Alpafegurð & Portorož

Þennan góða dag er tilvalið að slaka á í Filzmoos fram undir hádegi og kanna umhverfið í þessum litla bæ. Um hádegi verður boðið upp á ferð með hestakerru upp að Unterhofalm selinu sem er við rætur Bischofsmütze fjallsins en þar er náttúrufegurðin óviðjafnanleg. Þar byrjum við á því að fara í smá göngu um Almsee vatnið og upp að kapellu. Síðan er upplagt að fá sér hádegishressingu og njóta fegurðar staðarins áður er haldið verður til baka.

Við yfirgefum Austurríki og ökum til Portorož í Slóveníu eða Rósahafnarinnar svokölluðu, þar sem gist verður í sex nætur. Á leiðinni þangað verður ekið að Bled vatni í Slóveníu sem er með fegurstu perlum Alpanna en þar höldum við í siglingu út í eyjuna Blejski Otok. Þar er hugguleg Maríukirkja með frægri óskabjöllu og landslagið draumkennt. Auðvitað verður tími til að fá sér hressingu og njóta náttúrufegurðar staðarins áður en ekið verður til Portorož. Á hótelinu okkar er inni- og útisundlaug og einkabaðströnd.

Í dag ætlum við að njóta þess að vera á þessum fagra stað og kanna umhverfið saman. Tilvalið er að nýta sér frábæra aðstöðu hótelsins til afslöppunar en einnig er skemmtilegt að ganga eftir ströndinni eða taka sér sundsprett í Adríahafinu.

Á dagskránni í dag er heimsókn til Króatíu sem tekur á móti okkur í allri sinni dýrð. Við ökum til Rovinj, listamannabæjar við Istríaströndina en þar úti fyrir eru 22 eyjar, stærst þeirra er eyjan Sveta Katharina og sést hún vel frá gamla bænum. Við höldum í göngu upp að kirkju heilagrar Euphemiu en þaðan er glæsilegt útsýni yfir þessa litríku, gömlu borg. Einnig munum við ganga niður listamannagötuna og um elsta hluta bæjarins. Tími gefst til að kanna umhverfið og fá sér jafnvel svaladrykk. Á heimleiðinni verður komið við í Pazin þar sem við snæðum léttan málsverð hjá vínbónda.

Nú verður ekið til Koper, fallegs bæjar og einu hafnarborgar Slóveníu. Koper er ein af borgunum sem byggðar voru upp af Feneyjarveldinu og er Titov torgið með hertogahöllinni og borgarturninum skýrt dæmi um stórveldið. Eftir stutta gönguferð verður gefinn frjáls tími til að fá sér hressingu og líta inn í stóra verslunarhúsið sem er aðeins fyrir utan elsta hluta bæjarins.

Frá Portorož gefst áhugasömum tækifæri á að sigla til sjávarþorpanna Izola og Piran, sem eru sannkallaðar perlur Istríastrandarinnar. Í Izola stígum við í land í stuttan tíma en höldum svo ferðinni áfram til Piran, yndislegs bæjar sem áhugavert er að skoða. Þar fæddist fiðluleikarinn og tónskáldið Tartini en minnisvarði um hann stendur á hinu glæsilega Tartini torgi. Eins er gaman að skoða Georgskirkjuna sem stendur tignarleg á fallegum stað við ströndina.

Rólegheita dagur í Portorož og nú er upplagt að nota aðstöðuna við hótelið eða fara í göngu með strandlengjunni, jafnvel yfir til Piran. Í bænum kennir einnig margra grasa menningar- og mannlífs, sem gaman er að kynna sér í rólegheitunum.

Nú er komið að því að kveðja Slóveníu eftir dásamlega daga. Eftir morgunverð verður stefnan tekin á Mílanó en á leiðinni þangað verður stoppað í hrífandi bæ við suðurenda Gardavatns, Sirmione. Þar gefum við okkur góðan tíma til að skoða áður en ekið verður út á flugvöll í Mílanó. Brottför þaðan kl. 23:00 og lent í Keflavík kl. 01:15 að staðartíma 7. ágúst.

Fararstjóri getur fært dagskrárliði á milli daga eftir þörfum þegar komið er á staðinn.