Seiðandi Sardinía & Korsíka

Eftir morgunverð verður ekið inn í Ajaccio, fæðingarborgar Napóleons Bonaparte. Þar förum við í skemmtilega og áhugaverða skoðunarferð og skoðum safnið hans Napóleons og einnig verður frjáls tími til að kanna borgina á eigin vegum. Borgin er mjög lífleg en fegurðin og veðursældin við Ajaccio flóa laðar fjölda ferðamenn að ár hvert. Jafnframt fullyrða heimamenn að þeir eigi fallegasta flóa í heimi. Mikill miðjarðarhafsblær er á bænum og standa pastellitaðar byggingar í hlíðunum milli þröngra stræta.

Einn af hápunktum ferðarinnar er á dagskrá í dag en nú verður ekið með strandlengjunni til Les Calanche de Piana en þar hafa sól, rigning og vindur sorfið sannkallaðan töfraheim stórbrotinna klettamynda í 350 m hæð yfir sjó. Við skoðum klettana í stuttri gönguferð og njótum útsýnisins yfir Porto flóann. Staldrað verður við í smábænum Porto við undurfagra vík þar sem hægt er að fá sér hressingu. Eftir það verður ekið um Spelunca gilið sem liggur milli 2000 m hárra rauðra fjallanna og áð stutt í fjallaþorpinu Evisa á leið okkar aftur á hótelið.

Nú er tilvalið að slaka á í rólegheitum við hótelið, sleikja sólina við sundlaugargarð hótelsins eða fara í gönguferð. Hægt er að fara með lest eða strætisvagni inn til Ajaccio sem er í u.þ.b. 3,5 km fjarlægð frá hóteli okkar. Mikið er af huggulegum verslunum og kaffihúsum í bænum og gaman er að rölta eftir pálmum skrýddri strandlengju bæjarins. Einnig er hægt að ganga niður að baðströndinni sem er í 600 m fjarlægð frá hóteli okkar eða nota aðstöðuna við hótelið.

Þetta verður töfrandi og skemmtilegur dagur. Við kveðjum Korsíku seinna í dag og ökum fagra leið suður til Bonifacio, einnar perlu eyjunnar sem trónir upp á 80 metra háum kalksteinskletti. Þetta er heillandi miðaldabær með mjóum götum, virkisveggjum og gömlum turnhúsum. Byrjum á að taka litla lest upp í bæinn en síðan verður farið í skemmtilega skoðunarferð og njótum þess að vera á þessum undurfagra stað. Útsýnið er ólýsanlega fallegt frá borginni á klettótta kalkströndina og þaðan yfir til Sardiníu. Eftir yndislegan tíma verður ferja tekin yfir til Santa Teresa þaðan sem ekið verður til spænsku borgarinnar Alghero þar sem gist verður fjórar nætur á hóteli.

Í dag ætlum við að eiga góðan dag í virkisbænum Alghero. Hann er norðvestan megin á Sardiníu í Sassari héraði og er vafalaust einn sá fallegasti og skemmtilegasti á eyjunni. Alghero tilheyrði um tíma konungsríki Aragons frá Spáni. Katalónar gáfu bænum þetta nafn og katalóníska er opinbert tungumál eyjarskeggja. Við höldum í skemmtilega skoðunarferð um helstu staði og að henni lokinni er upplagt að fá sér hressingu og skoða sig betur um á eigin vegum í bænum sem iðar af mannlífi. Það eru víða kóralverkstæði sem gaman er að líta inn á en borgin er víðfræg fyrir skartgripi úr rauðum kórölum.

Þessi ljúfi dagur byrjar á stuttri göngu inn í Alghero en þaðan verður farið í ævintýralega siglingu að Neptúnusar helli. Hann er meðal stórkostlegustu sjávarhella Miðjarðarhafssvæðisins og að koma þangað er einstök upplifun. Talið er að hellirinn hafi myndast fyrir um tveimur milljónum ára. Inni í honum er heillandi sjónarspil dropasteina, ljómandi hvítrar sandstrandar og risastórs neðanjarðar vatns. Eftir siglinguna er fjáls tími í Alghero fram að kvöldverði.

Í dag heimsækjum við fagra miðaldabæinn Castelsardo í Sassari héraðinu. Á leiðinni þangað verður stoppað við Roccia dell‘ Eleante, eða Fílaklettinn. Bærinn Castelardo var reistur árið 1102 af Doria fjölskyldunni frá Genúa, sem var ein sú valdmesta á sínum tíma, en þau stjórnuðu mörgum landsvæðum bæði á landi og á eyjunum í Miðjarðarhafi. Við förum í skemmtilega skoðunarferð í bænum og göngum um þröngar, litlar göturnar í elsta hluta bæjarins. Eftir skoðunarferð verður frjáls tími til að fá sér hressingu. Næst verður ekið með Capo Caccia, sem er tilkomumikill höfði á norðvesturströnd Sardiníu, en hann hefur löngum verið mikilvægt kennileiti sjófarenda við Sardínu. Hér er heillandi landslag, stórkostlegt útsýni og mikil saga en mannvistarleyfar allt aftur til seinni hluta steinaldar hafa fundist í hellunum við höfðann. Í sjónum úti fyrir eru góð veiðisvæði og það er rótgróin hefð fyrir fiskveiðum við höfðann í gegnum árþúsundir. Í lok dags heimsækjum við ólífu- og vínbónda í nágrenni Alghero.

