í setustofunni á skipinu.

Nú er komið að kveðjustund eftir dásamlega daga á þessari stórglæsilegu siglingu um Douro dalinn. Eftir að hafa kvatt áhöfnina verður stefnan tekin á Lissabon þar sem gefinn verður frjáls tími til að skoða borgina betur og kanna umhverfið. Upplagt er að fá sér góðan kvöldverð inni í borginni áður en lagt verður af stað út á flugvöll. Brottför frá Lissabon flugvelli kl. 22:20 og lending í Keflavík kl. 01:50. 

Fararstjóri getur fært dagskrárliði á milli daga eftir þörfum þegar komið er á staðinn.

• Lissabon - Hotel Lisboa Pessoa