Japan & Suður-Kórea

Nú eigum við frjálsan dag til að skoða okkur um á eigin vegum í Tókýó. Fararstjórinn verður hópnum innan handar og kemur með hugmyndir um hvernig hægt er að njóta dagsins sem best. 

• Morgunverður

Í dag er mikilvægt að pakka niður í tösku til einnar nætur, því að farangurinn okkar verður fluttur á undan okkur til Kyoto, en við höfum næturstað í millitíðinni í Hakone. Við höldum í suðurátt til Kamakura sem var aðsetur fyrstu herstjóra Japans á 12. öld. Þar skoðum við Hase-dera hofið sem er ákaflega fallegt og þekkt fyrir blómgaða garða og stóra styttu af Kannon, sem er gyðja í Búddatrú. Við skoðum einnig yfir 13 metra háa styttu af Búdda í Kōtoku-in hofinu sem er ein af þjóðargersemum Japans. Staldrað verður einnig í Komachi-dori verslunargötunni. Þar er úrval verslana, kaffihúsa og veitingastaða og við tökum hér hádegishlé. Fyrir áhugasama mun gefast tími til þess að rölta um og skoða umhverfið og í verslanir. Síðdegis skoðum við Tsurugaoka Hachimangu, sem er einn helgasti dómur Shinto trúarinnar. Við höldum síðan áfram ferð okkar til bæjarins Hakone þar sem við gistum eina nótt. Hakone er vinsæll ferðamannastaður í Ashigarashimo héraði.

• Morgunverður
• Hádegisverður
• Kvöldverður

Framundan er viðburðaríkur dagur. Eftir morgunverðinn tekur við skoðunarferð við Hakone en þaðan er fallegt útsýni til eldfjallsins Fuji. Það er hæsta fjall Japans og er af mörgum talin vera ein fallegasta eldkeila veraldar. Eldfjallið, sem hefur ekki verið virkt í yfir 250 ár, myndar nánast fullkominn hring og er breidd þess um 35-40 km frá vestri til austurs. Hakone er á meðal vinsælustu hverasvæða Japans. Farið verður með kláf um eldfjalladalinn Owakudani en þaðan er stórkostlegt útsýni í heiðskýru veðri yfir Fuji fjallið, Ashi stöðuvatnið og Futago fjallið. Þessu næst förum við í hið frábæra Hakone útisafn sem er skemmtileg blanda listar, náttúru og friðsemdar en það er staðsett í fallegu umhverfi Hakone fjallanna. Hér eru yfir 100 höggmyndir eftir innlenda og erlenda listamenn og slökunarsvæði þar sem hægt er að komast í heitt fótabað. Eitt af merkilegustu svæðum safnsins er laufskáli sem helgaður er verkum Picasso, hér er að finna málverk, höggmyndir, leirmuni og fleira. Við snæðum hádegisverð á veitingahúsi og höldum síðan á Odawara lestarstöðina þar sem við tökum háhraðalest til Kyoto, en þar gistum næstu fjórar næturnar.

• Morgunverður
• Hádegisverður

Kyoto var höfuðborg Japans í yfir 10 aldir, frá 794 til 1868. Í Kyoto er að finna yfir 1600 Búddahof og 270 shinto-helgidóma. Þrátt fyrir að borgin hafi þróast í gegnum aldirnar þá hefur hún viðhaldið andrúmslofti gamla heimsins og svífur andi gamla Japans þar yfir vötnum. Við skoðum Kiyomizu hofið en þaðan er dásamlegt útsýni yfir borgina og náttúruna í kring. Á þessum tíma eru kirsuberjatrén gjarnan í blóma en sá tími stendur yfir frá seinni hluta marsmánaðar og fram í byrjun apríl. Við skoðum Nijo kastala frá tíma herstjórnarinnar í Japan en hann var byggður á öndverðri 17. öld. Byggingar kastalans eru einstaklega vandaðar og þar má víða sjá falleg veggjalistaverk. Næturgalagólf finnst í hluta bygginganna en gólfið er sett saman á þann hátt að það marrar í því þegar stigið er á það. Launmorðingjar gátu því ekki nálgast íbúa kastalans án þess að til þeirra heyrðist. Hér umhverfis eru virkisveggir og síki en einnig glæsilegir garðar eins og Shinzou-no-Mor. Í útjaðri borgarinnar er að finna hið fræga Gullhof, Kinkaku-ji, sem er frá Muromacchi tímabilinu (1336-1573). Tvær efstu hæðir þess eru lagðar gulli og glitra fallega þegar sólin skín og á þakinu er að finna fönix úr bronsi. Hofið hefur verið á heimsminjaskrá Sameinuðu þjóðanna frá 1994.