Nú kveðjum við Alghero eftir yndislega daga. Stefnan er tekin á Costa Smeralda ströndina en á leiðinni umvefur okkur fjallafegurð Barbagía hálendisins. Þar er rík hefð fyrir hjarðmennsku og sauðfjárrækt og framleiðsla er stór þáttur í lífi þeirra sem hér búa. Hér hefur verið ræktað sérstakt sauðfjárkyn í árþúsundir og heimamenn eru mjög stoltir af Pecorino Sardo ostinum sem þeir framleiða. Við komum til bæjarins Orgosolo sem er þekktastur fyrir fjölbreytilegar veggmyndir eða Murales sem finna má á húsum bæjarins. Þessi vegglistaverk veita innsýn í daglegt líf og skoðanir íbúanna en upphafið að þessum teikningum er frá árinu 1968 þegar leiklistarhópur frá Mílanó hélt sýningu í bænum. Að skoðunarferð lokinni verður boðið upp á hádegisverð að hætti hjarðmanna með þjóðlagasöng og dansi en þessi stund er mikil upplifun og alltaf mjög skemmtileg. Við tökum síðan stefnuna á Costa Smeralda ströndina sem er rómuð fyrir fegurð, þar verður gist í tvær nætur.

Rólegheit og slökun er á dagskrá okkar í dag við Costa Smeralda ströndina. Nú er upplagt er að njóta aðstöðunnar við hótelið og baða sig í náttúrufegurð staðarins. Tilvalið er að fara í göngu með ströndinni eða taka sundsprett í sjónum.

Í kvöld kveðjum við þessa stórkostlegu eyju Sardiníu eftir ljúfa daga en framundan er skemmtilegur dagur á eyjunni. Við höldum í dagsferð eftir gullinni Costa Smeralda ströndinni, þar sem sægrænt hafið ber við sjóndeildarhringinn og loftið ilmar af macchia gróðri. Við ökum til fjallabæjarins San Pantaleo, listamannabæ með rómverskum minjum, kirkju og híbýlum hirðingja frá miðöldum sem kölluð eru Stazzi. Porto Rotondo sem er huggulegur strandbær við kyrrláta vík og eftir góða stund þar verður haldið áfram til Porto Cervo, hins heimsþekkta og vinsæla ferðamannabæjar. Porto Cervo var stofnaður árið 1962 af Karim Aga Khan IV sem lúxus sumardvalarstaður. Hér er fagurt um að lítast, kristaltær sjór og hvítar strendur með glæsilegum sumarhúsum og lúxusverslunum. Porto Cervo hefur laðað að ýmsar stjörnur yfir sumarmánuðina til að njóta bæði slökunar og skemmtunar, þar með talið meðlimi evrópskra konungsfjölskyldna. Hér gefum við okkur góðan tíma til að njóta dýrðarinnar. Það er upplagt að setjast niður, fá sér hressingu og njóta staðar og stundar. Um kvöldið verður siglt með næturferju frá Golfo Aranci til Livorno. Á ferjunni bíður okkar sameiginlegur kvöldverður. 

Morgunverður verður snæddur á skipinu áður en lagt er að bryggju í hafnarborginni Livorno á Ítalíu. Við byrjum á að koma við í yndislega bænum San Gimignano en hann er á heimsminjaskrá UNESCO. Í San Gimignano hefur byggingarlist miðalda varðveist og þekktustu byggingarnar eru turnar sem byggðir voru af auðugum fjölskyldum á miðöldum til að þær gætu sýnt veldi sitt. Upprunlega voru turnanir 72 en þeir sem eftir standa setja mikinn svip á þorpið, enda er það stundum kallað Manhattan miðalda. Það er víðfrægt fyrir sitt ágæta hvítvín, Vernaccia di San Gimignano, sem hefur verið framleitt síðan á 13 öld. Og hér er einnig besti ís í heimi, að mati heimamanna. Því næst verður haldið til sögufrægu borgarinnar Arezzo í Toskana héraði þar sem miðaldablær leikur um okkur og sannarlega má segja að þetta sé ein af listamannaborgum Ítalíu. Þar bíður okkar meðal annars glæsilega Piazza Grande torgið og dómkirkja heilags Donato. Á rölti okkar um verslunarstræti Arezzo eru áberandi verslanir gullsmiða og skartgripasala en þeim ber að þakka fyrir velmegun borgarinnar. Það verður gefin frjáls tími inn á aðaltorgi borgarinnar og er þá upplagt að fá sér hressingu og kanna borgina á eigin vegum áður en ekið verður á hótel í útjaðri borgarinnar þar sem gist verður síðustu nóttina.

Nú líður að lokum þessarar frábæru ferðar. Brottför frá Rómar flugvelli kl. 15:45 og lending í Keflavík kl. 18:35 að staðartíma.

• Marina di Grosseto – Hotel Terme Marine Leopoldo (1 nótt)
• Bastia svæðið – Hotel San Lucianu (1 nótt)
• Ajaccio svæðið – Hotel Campo dell‘Oro (4 nætur)
• Alghero svæðið – Hotel Calabona (4 nætur)
• Costa Smeralda ströndin – nánari upplýsingar síðar (2 nætur)
• Næturferja frá Aranci til Livorno (1 nótt)
• Arezzo – BW Etrusco Arezzo Hotel (1 nótt)