Dólómítar & Gardavatn

Dólómítarnir eru án efa einn frægasti fjallgarður Alpanna. Stórbrotin náttúrufegurð, sögulegt mikilvægi og sérstæð menning eru ástæður þess að fjallgarðurinn var tekin á heimsminjaskrá UNESCO. Nú ætlum við að eiga glæsilegan dag í bænum St. Ulrich í dalnum Val Gardena (Grödner dal) sem rómaður er fyrir fegurð og heimsþekktur fyrir tréútskurðarlistaverk. Einnig er hann fæðingarbær Sigurðar Dementz óperusöngvara og kennara, leikarans Luis Trenker og popp tónskáldsins Giorgio Moroder. Eftir ljúfan tíma þar verður farið með kláf upp á Seiser Alm sem er hæsta hálendisslétta Evrópu og tilheyrir Dólómítum Ítalíu. Það er ekki að undra að hluti Everest kvikmyndarinnar hafi verið tekin upp á þessum slóðum. Upplifum þar stórkostlegt útsýni yfir Alpafjöllin sem eru í senn róandi og endurnærandi. Við gefum okkur góðan tíma til að rölta þar um og auðvitað fáum við okkur hressingu og njótum tilverunnar.

Við munum eiga góðan morgunn á Plose fjalli í dag, heimafjalli þeirra í Brixen sem er 2542 m á hæð. Hótelið býður öllum með kláf upp á fjallið þar sem náttúrufegurðin umvefur okkur og ómótstæðilegt útsýni er þaðan yfir Eisackdalinn og Alpafjöllin. Fáum okkur létta göngu uppi og njótum friðsældar og fjallanna í allri sinni dýrð. Einnig er upplagt að fá sér hádegishressingu áður en farið er til baka. Það sem eftir er dags gefst frjáls tími til að njóta sælunnar í Brixen. Upplagt er að skoða bæinn betur og líta inn á kaupmenn bæjarins sem geta verið ansi líflegir. Einnig er hægt að nota þá glæsilegu aðstöðu sem hótelið býður upp á.

Eftir morgunverð kveðjum við Brixen eftir góðan tíma og höldum á næsta áfangastað ferðarinnar, bæinn Riva del Garda, sem tekur á móti okkur við hið sægræna Gardavatn. Bærinn stendur á fallegum stað í skjóli fjalla við vatnið og er einn vinsælasti ferðamannastaður svæðisins. Þarna munum við gista í fimm nætur á góðu hóteli. Á leiðinni verður ekið um Sarcha dalinn (Valle del Sarca) og stoppað í Dro þar sem verður áð í skómarkaði áður en ekið verður á hótelð okkar. Sameiginlegur kvöldverður á veitingastað.

Dagurinn verður rólegur en að loknum morgunverði förum við fótgangandi í stutta skoðunarferð um bæinn Riva del Garda. Að henni lokinni er frjáls tími til að skoða sig um í þessum snotra bæ, ganga um litlar og þröngar götur hans, staldra við í verslunum, rölta undir pálmatrjám með fram ströndinni eða upp að Bastillione virkinu en þar er einstakt útsýni yfir vatnið. Einnig er kjörið að njóta aðstöðunnar á hótelinu, annaðhvort við sundlaugina á þakgarðinum eða í heilsulindinni, þar sem er gufubað og slökunarrými. Kvöldverður á eigin vegum.

Farið verður í ljúfa siglingu á Gardavatni. Haldið verður til Limone, eins fallegasta bæjarins við vatnið og staldrað við dágóða stund. Þaðan verður siglt yfir sægrænt Gardavatnið til Malcesine sem er sögufrægur ferðamannabær við austurströnd vatnsins. Í Malcesine gefum við okkur góðan tíma, fáum okkur hressingu og skoðum okkur um í bænum. Áhugasamir geta farið með kláfi upp á Monte Baldo, hæsta fjallið við Gardavatn, en aðrir geta litið inn í mjög áhugaverðan gamlan kastala sem er að finna í bænum. Siglt til baka til Riva del Garda. Kvöldverður á eigin vegum.

Árla dags verður ekin undurfögur leið með Gardavatni að austanverðu í gegnum mörg falleg þorp að bænum Garda við Gardavatnið en þar er mjög skemmtilegur og líflegur útimarkaður í dag. Bærinn er yndislegur og upplagt er að fá sér hádegishressingu þar áður en ekin verður hraðbrautin til baka. Eftir það er hægt að nota tímann í slökun og rólegheit í Riva del Garda og skoða sig betur um í þessum heillandi bæ. Einnig er hægt að fara í skemmtilega göngu með ströndinni til næsta bæjar, Torbole, sem er enn einn hrífandi bærinn við vatnið. Þeir hressustu geta gengið upp í Santa Barbara kapelluna sem er í 625 m hæð yfir bænum. Kvöldverður á eigin vegum.

Nú verður ekið til Veróna, elstu borgar Norður-Ítalíu, og er þetta einn hápunktur ferðarinnar. Veróna er borg menningar og lista en frægust er hún sem sögusvið leikrits Shakespeare um Rómeó og Júlíu. Farið verður í skoðunarferð um borgina og staldrað við helstu staði þessarar merku borgar. Þar má nefna þriðja stærsta hringleikahús veraldar, Arena, og Kryddtorgið en þar stendur fjöldi fagurra bygginga og minnisvarða. Allur miðbær borgarinnar eins og hann leggur sig er skráður á heimsminjaskrá UNESCO og ekki að ástæðulausu. Eftir skoðunarferðina um borgina verður gefin frjáls tími til að fá sér hressingu og kanna líf bæjarbúa. Sameiginlegur kvöldverður á veitingastað.

Eftir þessa ljúfu og viðburðarríku daga verður ekið út á Malpensa flugvöll í Mílanó. Brottför þaðan kl. 17:00 og lending í Keflavík kl. 19:15 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Brixen - Hotel Gruner Baum
Riva del Garda - Grand Hotel Riva