• Morgunverður
• Kvöldverður

Við hefjum daginn á að halda á Nishiki markaðinn sem er einn þekktasti og líflegasti matarmarkaðurinn í Kyoto. Eftir hádegi kynnum við okkur hinn gullfallega kimono búning Japana sem á sér yfir 1000 ára sögu. Í fyrstu voru það hirðdömur sem klæddust þessari einstöku flík, síðar bættust við auðugir samúræjar og aðalsfólk, en á tímum hershöfðingjanna, hinu svokallaða Edo tímabili, fékk búningurinn sína núverandi mynd og notkun hans varð almennari bæði meðal karla og kvenna. Við tökum einnig þátt í hefðbundinni japanskri teathöfn (sadō). Hún fer fram í þar til gerðu te-herbergi eða húsi og notuð eru sérstök áhöld til þess að útbúa hið græna te, Matcha. Hér er um að ræða hátíðlega athöfn þar sem gildi búddatrúarinnar endurspeglast í núvitund, mikilli nákvæmni í öllum smáatriðum og fagurfræðilegri nálgun á einfaldleika augnabliksins. Kvöldverður á eigin vegum. 

• Morgunverður

Í dag er tilvalið að heimsækja Arashiyama hverfið sem liggur undir rótum fjallanna vestast í Kyoto. Þar er mikil náttúrufegurð og margt að skoða. Hér má meðal annars finna hofið Tenryu-ji sem er á heimsminjaskrá Sameinuðu þjóðanna og er frægt fyrir sína fallegu zen-garða frá 14. öld. Það er mikið af fallegum gönguleiðum um fagurgróin svæði, meðfram ám og lækjum með fjöllin í baksýn. Þar má helst nefna hina fallegu bambuslundi, einkum Sagano lundinn, þar sem bambustré skaga 10-20 metra upp í loft. Efst mynda laufin þak sem sólin brýst í gegn um og það er yndislegt að labba um göngustíganna milli trjánna og upplifa hið töfrandi og róandi andrúmsloft ljóss og skugga.

• Morgunverður

Við höldum af stað í skoðunarferð til litlu borgarinnar Nara sem stendur rétt sunnan við Kyoto. Hún var höfuðborg Japans frá árinu 710 til ársins 784 og var á þeim tíma vagga japanskrar listar, handverks og bókmennta. Við skoðum Todai-ji hofið sem er stærsta, forna trébygging veraldar en lokið var við byggingu þess árið 752. Við sjáum einnig Kasuga helgidóminn sem er einn af elstu og mikilvægustu shinto-helgidómum landins. Hann er staðsettur í garði þar sem hin gæfu sika dádýr ganga laus en þau eru talin heilög vegna tengsla sinna við gyðju Kasuga Taisha helgidómsins í Nara. Garðurinn sjálfur er á heimsminjaskrá UNESCO, en innan hans má einmitt finna þær byggingar sem við höfum nú þegar skoðað, Toda-ji hofið og Kasuga helgidóminn. Við ferðumst áfram til borgarinnar Osaka sem er önnur stærsta borg Japans og miðstöð verslunar í vesturhluta landsins. Við skoðum Namba Dotonbori hverfið en það eitt af helstu kennileitum Osaka. Þar er að finna ýmsa afþreyingu og fjölda veitingastaða sem staðsettir er á suðurbökkum Dotonbori síkisins. Hádegisverður á eigin vegum. Við skoðum einnig Osaka kastalann sem byggður var á 16. öld. Kastalinn átti á sínum tíma að vera best byggði og fallegasti kastali Japans en í áranna rás hafa stríð og eldsvoðar sett mark sitt á hann. Gistum eina nótt í Osaka. Kvöldverður á eigin vegum.

