Vesen á Tenerife

Í dag ætlum við að færa okkur yfir á suðurhluta eyjunnar eða til bæjarins Los Gigantes. Á leið okkar þangað munum við ganga upp á hið fallega 171 m háa eldfjall Montaña Roja eða rauða fjallið. Þrátt fyrir að státa ekki af mjög mikilli hæð er útsýnið frá toppnum mjög fallegt og gangan upp á þetta rauða fjall ánægjuleg. Eitt af náttúruundrum Tenerife eru hinir tignarlegu Los Gigantes klettar vestan megin á eyjunni en þeir rísa upp úr sjónum og mynda allt að 600 metra háan vegg úr basaltgrýti. Klettarnir eru oft kallaðir stórbrotnasti gimsteinn Tenerife og er auðveldlega hægt að gleyma sér við að rýna í fjölbreyttar klettamyndirnar sem margar hverjar líkjast mannlegum verum. Nokkur lítil gljúfur renna niður Los Gigantes klettana í átt að sjónum og enda í litlum sandvíkum sem eingöngu er hægt að nálgast með seglbátum eða snekkjum. Í þessum afskekktu víkum er því að finna einstaklega fjölbreytt lífríki eins og svartan kóral, svampdýr og kalkþörunga og eru þessi svæði afar vinsæl á meðal kafara. Milt og þægilegt loftslagið hefur aukið þéttbýlismyndun á svæðinu og æ fleiri ferðamenn kunna að meta þessar slóðir en þetta svæði heyrir undir bæinn Santiago del Teide. Stutt er í þægilegar og góðar strendur.

• Göngutími: ca 2 klst.
• Hækkun/lækkun: +/- 160 m

Nú er komið að hápunkti ferðarinnar, göngu á eldfjallið Pico del Teide. Teide þjóðgarðurinn, sem hefur verið á heimsminjaskrá UNESCO síðan árið 2007, er sá stærsti á Kanaríeyjum og er eldfjallið þriðja hæsta eyjaeldfjall í heimi, 3715 m. Hér býðst að velja á milli u.þ.b. 5 klst. næturgöngu og upplifa þannig sólarupprás á tindinum og þess að fara með fyrsta morgunkláfnum áleiðis og ganga svo upp á tindinn. Báðir hóparnir fara aftur niður með kláfnum þegar þeim hentar. Gígur garðsins, kallaður Las Cañadas, er um 17 km í þvermál og hraunið í kringum meginkeilu eldfjallsins á rætur að rekja til síðasta eldgosins sem talið er að hafi átti sér stað á milli 7. og 10. aldar. Gengnir verða litlir misþröngir göngustígar og mikilfenglegt gljúfrarlandslag Teno fjallgarðsins og einstakt landslag gíga og hraunstrauma mynda tilkomumikið sjónarspil lita og forma. Á norðurhluta eyjunnar, Mirador Piedra La Rosa, er sérstaklega fallegur útsýnisstaður yfir svæði bergmyndana sem líkja má við rósir myndaðar úr hrauni.

• Göngutími: ca 5 klst.
• Erfiðleikastig: næturgangan er krefjandi/ferð með morgunkláf er miðlungs

Í dag ætlum við að njóta hinna stórkostlegu Los Gigantes kletta frá ólíkum sjónarhornum og fara bæði í skemmtilega bátsferð meðfram tignarlegri klettaströndinni sem og stoppa við litla sandvík og ganga þar meðfram svartri sandströndinni. Hafsbotninn í kringum klettana nær aðeins um 30 metra dýpi og er þetta svæði því heimkynni fjölmargra og ólíkra sjávardýra. Eftir árstíðum má sjá á þessu svæði hvali, háhyrninga, höfrunga, svartan kóral, svampdýr og leðurskjaldbökur. Það er því ekki að ástæðulausu að þetta svæði er vinsælt meðal kafara.

Masca gljúfrið er ein af stórbrotnari gönguleiðum Tenerife en um leið ein sú erfiðasta. Eftir að gönguhópar höfðu ítrekað lent í vandræðum var gönguleiðinni lokað árið 2018. Stjórnvöld tóku sig á og kostuðu meira en milljón evra í gagngerar endurbætur á þessari vinsælu gönguleið. Merkingar voru uppfærðar og tröppum og köðlum bætt við þar sem gönguleiðir þykja sérstaklega erfiðar yfirferðar. Gönguleið dagsins byrjar við litla friðsæla Masca þorpið á norðvestur hluta eyjunnar en íbúafjöldi þess telur eingöngu um 100 manns. Þorpið er fagurlega staðsett í 650-800 m hæð og vel fram á sjöunda áratug síðustu aldar var eingöngu hægt að komast fótgangandi eða með asna að þorpinu. Til baka verður gengið niður gljúfrið og um leið njótum við stórkostlegs útsýnis yfir Atlantshafið. Þessi hlykkjótta gönguleið frá Masca þorpinu niður gljúfrið heillar marga
göngugarpana enda ægifagurt landslagið, allt að 600 metra háir klettar, sægræn gljúfur og sérkennilegar bergmyndanir, allt um kring. Masca gljúfrið er afar gróðursælt en á vegi okkar verða möndlu- og fíkjutré sem og döðlupálmar og kaktusar. Villta fjallageitin hefur einnig fundið sitt búsvæði í gljúfrinu.

• Göngutími samtals yfir daginn: ca 5 klst.
• Hækkun/lækkun: +1400m/-160m

Síðasta morguninn er upplagt að nýta í rólegheit, rölta um bæinn og njóta sólarinnar. Brottför með Icelandair frá Tenerife kl. 14:50. Lent er í Keflavík kl. 20:10.