Litadýrð í Lissabon & Porto

Á þessu ljúfa degi ætlum við að heimsækja ævintýralega bæinn Sintra en þar finnst manni eins og tíminn hafi staðið kyrr. Lord Byron lýsti þessu fallega portúgalska þorpi sem dýrðlegum Edengarði, kannski vegna gróðursins í kringum það, mosaþöktum steinum eða kröftugum vínviðarplöntum sem vefja sig um trjágróðurinn. Sintra er kominn á heimsminjaskrá UNESCO vegna menningarlegra og sögulegra auðlegða, minja og fjölbreytttra byggingarstíla. Við skoðum okkur um í bænum og skoðum höllina Quinta da Regaleira sem reist var í upphafi 20. aldar. Eftir það verður ekið í heillandi þorpið Cascais, einn vinsælasta áfangastaðinn við portúgölsku ströndina. Cascais er þekkt fyrir þröngar, fallegar götur, aðlaðandi strendur og ríka sögu sem gamalt sjávarþorp. Hér verður frjáls tími til að fá sér hádegishressingu á veitingastað við ströndina og eftir það förum við í stutta göngu um bæinn til að kynnast sögu og menningu bæjarins. Kvöldverður á eigin vegum.

Eftir góðan morgunverð verður stefnan tekin á borgina Évora en gamli hluti hennar er á heimsminjaskrá UNESCO fyrir fjölbreytta og listræna byggingarstíla mismunandi tímabila. Við röltum um gamla bæinn og heimsækjum rómönsk-gotnesku dómkirkjuna Catedral de Nossa frá 12. öld sem vekur athygli fyrir sína tvo ósamhverfu turna. Borgin hefur að geyma ótrúlega merkar og fallegar byggingar eins og gamla háskólann og beinakapelluna Capela dos Ossos þar sem veggir og loft kirkjunnar eru þakin mannabeinum. Eftir skemmtilega skoðunarferð verður frjáls tími til að njóta borgarinnar á eigin vegum áður en ekið verður á hótel. Um kvöldið fáum við svo að njóta Fado kvölds, klassískrar portúgalskrar tónlistar ásamt kvöldverði á einu af veitingahúsum borgarinnar.

Nú kveðjum við fallegu borgina Lissabon eftir ljúfa daga og stefnan verður tekin á háskólaborgina Coimbra þar sem gist verður í eina nótt. En á leiðinni þangað ætlum við að staldra við í miðaldavirkisbænum Óbidos í héraðinu Estremadura. Bærinn er þekktur fyrir vel varðveittan miðaldabæ sem er umlukinn borgarmúrum sem hægt er að ganga eftir. Óbidos ber titilinn bókmenntaborg UNESCO og hér er á hverju ári haldin alþjóðlega bókmenntahátíðin Fólio. Eftir góðan tíma hér heldur ferð áfram til litla, friðsæla bæjarins Batalha. Farið verður í skoðunarferð um fallegt klaustur sem staðsett er í bænum en eftir það verður gefin tími til að kynna sér líf bæjarbúa áður en ekið verður til gömlu háskólaborgarinnar Coimbra þar sem gist verður í eina nótt. Sameiginlegur kvöldverður.

Nú kveðjum við borgina Coimbra og höldum til Porto en á leiðinni þangað verður áð í yndislega bænum Aveiro. Hér áður fyrr héldu sjómenn frá Aveiro á ríkuleg fiskimið Nýfundnalands sem færðu borginni mikla velmegun. Í dag er Averia betur þekkt fyrir sín litlu síki sem liggja í gegnum miðbæinn og gefa borginni mikinn sjarma. Það er upplifun að rölta um Beira Mar, gamla bæinn í mynni Aveiro lónsins, þar sem falleg, litskrúðug hús í bland við saltvöruhús og síki borgarinnar láta mikið yfir sér. Hér er upplagt að fá sér hádegishressingu og njóta staðarins áður en við höldum til borgarinnar Porto þar sem gist verður í fimm nætur á góðu hóteli. Kvöldverður á eigin vegum.

