Norður-Írland - land sagna & söngva

Þennan dag hefjum við á því að heimsækja nyrsta odda Írlands, Inishowen skagann, þar sem Atlantshafið mætir villtri strandlengjunni og grænum hæðum. Falinn gimsteinn þar sem auðvelt er að stíga út úr amstri dagsins og inn í heim kyrrðar og náttúrufegurðar. Við kíkjum við í litla sjávarþorpinu Moville, þar sem litlir bátar vagga í höfninni og lífið virðist ganga í rólegum takti. Héðan liggur svo leiðin norður til Malin Head, þar sem útsýnið yfir hafið er stórbrotið og vindurinn ber með sér sögu og söng sjávarins. Síðdegis höldum við svo aftur til Derry en borgin gegndi lykilhlutverki í átökum Norður-Írlands. Í Bogside hverfinu má sjá frægar veggmyndir segja sögu „Bloody Sunday“ og öðrum mikilvægum atburðum. Borgarmúrinn, sem umlykur gamla hluta Derry, er einn best varðveitti borgarmúr Evrópu og býður upp á einstaka gönguleið með útsýni yfir borgina. Gamli bærinn er heillandi en þar má finna litríkar götumyndir, verslanir, kaffihús og menningarstofnanir sem endurspegla bæði fortíð og framtíð þessarar merku borgar.

Eftir morgunverð höldum við yfir í Donegal sýslu, þar sem fyrsti viðkomustaður dagsins er Glenveagh þjóðgarðurinn, eitt fegursta náttúruverndarsvæði Írlands. Í hjarta garðsins og við bakka Lough Veagh stendur Glenveagh kastali, umvafinn viktoríönskum görðum og stórbrotnu landslagi. Hér mætast saga, náttúra og ró í ógleymanlegri upplifun með útsýni yfir Derryveagh fjöllin sem gnæfa yfir svæðið í kring. Þjóðgarðurinn er sannkölluð paradís fyrir náttúruunnendur. Hér má finna heimkynni einnar stærstu rauðdýrahjarðar landsins og fjölbreytt vistkerfi sem spannar allt frá skógi vöxnum dölum og kristaltærum vötnum til háfjalla með sjaldgæfum plöntum og dýralífi. Glenveagh er ekki aðeins fagurt svæði til að skoða, heldur einnig mikilvægt fyrir náttúruvernd og fræðslu. Hér sameinast saga, náttúra og friðsæld í einstaka upplifun. Gist verður tvær nætur í bænum Donegal.

Dagurinn hefst með ferð um gróskumikla dali og skógi vaxið landslag þar sem fallegu þorpin Ardara og Glenties blasa við, sannkölluð perla í faðmi stórbrotinna fjalla. Frá Killybegs, stærstu og líflegustu fiskihöfn Írlands, heldur ferðin áfram til Slieve League Cliffs, sem eru magnaðir sjávarhamrar sem teljast meðal þeirra hæstu í Evrópu. Fyrir áhugasama er hægt að fara með litlum rútubílum frá Teelin upp að hamraveggnum og þeir sem kjósa geta gengið síðustu kílómetrana, auðveld og stórkostleg gönguleið með víðáttumiklu útsýni yfir úfið Atlantshafið. Frá hæsta punkti eru 609 metrar niður í hafið, mögnuð sjón. Upp úr hádegi er haldið aftur til Donegal, þar sem gefst tími til að rölta um sögufrægan bæinn, skoða handverk, verslanir og njóta afslappaðrar stemningar áður en snúið er aftur á hótel.

Eftir morgnunverð kveðjum við Donegal og ökum í gegnum fallegt landslag með viðkomu í bæjunum Enniskillen og Cavan, þar sem grænar hæðir og vötn mynda rólega og fallega umgjörð. Ferðin heldur áfram suður á bóginn og síðdegis er komið til Dublin, líflegu höfuðborgar Írlands. Við komu í borgina hefst stutt kynningarferð um helstu kennileiti áður en haldið er til St. Patrick’s dómkirkjunnar, meistaraverks miðaldabyggingarlistar. Þar starfaði hinn mikli rithöfundur Jonathan Swift og kór kirkjunnar söng einmitt frumflutning Messíasar eftir Händel, tónlistarlegur minnisvarði sem enn lifir í anda staðarins. Eftir viðburðarríkan dag er kvöldið frjálst. Gist er í tvær nætur á hóteli miðsvæðis, þar sem stutt er í fjölbreytt úrval góðra veitingastaða og kráa og hægt að njóta ýmissa menningarviðburða. Kvöldverður á eigin vegum.

Dagurinn hefst með skoðunarferð um Dublin, hinni þúsund ára gömlu höfuðborg Írlands. Borgin sameinar sögulegar og nútímalegar byggingar, vatnaleiðir, brýr og græna almenningsgarða sem gefa henni einstakan karakter. Við sjáum helstu kennileiti borgarinnar og fáum innsýn í ríka sögu og þróun hennar í gegnum aldirnar. Eftir skoðunarferðina gefst frjáls tími til að njóta og kynnast þessari líflegu borg á eigin vegum. Upplagt er að rölta um Grafton Street, eina líflegustu götu Dublin. Þar má heyra tónlist frá fjölmörgum götutónlistarmönnum, skoða verslanir eða setjast niður og njóta í rólegheitum. Um kvöldið er haldið á Merry Ploughboy Pub, nálægt Dublin, þar sem kvöldið er helgað kveðjukvöldverði með tónlist og skemmtun. Í hlýlegu og írsku umhverfi njóta gestir góðs matar, lifandi tónlistar og menningarlegrar upplifunar sem fangar anda Írlands á einstakan hátt.

Nú er þessari skemmtilegu ferð um Norður-Írland að ljúka. Brottför frá Dublin flugvelli er kl. 12:15 og lending í Keflavík kl. 13:55 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

• Belfast – Holiday Inn City Centre
• Derry – Holiday Inn Hotel
• Donegal – Villa Rose Hotel
• Dublin – Camden Court Hotel Dublin City Centre