Feneyjar, Flórens & Róm

Við hefjum daginn á heimsókn í Lárentínusarkirkjuna, en þar er að finna Medici kapelluna, grafhýsi sem ber vitni um mikilfengleika og listræna sýn Medici fjölskyldunnar. Grafhýsið var hannað og byggt af ítalska listamanninum og arkitektinum Michelangelo. Eftir að hafa skoðað verk hans þar höldum við til Galleria dell‘Accademia, sem er eitt af frægari listasöfnum á Ítalíu. Hér stendur hin goðsagnarkennda stytta, Davíð, einnig eftir Michelangelo, sem tákn fullkomnunar í höggmyndalist endurreisnartímans. Á safninu er einnig að finna mörg önnur áhugaverð verk sem sýna þróun ítalskrar listar og mótuðu menningu Evrópu. Að lokinni skoðunarferð okkar um listræna arfleið Flórens borgar gefst kærkomið tækifæri til að ganga um götur miðborgarinnar.

Hver kannast ekki við snillinga á borð við Leonardo da Vinci, Michelangelo, Botticelli, Galileo Galilei, Dante og Machiavelli? Allir mörkuðu þeir spor sín í menningar- og listasögu Flórens. Í Santa Maria Novella er elsta apótek Evrópu sem er áhugavert að skoða og ekki má gleyma glæsilegustu höll borgarinnar, Palazzo Pitti, ásamt hinum yndislega Boboli garði að baki hennar. Einnig er heimsókn í Galleria degli Uffizzi listasafnið ógleymanleg. Safnið, sem er eitt glæsilegasta listasafn landsins, var áður stjórnsýsluhús en er nú málverkasafn með 4.500 verkum sem sýna þróun menningar í Flórens og málaralistar í Feneyjum. Fyrir þá sem sem vilja heimsækja Uffizzi safnið mælum við með að fólk kaupi sér miða á vefnum tímanlega. Kaupmenn borgarinnar eru á sínum stað og leggja sitt af mörkum til að gera þetta að ógleymanlegum degi.

Við höldum nú í aðra áhugaverða lestarferð, að þessu sinni til Rómar. Ferðin tekur um eina og hálfa klukkustund og við njótum heillandi landslags Toskana héraðsins þar sem vínekrur og lítil þorp líða hjá eins og í málverki. Við komum okkur fyrir á góðu hóteli miðsvæðis í Róm og um það leyti sem dagurinn hnígur og borgin klæðist gullnum skugga, höldum við í notalega gönguferð um nágrennið. Hér opnast Róm okkur eins og kvikmynd frá fortíðinni. Við byrjum á því að ganga að Trajanusar-súlunni og Minnismerki Viktors Emanúels, síðan þræðum við okkur inn í miðborgina, að Pantheon hofinu og til Treví-brunnsins, stærsta barokkbrunni borgarinnar. Hin þekkta kvikmynd, La Dolce Vita, gerði brunninn að alþjóðlegu tákni rómantíkur og ítalskrar menningar. Þessari ógleymanlegu stund ljúkum við svo við Spænsku tröppurnar og hverfinu í kringum verslunargöturnar Via del Corso og Via dei Condotti, þar sem við finnum sjarmann af áhugaverðum veitingastöðum og iðandi mannlífi sem hefur heillað margan listamanninn og kvikmyndastjörnurnar.

Í dag förum við í heillandi og áhrifaríkt ferðalag í gegnum söguna. Við hefjum för okkar á heimsókn í hið stórbrotna hringleikahús, Colosseum, þaðan sem skoðunarferðin heldur áfram í gegnum Rómartorgin, Foro Romano, og alla leið upp á Palatínhæð, þangað sem má rekja hið goðsagnarlega upphaf hins forna Rómarveldis. Við göngum áfram hjá leikhúsi Marcellusar, Teatro Marcello, og í gegnum gamla gyðingahverfið, Ghetto, allt til Blómatorgsins, Campo dei Fiori, þar sem fáum okkur verðuga hressingu á einhverjum af þeim fjölmörgu veitingastöðum sem umkringja hinn líflega og rómaða útimarkað við torgið. Sameiginlegur kvöldverður á veitingastað.

Í dag heimsækjum við helga staði kristninnar og Vatíkansins. Við hefjum daginn á heimsókn í Vatíkansafnið, þar sem okkar bíður einstök upplifun frammi fyrir stórbrotnum veggmyndum meistara Rafaels og Michelangelos í Sixtínsku kapellunni. Héðan höldum við áfram í Péturskirkjuna, þar sem við höldum áfram að skoða heillandi meistaraverk ólíkra tíma. Við ljúkum skoðunarferðinni með því að ganga niður að Castel Sant´Angelo, grafhýsi Hadrianusar keisara, þar sem við förum yfir Tíber-fljót á Ponte Sant'Angelo brúnni og inn á Piazza Navona torgið. Að loknum hádegisverði gefst góður tími til að njóta „borgarinnar eilífu“ á eigin spýtur. Hér erum við í hjarta miðborgarinnar þar sem sagan býr við hvert fótmál og ariktektúr borgarinnar spannar yfir 2500 ár. Fyrir utan fornar byggingar má sjá kirkjur og kapellur, hallir, leikhús, torg og minnismerki byggð með einkennandi stíl endurreisnartímans og barrokktímabilsins. Hægt er að skoða nánar þær perlur sem við höfum kynnst nú þegar eða rölta um og njóta líðandi stundar.

Nú er komið að heimferð eftir glæsilega og viðburðaríka ferð. Brottför frá Rómarflugvelli er kl. 15:45 og lending í Keflavík kl. 18:35 að staðartíma.

Athugið að fararstjóri getur fært til dagskrárliði eftir þörfum þegar komið er á staðinn.

Í ferðinni er gist á vönduðum fjögurra stjörnu hótelum í hjarta borganna sem við heimsækjum. Öll kappkosta þau sig við að bjóða gestum sínum upp á úrvals þægindi og þjónustu, ásamt því að vera innan seilingar við helstu kennileiti, verslanir, veitingastaði og aðra nauðsynlega þjónustu.

• Feneyjar – Hotel Cavalletto & Doge Orselo
• Flórens – Hotel Atlantic Palace
• Róm – Hotel Rome Times