Í dag förum við í töfrandi skoðunarferð um Porto. Borgin er önnur stærsta borg landsins með um 240.000 íbúa en elsti hluti hennar er nú á heimsminjaskrá UNESCO. Porto er staðsett við mynni Douro fljótsins en fyrr á öldum voru hér mörg skip kaupmanna og landkönnuða smíðuð. Porto dregur nafn sitt af púrtvíninu Porto en hér er að finna ræktunarsvæði þessa fræga púrtvíns sem er flutt út um allan heim. Borgin er þekkt fyrir fagrar barokkkirkjur, granítarkitektúr og sína frægu járnbrautarstöð frá árinu 1896. Hún þykir mikið augnayndi og er talin ein fallegasta járnbrautarstöð Evrópu en inngangur hennar er allur skreyttur flísamálverkum sem vísa í mikilvæga atburði í sögu Portúgals. Hvert sem litið er má hér finna merkar minjar eins og elstu járnbrautarbrúna yfir Douro, Ponte Maria Pia, sem var við vígsluna 1877 lengsta járnbogabrú í heimi. Brúin var hönnuð af Alexandre Gustave Eiffel, hönnuði Eiffel turnsins fræga í París. Eftir hádegi gefst svo frjáls tími á eigin vegum til að rölta um bæinn þar sem t.d. væri áhugavert að heimsækja Lello bókabúðina sem er einkar sjarmerandi. Nú eða fara upp í hinn 76 metra háa turn São Pedro dos Clérigos kirkjunnar sem býður upp á dásamlegt útsýni yfir borgina og er hennar helsta kennileiti. Sameiginlegur kvöldverður.

Ævintýri gerast enn, nú verður ekið til Pinhao í Douro dalnum en í dag ætlum við í töfrandi siglingu á Douro ánni. Áin er lífæð Portúgal og er þriðja lengsta á Íberíuskagans, u.þ.b. 900 km að lengd og þar af eru 122 km sem mynda landamæri Spánar og Portúgals. Undurfagurt landslagið fangar okkur þar sem við siglum meðfram litlum, fallegum þorpum um eitt elsta landnámssvæði Portúgals. Rakt loftslagið, í bland við loftslag Atlantshafsins, gerir svæðið afar hentugt til rætkunar á grænmeti, korni, ólífum og víni. Innan Alto Douro vínræktarsvæðisins er afmarkað svæði sem er sérstaklega hentugt til ræktunar á hinu þekkta púrtvíni Portúgala. Við endum þennan yndislega dag með smökkun á góðum vínum héraðsins. Kvöldverður á eigin vegum.

Eftir góðan morgunverð höldum við til gömlu borgarinnar Braga sem er fyrir sínar mörgu og fögru kirkjur stundum kölluð Róm Portúgals. Við skoðum okkur aðeins um áður en haldið verður til fyrstu höfuðborgar Portúgals, Guimarães, en hér fæddist konungurinn Alfonso Henriques sem frelsaði landið undan márum. Við heimsækjum Castelo de Guimarães, rómverskt kastalavirki frá 10. öld, sem er eitt það best varðveitta frá þessum tímum og er, eins og svo margar minjar og bæir á þessum slóðum, á heimsminjaskrá UNESCO. Á ferð okkar um borgina sjáum við margar litlar götur, verslanir, torgið fallega Largo da Oliveira og kirkjuna Nossa Senhra da Oliveira svo eitthvað sé nefnt. Hér gefum við okkur góðan tíma í þessum yndislega bæ til að njóta og upplagt að fá sér hressingu á Oliveira torginu. Sameiginlegur kvöldverður.

Nú er komið að frjálsum degi og um að gera að kíkja í verslanir, kaffihús eða bara njóta og slaka á. Fyrir þá sem vilja kynna sér áhugaverðar byggingar Porto er vert að nefna hina sögulegu kauphöll borgarinnar frá 1830, Palácio da Bolsa, sem er sérlega glæsilega innréttuð og átti að laða að fjárfesta til borgarinnar. Eins er mikil upplifun að skoða arabahöllina, Salão Árabe, en fyrirmynd hennar er að finna í Alhambra í Granada á Spáni. Rölt um elsta hluta borgarinnar, Ribeira, færir mann enn nær sögu þessarar fallegu borgar en hverfið er á heimsminjaskrá UNESCO. Sameiginlegur kvöldverður.

Það er komið að kveðjustund eftir ljúfa og skemmtilega ferð. Árla morguns verður lagt af stað á flugvöllin í Lissabon. Brottför frá Lissabon flugvelli er kl. 15:00 og lending í Keflavík kl. 18:25 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

• Lissabon – HF Fenix Urban Lisbon (5 nætur)
• Coimbra – verður tilkynnt síðar (1 nótt)
• Porto – Timbre Hotel Heroismo (5 nætur)