Páskar í Toskana & Assisi

Við hefjum daginn á góðum morgunverði áður en farið verður í göngu inn í miðbæ Viareggio. Þetta er hrífandi bær, einna helst frægur fyrir glæsilegu karnival hátíðina sem haldin er ár hvert. Á 19. öld hóf aðallinn í Evrópu að sækja hér að ströndinni og er það upphafið að þeirri ferðaþjónustu sem bærinn byggir á í dag. Tákn bæjarins er turninn Torre Matilde og út frá honum óx gamli bærinn. Hér er hægt að njóta þess að fara á fallega strönd og kíkja í fínar verslanir, á kaffihús og veitingastaði. Einnig er hægt að fara í gönguferð með ströndinni eða taka það rólega og nota aðstöðuna við hótelið.

Ljúfur dagur byrjar á morgunverð en eftir það verður ekið til Rapallo við ítölsku rivíeruna. Þar verður farið í skemmtilega siglingu með fram Portofino skaganum sem dregur nafn sitt af bænum fræga Portofino sem við komum til með að njóta í allri sinni dýrð. Upplagt að fá sér hressingu þar og kanna líf bæjarbúa sem er litríkt og skemmtilegt.

Það er alltaf svo yndislegt að koma til borgarinnar Pisa sem er þekktust fyrir skakka turninn á torginu, Piazza dei Miracoli. Bygging turnsins hófst árið 1173 og var þessum frístandandi klukkuturni, sem tilheyrir dómkirkjunni í Pisa, ætlað að standa lóðrétt en eftir byggingu annarrar hæðar hans tóku undirstöður turnsins að síga. Turninn er eitt af þremur mannvirkjum á Campo dei Miracoli eða Kraftaverkatorginu í Pisa. Við höldum í góða skoðunarferð um svæðið en eftir það er tími til að kanna staðinn á eigin vegum og fá sér hressingu.

Nú kveðjum við Viareggio eftir yndislega daga. Nú er komið að einum hápunkti ferðarinnar. Það eru fáar borgir sem komast í hálfkvisti við Flórens. Hver kannast ekki við snillinga á borð við Leonardo da Vinci, Michelangelo, Botticelli, Galileo Galilei, Dante og Machiavelli en allir mörkuðu þeir sögu borgarinnar. Flórens er höfuðborg Toskanahéraðs og liggur á hásléttu rétt sunnan við Appenínafjöllin. Farið verður í skoðunarferð og að henni lokinni gefst fólki tækifæri til að upplifa borgina eftir eigin hentisemi, skoða áhugaverð kennileiti enn frekar, fara á söfn eða kynna sér framboð fjölmargra verslana eða veitingastaða borgarinnar. Eftir glæsilegan dag verður ekið fögur leið til Assisi í Umbria héraði. Þar verður gist næstu fjórar nætur á hóteli sem er staðsett í 500 metra hæð yfir sjávarmáli fyrir utan Assisi og býður upp á víðáttumikið útsýni yfir bæinn Assisi, dalinn og dásamlega umhverfið. Á hótelinu er heilsulind og upphituð innisundlaug.

Við ökum stutta leið að helga staðnum Assisi sem er yndislegur virkisbær frá miðöldum í miðju Umbria héraði og er bærinn á heimsminjaskrá UNESCO. Hér var heilagur Frans frá Assisi fæddur sem var predikari og boðaði meinlætislíf og höfnun veraldlegra gæða. Hann stofnað hér reglu heilags Frans og reglu heilagrar Klöru frá Assisi. Við förum í skoðunarferð um Assisi og að sjálfsögðu skoðum við kirkjurnar San Francesco og Santa Chiara og eftir það verður góður tími til að skoða sig um og kanna líf bæjarbúa á eigin vegum. Eftir það verður ekið á hótelið okkar.

Í dag gefst góður tími til þess að njóta líðandi stundar. Andrúmsloftið í Assisi er gjarnan friðsælt og þar sameinast saga trúar og menningar. Margar götur gamla miðbæjarins eru eingöngu ætlaðar gangandi vegfarendum. Á rölti um bæinn gefur að líta byggingarlist miðalda og falleg torg í bland við verslanir, veitinga- og kaffihús. Bærinn er byggður á hæð og þaðan er falleg sýn yfir landslag Umbria héraðs sem umlykur bæinn. Boðið er upp á akstur frá hótelinu inn í Assisi en það þarf að melda sig kvöldinu áður.

Nú verður haldið til höfuðborgarinnar Perugia sem er ekki aðeins sú stærsta, heldur einnig ein fallegasta borg Umbria héraðsins. Borgin er staðsett í 450 m hæð en þaðan er frábært útsýni yfir á Apenninefjöllin og þorpin í kring um Lago Trasimeno vatnið. Farið er upp í borgina með rúllustiga en hún er ein af fornu virkisborgunum og ber þess enn merki. Perugia var ein öflugasta borg Etruskan heimsveldisins á 6. öld f.Kr. Hjarta borgarinnar er torgið Piazza Grande með brunninum Maggiore. Við förum í skoðunarferð um borgina en að henni lokinni verður tími til að fá sér hressingu og líta inn í verslanir borgarinnar á vinsælu göngugötunni Corso Vannucci. Eftir góðan tíma þar verður ekið til baka á hótlið.

Nú kveðjum við Assisi eftir yndislega daga. Við leggjum snemma af stað og nú verður stefnan tekin á flugvöllinn í Róm. Brottför heim til Íslands kl. 15:45, áætluð lending í Keflavík er áætluð kl. 18:35 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

• Viareggio – Palace Hotel
• Assisi – Grand Hotel Assisi