Suður-Afríka

21. september - 5. október 2024 (15 dagar)

Fjölbreytt dýralíf, stórbrotin náttúrufegurð og áhugaverðar borgir einkenna þessa Suður-Afríku ferð. Við hefјum ferðina í Jóhannesarborg en höldum svo í ævintýralega tveggja daga safaríferð um friðland þar sem á vegi okkar verða margar dýrategundir, m.a. ljón, hlébarðar, nashyrningar og fílar. Flogið verður til hinnar fallegu borgar Port Elizabeth, sem stendur við ylríkt Indlandshafið. Við ökum til borgarinnar Knysna, sem stendur við töfrandi Knysna lónið. Farið verður í gegnum hið stórbrotna Quteniqua skarð á leið okkar til Oudtshoorn, stærsta bæjar Litla Karoo en þar heimsækjum við strútabúgarð. Í Höfðaborg munum við fara í góða skoðunarferð og kynna okkur allt það markverðasta sem gerir hana að einni fegurstu borg í heimi. Ekið verður um vínhéruð í nágrenni Höfðaborgar og einnig munum við heimsækja bæinn Stellenbosch, sem er næstelsti bær Suður-Afríku og þekktur fyrir byggingar frá tímum hollensku landnemanna og risastór eikartré. Ekin verður undurfögur leið eftir bröttum hlíðum út á Góðrarvonarhöfða, þar sem áður var talið að hið hlýja Indlandshaf og kalda Atlantshaf mættust en þar gefur að líta stórkostlegt útsýni á haf út. Við komum að verndaðri mörgæsabyggð og fylgjumst með hundruðum mörgæsa spígspora um. Einnig verður ekið um litla fiskimannabæi, iðandi af lífi, og fallegar víkur og firði. Suður-Afríka er af mörgum talið eitt fegursta land í heimi með fјölbreytt og litríkt landslag og einstaklega gott veðurfar.

Verð á mann 880.900 kr.

Aukagjald fyrir einbýli 99.700 kr.


Innifalið

  • Áætlunarflug með British Airways: Keflavík – London – Jóhannesarborg. 
  • Áætlunarflug með British Airways: Höfðaborg – London – Keflavík.
  • Innanlandsflug: Jóhannesarborg – Port Elizabeth.
  • Flugvallaskattar fyrir alla ferðina.
  • Akstur til og frá flugvelli í Jóhannesarborg, Port Elizabeth og Höfðaborg.
  • Allar rútuferðir samkvæmt ferðalýsingu í loftkældri rútu.
  • Skoðunarferðir og aðgangseyrir samkvæmt ferðalýsingu.
  • Jeppasafarí í Honeyguide Mantobeni friðlandinu.
  • Gisting í 12 nætur í tveggja manna herbergjum á góðum 4* hótelum, miðað við landsmælikvarða.
  • Gisting í 2 nætur í tveggja manna nútímalegum safarítjöldum (Lodges) vegna dvalar í Honeyguide Mantobeni friðlandinu.
  • Sjá í ferðalýsingu hvaða máltíðir eru innifaldar.
  • Töskuburður – eitt stk. á mann.
  • Enskumælandi staðarleiðsögn. 
  • Íslensk fararstjórn.
  • Undirbúningsfundur með fararstjóra fyrir ferð. 

Ekki innifalið

  • Þjórfé fyrir erlendan staðarleiðsögumann og rútubílstjóra.
  • Aðrar máltíðir en þær sem taldar eru upp í ferðalýsingu.
  • Skoðunarferð út í Robben Island eyjuna. 
  • Skoðunarferð með kláfi upp á Table Mountain.
  • Forfalla- og ferðatryggingar.

Kort af ferðinni

FerðalýsingPrenta ferðalýsingu

21. september | Flug til Jóhannesarborgar

Flogið verður með British Airways í gegnum London til Jóhannesarborgar. Brottför frá Keflavík kl. 10:10 og lending á London Heathrow kl. 14:20 að staðartíma. Þaðan verður flogið til Jóhannesarborgar í næturflugi, brottför kl. 19:05 og lending í Jóhannesarborg kl. 07:05 að staðartíma þann 22. september. Næturflugið tekur 11 klst. 

22. september | Jóhannesarborg – Pretoria

Lent verður í Jóhannesarborg að morgni dags. Við hefjum ferðina á að skoða okkur um í borginni Pretoria og skoðum Union Buildings og Voortrekker minnismerkið. Hér snæðum við hádegisverð áður en haldið verður á fyrsta gististaðinn þar sem hægt verður að slaka á og safna kröftum fyrir ævintýri komandi daga.

Gist í Zebra Country Lodge eina nótt.

