Útivist á Costa Brava ströndinni
6. - 13. maí 2024 (8 dagar)
Glæsileg útivistarferð á Costa Brava sem er án efa ein af fallegustu ferðamannaströndum á Spáni. Costa Brava ströndin teygir sig frá landamærum Frakklands í rúmlega 200 km suður og óspilltar sandvíkur, stórbrotin klettaströnd og veðurbarðir tangar setja svip sinn á þessa gullfallegu strönd. Svæðið býður upp á frábærar gönguleiðir utan alfaraleiða, sumir segja þær bestu í Katalóníu. Við munum þræða sólríka strandstíga og einn daginn förum við á rafhjólum um best varðveittu miðaldabæi Empodà svæðisins. Þar má meðal annars nefna bæinn Pals en hann hefur haldið miðaldaútliti sínu afar vel, er staðsettur ofan á hæð og byggður utan um virki. Stórbrotin fegurð mætir okkur á leiðinni milli Sant Pol og Platja d‘Aro strandanna og í Tossa de Mar sameinast fjöll, sléttur og sjálft Miðjarðarhafið um að gera svæðið að algjörum gimsteini. Við förum í dagsferð til glæsilegu borgarinnar Girona en Girona mætti líkja við konfektkassa af söfnum, galleríum og gotneskum kirkjum.