• Morgunverður

Í dag tökum við háhraðalestina frá Osaka til Hiroshima, við pökkum til einnar nætur í tösku, þar sem farangurinn okkar mun verða sendur á undan okkur til borgarinnar Kobe, en við höfum næturstað í millitíðinni í Hiroshima. Við byrjum á því að fá okkur hádegisverð á veitingastað í bænum Miyajimaguchi sem stendur við Hiroshimaflóa en þaðan siglum við til að skoða eyjuna Miyajima eða Itsukushima. Miyajima er þekkt fyrir mikla náttúrufegurð, sögulegt mikilvægi og menningararf. Þar finnum við Itsukushima helgidóminn en hann er byggður á sjónum við ströndina. Byggingarnar eru tengdar saman með göngubrúm eða bryggjum, enda er helgidómurinn tileinkaður goðum sem tengjast sjónum og storminum. Þar er eitt mest ljósmyndaðasta tori hlið Japans en það stendur í vatninu. Það rís um 16 metra fyrir ofan sjávarmál og stendur á stöplum sem hafa grafist niður í sjávarbotninn. Á háflóði lítur út fyrir að bæði helgidómurinn og torii hliðið fljóti á sjónum sem skapar heillandi sýn. Víða um eyjuna má sjá hin heilögu dádýr á vappi. Ferskar ostrur frá Miyajima þykja algert lostæti og vinsæll minjagripur er Momiji Manju, lauflaga kaka með hinum ýmsu gerðum af fyllingu. Við siglum aftur til baka og komum til Hiroshima síðdegis þar sem við gistum eina nótt. Kvöldverður á eigin vegum.

• Morgunverður
• Hádegisverður

Hiroshima borg er þekkt um allan heim, en þann 6. ágúst 1945 var hún lögð í rúst og yfir 100.000 manneskjur létust þegar heimurinn varð vitni að fyrstu kjarnorkusprengjuárás veraldarsögunnar. Í dag stendur eftir fábrotin byggingarrúst með hvolfþaki (The Atomic Bomb Dome) sem minning um hina gríðarlegu eyðileggingu sem sprengingin orsakaði og munum við skoða þessa byggingu. Nærri henni er að finna Friðargarðinn en þar er friðarloginn sem verður fyrst slökktur þegar síðasta kjarnorkuvopninu á jörðinni hefur verið eytt. Hann er tileinkaður fórnarlömbum sprengingarinnar. Við heimsækjum garðinn og Friðarsafnið sem á áhrifamikinn hátt sýnir sögu Hiroshima fyrir kjarnorkusprengjuna, áhrif hennar á borgina og uppbyggingu borgarinnar eftir sprenginguna. Tilgangur safnsins er að vekja athygli á eyðileggingarmætti kjarnorkuvopna og styðja við frið í heiminum. Hádegisverður á veitingastað. Laust eftir hádegið höldum við með háhraðalest til borgarinnar Fukuoka þar sem gist verður eina nótt.

• Morgunverður
• Hádegisverður

Eftir morgunverð á hóteli höldum við út á flugvöllinn í Fukuoka. Brottför kl. 10:30 Áætluð lending í Seúl er kl. 12:00 að staðartíma. Tekið verður á móti okkur á flugvellinum og þaðan verður haldið með rútu á hótelið okkar þar sem við gistum næstu þrjár nætur. 

