Gengið í Portofino & Cinque Terre

Í dag fylgjum við skemmtilegum göngustíg sem liggur utan í höfðanum til nágrannabæjarins Portofino. Leiðin liggur í gegnum bæinn og fyrir ofan hann má sjá garðrækt bæjarbúa en þar njótum við einstaklega fagurs útsýnis yfir Tigullio flóann. Vegurinn liggur niður að Parodi ströndinni og þaðan áfram eftir hrífandi leið í hina rómuðu Portofino vík. Hér liggja glæsilegar snekkjur alls staðar að úr heiminum við bryggju. Gengið verður upp fyrir bæinn og alla leið fram á fremstu brún skagans þar sem viti bæjarins trónir, en þaðan er fagurt útsýni yfir Lígúríuhafið og Portofino. Eftir góðan tíma í bænum göngum við með fram glæsilegri ströndinni á fallegum göngustíg aftur til baka, en einnig verður hægt að fara með bát til baka á hótelið.  Kvöldverður á eigin vegum.

• Hækkun: u.þ.b. 200 m.
• Göngutími: u.þ.b. 4 klst. + 1 klst. ef gengið er til baka. 

Gangan í dag hefst í fjallaþorpinu Ruta, sem er í 250 m hæð fyrir ofan Camogli. Þangað förum við með strætisvagni. Gengin verður óskaplega falleg leið um skóginn, upp í 500 m hæð yfir sjávarmáli en þaðan er glæsilegt útsýni yfir Camogli, Paradísarflóann og allt til Genova. Við höldum svo áfram yfir höfðann þar til útsýnið opnast í austur yfir Tigulio flóann. Síðan fer að halla undan fæti og við komum niður á enda skagans þar sem frægi bærinn Portofino liggur við lokaða vík. Farið verður til baka með báti eða strætisvagni. Kvöldverður á eigin vegum

• Hækkun: u.þ.b. 250 m.
• Göngutími: u.þ.b. 4,5 klst. 

Í dag munum við heimsækja hin einstöku þorp Cinque Terre. Eftir stutta lestarferð komum við til bæjarins Monterosso al Mare sem er í Cinque Terre þjóðgarðinum. Garðurinn er sem fyrr segir á heimsminjaskrá UNESCO sökum einstakra menningarminja. Við höldum áfram með lest á milli þorpanna en endum svo daginn á því að ganga á milli Corniglia og Vernazza en göngustígurinn liggur í klettahlíðum um falleg vín- og sítrónuræktarlönd. Gera má ráð fyrir allt að 30 € aukakostnaði á mann þennan dag í almenningssamgöngur og aðgangseyri í þjóðgarðinn. Kvöldverður á eigin vegum.

• Göngustígarnir eru oft og tíðum þröngir og stór hluti þeirra tröppur.
• Hækkun: Gangan á milli Corniglia og Vernazza er um 250 m upp og sama niður og tekur um 2 klst. 
• Langur dagur! 

Í dag slökum við á og njótum þess sem hótelið og nágrenni þess hefur upp á að bjóða. Áhugasamir geta farið á ströndina, kíkt í heillandi búðirnar í bænum eða á kaffi- og veitingahús. Hugguleg sólarverönd er við hótelið og sundlaug fyllt með sjó þar sem hægt er að láta gönguþreytu liðinna daga líða úr sér. Kvöldverður á eigin vegum.

Dagurinn byrjar með stuttri lestarferð yfir til bæjarins Camogli sem er staðsettur vestan megin við Portofino skagann. Camogli hefur verið fiskimannabær frá miðöldum og er einn sérstakasti bærinn í Ligúríu þar sem tengslin við sjávarnytjar eru sterk.  Húsin eru litrík, nátturufegurðin er mikil, fólkið aflappað og þar er allt hófstilltara en í nálægum bæjum, hér eru heimamenn og þeirra daglega líf í forgrunni.  Eftir að hafa skoðað þennan skemmtilega bæ nánar tökum við stefnuna upp á höfðann og eftir um 40 mínútna göngu erum við komin upp í bæjarkjarnann San Rocco. Gönguleiðin hér er ótrúlega falleg þar sem hún liggur um verndað svæði með útsýni yfir sjóinn og eftir allri ströndinni. Gengið er um í dæmigerðum miðjarðarhafsgróðri utan í höfðanum með bláan sjóinn í bakgrunni. Þegar við höldum niður á við birtist San Fruttuoso víkin sem sumir telja fallegasta staðinn við allt Miðjarðarhafið. Hér er gamalt klaustur og lítil strönd þar sem yndislegt er að hvíla sig eftir gönguna og kæla sig í sjónum. Héðan er tekinn bátur til baka til Santa Margherita Ligure. Sameiginlegur kvöldverður á hóteli.

• Góður göngustígur, tröppur upp fyrsta hlutann en síðan í gegnum skóglendi. 
• Hækkun: u.þ.b. 450 m.
• Göngutími: u.þ.b. 4 klst. 
• Lækkun u.þ.b. 500 m eftir skógarstíg

Nú er komið að heimferð en rúta ferjar hópinn út á flugvöll í Mílanó, þaðan sem flogið verður heim kl. 15:10. Lending í Keflavík kl. 17:25.