  • Kvöldverður

23. september | Panoramaleiðin – Blyde River-gljúfrið

Eftir morgunmatinn stefnum við í austurátt. Við ökum Panoramaleiðina sem er oft sögð eitt fallegasta svæði Suður-Afríku. Við stoppum við God‘s window en þaðan er frábært útsýni yfir Lowveld. Einnig sjáum við Bourke‘s Luck Potholes skessukatlana, djúpar og sívalningslaga holur í berginu sem mynduðust vegna árrofs, og hið stórbrotna gljúfur Blyde River Canyon sem er 33 km langt og talið eitt mesta náttúruundur landsins. Gist verður næstu þrjár nætur í Honeyguide Mantobeni friðlandinu sem liggur að hinum þekkta Kruger þjóðgarði. Gisting okkar mun bera keim af dæmigerðum óbyggðablæ þótt gist verði í nútímalegum safarítjöldum með baði. Okkur gefst þannig kostur á að upplifa hljóð og lykt þjóðgarðsins á einstakan hátt.

Gist verður næstu þrjár nætur í Honeyguide Mantobeni friðlandinu.

  • Morgunverður
  • Kvöldverður
Opna allt

24. september | Safarídagur

Nú verður farið í safaríferð um garðinn sem er þekktur fyrir verndun villtra dýra og vistfræði sína. Ferðast verður um í opnum jeppum og ef heppnin er með okkur munum við sjá dýr á borð við ljón, hlébarða, vísunda, antilópur, gíraffa, sebrahesta, nashyrninga, fíla, hýenur og bavíana í sínu náttúrulega umhverfi. Í gegnum árin hafa villt dýrin vanist bílaumferðinni um garðinn og má því jafnvel sjá t.d. fíla, gíraffa og antilópur á beit í námunda við kyrrstæða bíla. Það getur jafnvel komið fyrir að hópur ljóna eða blettatígrar standi í vegi bílanna og hindri för þeirra eftir veginum. Við vöknum snemma við trommuslátt og njótum þess að drekka te eða kaffi í tjaldinu áður en haldið verður af stað í fyrstu safaríferð dagsins. Allar máltíðir verða bornar fram við tjaldbúðirnar. Einnig býðst að fara gangandi í skoðunarferð um svæðið með landverði og komast þannig enn betur í snertingu við friðlandið. Ef veður leyfir snæða allir kvöldverð saman undir afrískum himni.

  • Morgunverður
  • Hádegisverður
  • Kvöldverður

25. september | Safarídagur

Safaríferðinni verður haldið áfram þar sem frá var horfið í gær. Reynt verður að komast til einhverra þeirra svæða sem ekki náðist að skoða í gær. Áfangastaðurinn er háður tilmælum landvarðanna, þar sem aðgangur að ákveðnum svæðum gæti verið takmarkaður vegna verndunar dýranna. Ef veður leyfir snæða allir kvöldverð saman undir afrískum himni.

  • Morgunverður
  • Hádegisverður
  • Kvöldverður

26. september | Port Elizabeth

Eftir morgunverðinn yfirgefum við Honeyguide Mantobeni friðlandið og ökum til baka í áttina að Jóhannesarborg. Frá flugvelli Jóhannesarborgar fljúgum við til fallega strandbæjarins Port Elizabeth sem stendur við ylvolgt Indlandshafið.

Hér verður gist eina nótt.

  • Morgunverður

27. september | Tsitsikamma þjóðgarðurinn – Knysna

Ekin verður fögur leið til Tsitsikamma þjóðgarðsins sem er þekktur fyrir fjölbreytt fuglalíf, fágætar plöntur, tré og heillandi klettaströnd. Eftir stutta gönguferð, þar sem m.a. verður gengið yfir ævintýralegu hengibrúna sem liggur yfir ána Storms River, verður ekin svonefnd Blómaleið til Knysna. 

Gist tvær nætur á hóteli í Knysna.

  • Morgunverður
  • Kvöldverður

28. september | Sigling á Knysna lóninu

Um morguninn gefst tækifæri til að skoða sig lítillega um í Knysna á eigin spýtur áður en við förum í vistvæna siglingu á Knysna lóninu til Western Head. Þar verður ekið upp nesið og stoppað á stórkostlegum útsýnisstöðum í friðlandinu þar sem við fræðumst um sögu, dýralíf og gróður svæðisins. Þeir sem vilja geta farið í gönguferð með leiðsögn í gegnum strandskóga og inn í forna sjávarhella. Boðið verður upp á hádegishlaðborð á útiveitingastað.

  • Morgunverður
  • Hádegisverður

29. september | Strútabúgarður í Oudtshoorn – Cango Caves

Að loknum morgunverði er ekið í gegnum hið stórbrotna Quteniqua skarð á leið okkar til Oudtshoorn, stærsta bæjar Litla Karoo og aðalmiðstöðvar strútaræktunar. Þar heimsækjum við strútabúgarð og fræðumst um strúta. Eftir hádegi höldum við til norðurs og skoðum heimsþekktu dropasteinshellana Cango Caves áður en haldið er á hótel þar sem gist verður eina nótt.