• Morgunverður
• Kvöldverður

Þrátt fyrir stormasama fortíð er DMZ svæðið (Korean Demilitarized Zone), sem skilur að Norður- og Suður-Kóreu, mjög öruggt fyrir ferðamenn og mjög áhrifaríkt að sjá. Svæðið er eingöngu hægt að skoða í skipulögðum ferðum með leiðsögn og gefst tækifæri til að sjá JSA (Joint Security Area) eða Panmunjom, þar sem leiðtogar ríkjanna tveggja hittust í friðarviðræðum. Þarna býðst gestum að kynnast örlítið sögunni um átökin á milli þessara tveggja landa. Hluti þessarar skoðunarferðar eru göngin The Third Infiltration Tunnel og Dora stjörnuathugunarstöðin, þar sem hægt er að sjá yfir til Norður-Kóreu í gegnum sjónauka ef veður leyfir. Förum einnig í Imjingak friðargarðinn og á Dorasan járnbrautarstöðina sem áður tengdi löndin tvö. Snæðum hádegisverð á veitingastað á svæðinu. Við höldum aftur til Seúl og heimsækjum elsta og stærsta markað í Kóreu, Namdaemun. Seinni part dags förum við á skemmtilega sýningu í borginni og eftir hana er okkur boðið í glæsilegan kvöldverð þar sem við fáum að kynnast matarmenningu landsins.

• Morgunverður
• Hádegisverður
• Kvöldverður

Í dag verður farið í skoðunarferð um Seúl sem er tísku- og tækniborg en einnig mjög hefðbundin. Við sjáum hallir, musteri og nútímalega hönnun. Við skoðum Gyeongbokgung höllina, sem er sú glæsilegasta í borginni, en byggingu hennar lauk árið 1395. Þar standa verðir í litskrúðugum búningum, Hanbok, sem er þjóðbúningur Kóreubúa. Hanbok á sér um 2000 ára sögu og er meðal annars fyrirmynd Japana að Kimono sem kom árþúsundi seinna. Leið okkar liggur í Bukchon Hanok þorpið sem á sér um 600 ára sögu, en það stendur milli Gyeongbokgung og Changdeokgung hallanna og Jongmyo helgidómsins. Þetta litla þorp í borginni er einstakt en það samanstendur af mörgum húsasundum og svokölluðum Hanoks, hefðbundnum kóreskum húsum, en þau fyrstu voru byggð á 14. öld. Hér er mikið líf og húsin eru enn í fullri notkun sem heimili, tehús, söfn, gallerí, gistiheimili og fyrirtæki. Í Jogyesa búddamusterinu í miðju borgarinnar slær hjarta búddismans í Kóreu en það er um 600 ára gamalt. Insa-dong er eitt mest heillandi og söguríkasta hverfi Seúl en þar mætast fortíð og nútíð í aldagömlum hanok húsum, nútímalegum byggingum, listum, handverki, minjagripum, te- og veitingahúsum. Ef tími vinnst til verður farið að N Seúl turninum, oft nefndur Namsan turninn, en hann stendur á samnefndu fjalli. Hægt er að komast að fótum turnsins með því að fara með kláfi frá fjallsrótum upp á topp fjallsins. Hér er útsýnið stórkostlegt til allra átta.

• Morgunverður
• Hádegisverður
• Kvöldverður

Eftir morgunverð á hótelinu gefst tími til þess að kíkja aðeins í bæinn, skoða í verslanir, prufa einstakan götumat og virða fyrir sér mannlífið. Við borðum snemmbúinn kvöldverð áður en haldið verður út á flugvöll kl. 18:00. Næturflugið okkar frá Seúl til Helsinki er kl. 23:00 að staðartíma. Flugið tekur um 13 klukkustundir.

• Morgunverður
• Kvöldverður

Áætluð lending í Helsinki er klukkan 05:40 og tengiflug okkar áfram heim til Íslands er klukkan 07:20. Áætluð heimkoma til Íslands er klukkan 09:15 að staðartíma að morgni 30. október. 

Fararstjóri getur fært dagskrárliði á milli daga eftir þörfum þegar komið er á staðinn.

Tokyo - Grand Prince Hotel Shin Takanawa

Hakone - Tenseien

Kyoto - Hotel Granvia Kyoto

Hiroshima - Hotel Granvia Hiroshima South Gate

Fukuoka - The Royal Park Hotel Fukuoka

Seoul - Novotel Ambassador Seoul Dongdaemun Hotel