Alpadýrð í Sviss

Í dag njótum við þessa að dvelja í yndislega bænum okkar Davos. Fyrir áhugasama er úrval heilsulinda í bænum, veitingastaða sem bjóða upp á skemmtilega svissneska rétti eins og fondue, raclette og rösti eða kaffihús þar sem ljúft er að setjast niður og skoða mannlífið. Það er gaman að rölta um borgina, hér eru mörg falleg hús frá Belle Époque tímabilinu sem var áratugina fyrir fyrri heimsstyrjöld. Þá blómstruðu listir, arkitektúr og hönnun og þá sér í lagi Art Nouveau stíllinn sem þykir afar klassískur og fagur. Hér er gnægð vatna á blómlegum alpasléttum og yfir okkur gnæfa tindarnir Jakobshorn, Parsenn og Schatzalp. Það er mögulegt að taka kláfa upp á Jakobshorn og Parsenn, staldra við á veitingastað og njóta þaðan útsýnis yfir Alpana allt um kring. Það eru einnig margar miserfiðar gönguleiðir um nágrennið, í átt að Schatzalp og Jakobshorn eða í kring um Davos vatnið þar sem hægt er að setjast á kaffihús og slaka á í fallegu umhverfi.

Við byrjum daginn á skoðunarferð um Chur, elstu borg Sviss, en talið er að þar hafi verið samfelld búseta í yfir 5000 ár. Í gamla bænum Altstadt eru litlar steinilagðar götur, þröng húsasund, litrík hús, gosbrunnar og bæjarhlið frá miðöldum. Það er eins og að ferðast aftur í tímann að ganga um þennan merkilega bæ sem er fullur af menningu og listum. Héðan verður farið í glæsilega lestarferð upp í svissnesku Alpana. Við ferðumst um alpadali, skógi vaxið fjalllendi, í gegnum göng og yfir fallegar bogabrýr. Við komum í fjallaþorpið Arosa, sem er umlukið ósnortnum vötnum, furuskógum og tindum. Það er gaman að rölta í gegnum þorpið, setjast inn á kaffihús eða njóta sín við Obersee vatn. Rétt fyrir ofan þorpið er fallegur útsýnisstaður, Weisshorn, en þangað er hægt að komast með kláfi.

Í dag komum við í eitt minnsta ríki heims, Liechtenstein, en það liggur á milli Sviss og Austurríkis og er um 160 ferkílómetrar. Höfuðborgin er hin smáa Vaduz og yfir henni trónir Vaduz kastali. Þar býr prinsinn Hans-Adam II af Liechtenstein. Ríkið er mjög vel stætt og þekkt fyrir bankastarfsemi, viðskipti, hátækniiðnað og ekki síst fyrir fríverslun, sérstaklega í höfuðborginni Vaduz. Eftir skoðunarferð um Vaduz höldum við leið okkar áfram í Rínardalinn sem gjarnan hefur verið kallaður Stóra gljúfur Sviss. Hér eru hrikalegir klettar, gljúfur, gil, skörð, bugðóttar og beljandi ár, furuskógar og lítil þorp í hlíðum. Við komum í Viamala Gorge sem er allt að 300 metra hátt og hefur í gegnum aldirnar verið kallað Hinn illi vegur. Við enda 19. aldar sáu rómantísk skáld og heimsspekingar eins og Nietzsche og Fontane fegurðina í þessarari hrikalegu náttúru. Í þeirra augum voru töfrar í því að upplifa náttúruna út frá smæð mannsins og það er sannarlega hægt að upplifa þessa tilfinningu hins háleita á þessum stað.

Í dag er fjölbreyttur dagur framundan. Við ökum úr einstakri alpadýrð á leið okkar gegnum fjallaskörðin og dalina í átt til ítölskumælandi svæðisins Ticino. Á leið okkar verður miðaldakastalinn Bellinzona sem eitt sinn stóð vörð um aðalleiðirnar til Alpanna og skyldi að norður og suður Sviss. Smátt og smátt breytist landslagið frá sígrænum skógum, sléttum og snævi þökktum fjallstoppum yfir í vínekrur, pálmatré og hlýnandi miðjarðarhafsblæ. Við komum í bæinn Locarno sem liggur við norðurenda Maggiore vatns sem er eitt það fallegasta í Sviss. Efst á hæð fyrir ofan bæinn stendur kirkjan Madonna del Sasso en hún var viðkomustaður pílagríma á leið þeirra um Sviss. Hér er dásamlegt útsýni yfir bæinn og vatnið. Það eru mikil ítölsk áhrif í þessum bæ, húsagerðarlist, menning, kaffihús og blómleg torg. Við skoðum einnig perlu Maggiore vatns, litríka þorpið Ascona sem var kosið svissneska þorp ársins 2025. Hér var áður mikil bátaútgerð en í dag er þorpið vinsæll staður til að slaka á, njóta menningar, lista og veitinga, rölta meðfram vatninu innan um pálmana eða fylgjast með sólsetrinu.

Nú er komið að lokum í þessari dásamlegu ferð um Alpana í Sviss að landamærum norður Ítalíu. Eftir snemmbúinn morgunverð höldum við af stað til Zürich en þaðan verður flogið kl. 14:00 og lending í Keflavík kl. 16:00 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Hotel Seehof Davos 5*