  • Morgunverður
  • Kvöldverður

30. september | Höfðaborg

Haldið verður í vesturátt gegnum bæinn Swellendam sem stendur við rætur Langeberg fjallanna en hann er talinn vera þriðji elsti bærinn í Suður-Afríku. Hér borðum við hádegisverð. Síðdegis verður komið til Höfðaborgar og strax haldið í skoðunarferð um borgina. Ekið verður í gegnum elstu borgarhlutana, frá Góðrarvonarkastala eftir Heerengracht og Adderley stræti, fram hjá Groote Kerk kirkjunni og Menningarsafninu.

Gist fjórar nætur á hóteli í Höfðaborg.

  • Morgunverður
  • Hádegisverður

1. október | Frjáls dagur í Höfðaborg

Í dag gefst tími til þess að slaka á og njóta dvalarinnar í Höfðaborg. Mögulegt er að bæta við skoðunarferðum t.d. til Robben eyjunnar. Þar má m.a. finna fangelsið þar sem Nelson Mandela var fangi megnið af þeim 27 árum sem hann var fangelsaður fyrir baráttu sína gegn aðskilnaðarstefnunni. Ef veðrið og útsýnið er gott er tilvalið að fara í ferð með kláfi upp á Borðfjallið (Table Mountain). Fjallið er aðalkennileiti Höfðaborgar og þegar himinn er heiður er frábært útsýni þaðan yfir borgina og út á haf.

  • Morgunverður

2. október | Góðrarvonarhöfði

Eftir morgunverðinn höldum við í dagsferð að Góðrarvonarhöfða (Cape of Good Hope). Ekið verður eftir ströndinni í gegnum úthverfin Clifton, Camps Bay, Llandudno og Hout Bay sem er miðstöð fiskiðnaðar á svæðinu. Leiðin liggur eftir Chapman‘s Peak Drive með fallegu útsýni út yfir Atlantshafið. Við höfðann gefst kostur á að ganga upp að vitanum og njóta stórkostlegrar sýnar yfir hafið þar sem áður var talið að ylvolgt Indlandshafið og ískalt Atlantshafið mættust. Þetta svæði hefur verið svikulur staður fyrir mörg skipin sem hafa sokkið hér. Ferðin að Góðrarvonarhöfða mun seint gleymast en náttúrufegurð hvítra stranda Atlantshafsins láta engan ósnortinn. Við höldum áfram til Simon‘s town og snæðum hádegisverð í þessu fallega sjávarþorpi. Einnig verður áð í mörgæsanýlendu á Boulders Beach þar sem finna má hundruð mörgæsa. 

  • Morgunverður
  • Hádegisverður

3. október | Stellenbosch – vínræktarhéruð

Nú liggur leið okkar í dagsferð um hjarta vínræktar við Höfðaborg þar sem ekið verður í gegnum stórbrotna fjallgarða og vínekrur. Við höldum til næstelstu borgar landsins, Stellenbosch, en hún er þekkt fyrir byggingar frá tímum hollensku landnemanna og risastór eikartré. Bærinn var stofnaður árið 1679 og er vínhefð svæðisins nánast jafngömul. Hér eru mörg heimsþekkt vínhéruð og því margt í boði í fyrri vínsmökkun dagsins. Því næst verður haldið áfram yfir Helshoogte skarðið til bæjarins Franschhoek en saga hans nær aftur til 18. aldar þegar franskir húgenettar mættu á svæðið. Þessi heillandi bær er oft kallaður sælkerahöfuðborg Suður-Afríku. Hér förum við í vínsmökkun og síðan er tilvalið að njóta sögufrægrar matreiðslukunnáttu kokka Franschhoek á einum af margverðlaunuðu veitingastöðum bæjarins. Höldum til baka til Höfðaborgar og um kvöldið snæðum við kveðjukvöldverð á veitingastað. 

  • Morgunverður
  • Kvöldverður

4. október | Heimferð frá Höfðaborg

Frjáls tími fram eftir degi. Síðdegis verður haldið á flugvöllinn í Höfðaborg. Brottför með næturflugi til London kl. 18:40 að staðartíma og lendum við í London kl. 5:50 næsta dag, 5. október. Flugið til London tekur rúmar 12 klst.

  • Morgunverður

5. október | Heimferð frá London

Lent í London kl. 5:50 um morguninn. Flogið áfram heim kl. 7:10 að staðartíma og áætluð lending í Keflavík kl. 9:20. 

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Björk Håkansson

Björk Håkansson er fædd á Íslandi um hásumar árið 1967 og hefur alla sína ævi verið á faraldsfæti, fyrst með foreldrum sínum og síðar á eigin vegum, svo ekki sér fyrir endann á.

Fyrir rúmum þrjátíu árum fór Björk fyrst til Mið-Austurlanda og settist á skólabekk í Amman í Jórdaníu. Þar með voru línurnar lagðar hvað varðar reglulega búsetu, samskipti og samstarf við arabaheiminn.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Póstlisti

Skrá á póstlista