Aðventa

Aðventa

 

Aðventutöfrar í Tíról


27. nóvember - 4. desember 2012     2 SÆTI LAUS!
Fararstjóri: Sigrún Valbergsdóttir
 

Aðventuljómi Austurríkis er heillandi. Jólaljósin og ilmurinn af brenndum möndlum og hnetum kemur okkur í jólaskap og fegurð Alpanna umvefur okkur. Eftir flug til München byrjum við á því að fá okkur hressingu í miðborginni, en síðan verður ekið til Seefeld í Tíról sem er í 1180 m hæð á milli Wetterstein-, Mieminger- og Karwendel-fjallanna og er með þekktustu ferðamannabæjum Tíróls. Gistum þar í 7 nætur. Þaðan verður farið í skemmtilegar skoðunarferðir, m.a. til tónlistarborgarinnar Salzburgar sem er ein af perlum landsins, komið til Garmisch-Partenkirchen í Þýskalandi og í bæinn Mittenwald, sem á sér engan líkan, með sínum litlu myndskreyttu húsum, bæjarlæk og skemmtilegum verslunum. Ekin verður falleg leið yfir Brennerskarðið til Brixen í Suður-Tíról á Ítalíu. Einnig verður komið til Wattens, þar sem er mjög fallegt Swarovski safn og verslun. Síðast en ekki síst heimsækjum við hina heillandi miðaldaborg Innsbruck, höfuðborg Tíróls þar sem er glæsilegur aðventumarkaður. Í ár verða ævintýri Grimm-bræðra í hávegum höfð á aðventunni í Innsbruck og mun leikhúsvagn leiða gesti og gangandi inn í ævintýraveröld þeirra við eina elstu götu borgarinnar.
 


 

Aðventudýrð í Dresden


30. nóvember - 7. desember 2012
Fararstjóri: Kristín Jóhannsdóttir
 

Aðventan er heillandi tími til að sækja Þýskaland heim. Ljósadýrðin gefur þessum árstíma birtu og yl og ilmur af jólaglöggi, brenndum möndlum og hnetum kemur öllum í jólastemningu. Glæsileg ferð sem hefst með flugi til Frankfurt. Þaðan er ekið til Eisenach, þar sem þeir Martin Luther og Johannes Sebastian Bach eru fæddir og gistum þar í 2 nætur. Heillandi borg með Wartburg-virkinu, sem telst til merkustu miðaldavirkja landsins og líflegum jólamarkaði. Nú verður haldið til Dresden, með viðkomu í Weimar, sem skipar stóran sess í þýskri sögu, Weimarlýðveldið og stjórnarskrá millistríðsáranna varð til í borginni og er kennd við hana. Dresden, höfuðborg Saxlands, tekur nú á móti okkur. Borgin sem á 15. öld varð aðsetur Wettiner-furstanna, þeirra afkomandi var Ágúst sterki sem átti stóran þátt í að gera Dresden að þeirri fallegu borg sem var kölluð „Flórens við Saxelfi“. Gistum þar í 4 nætur. Einnig verður komið til Meissen sem er sérstaklega þekkt fyrir Meissen-postulínið, eitt elsta og verðmætasta postulín í Evrópu, en þar er líka einn af fegurstu jólamörkuðum Þýskalands. Ferðinni ljúkum við í barokkborginni Fulda þar sem gist verður síðustu nóttina.

 


 

Aðventuprýði í Prag


1. - 8. desember 2012     UPPSELT!
Fararstjóri: Hólmfríður Bjarnadóttir
 

Aðventan og stjörnudýrð hennar, töfrandi jólaskreytingar, ilmur frá brenndum möndlum og jólaglögg kemur okkur í jólastemningu í heillandi ferð til lista- og menningarborgarinnar München í Þýskalandi og gullborgarinnar Prag í Tékklandi. Flogið verður til München þar sem gist verður í 2 nætur í miðborginni og farið í skemmtilega skoðunarferð um þessa töfrandi borg. Við skoðum fagrar byggingar, kirkjur og söfn, heimsækjum jólamarkaði og njótum aðventustemningar á kaffi- og veitingahúsum borgarinnar. Þá höldum við til Prag. Á leiðinni verður stoppað í Pilsen hjá Pilsener Urquelle bjórverksmiðjunni, farið í mjög skemmtilega skoðunarferð um safnið, borðað létt snarl og drukkinn bjór. Prag tekur á móti okkur í allri sinni dýrð. Menning, listir og dulúð miðalda setja svip sinn á þessa fallegu borg sem iðar af mannlífi og fögur mannvirki prýða borgina, þ.á.m. Karlsbrúin, Hradčany kastalinn og Stjörnuklukkan. Hægt er að sækja tónleika og listasöfn eða skoða litskrúðugar verslanir þar sem hægt er að kaupa hinn fræga kristal. Gistum í 4 nætur á hóteli í miðborg Prag. Endum þessa skemmtilegu ferð á að gista eina nótt í miðborg Regensburg, gömlu rómversku borginni með 2000 ára sögu, en borgin er á heimsminjaskrá UNESCO.

Lesa meira >>

 
 


 

Tengdar ferðir