Haustlitir í Svartaskógi

Við hefjum daginn á ferð til dásamlegu borgarinnar Heidelberg sem er svo sannarlega ein af fallegustu borgum Þýskalands. Þessi borg á bökkum árinnar Neckar er ein elsta háskólaborg landsins og ber miðbærinn þess glöggt merki með sögulegum byggingum, mikilfenglegri dómkirkju og Heidelberg höllinni sem gnæfir tignarlega yfir borgina. Eftir að hafa skoðað nægju okkar af markverðustu stöðunum gefst tími til að njóta borgarinnar á eigin vegum áður en haldið verður aftur til Oberkirch.

Í dag gefst hverjum og einum tækifæri til að haga deginum að vild. Oberkirch er lítill og huggulegur bær en áin Rench rennur í gegnum hann. Hér á einu sólríkasta svæði Svartaskógar er mikil ávaxta- og vínrækt umhverfis bæinn. Það er einstaklega notalegt að rölta um í rólegheitunum og njóta þess að vera í þessu fagra umhverfi. Einnig mætti kíkja á kaupmenn eða skoða mannlífið á einu af kaffihúsum bæjarins.

Léttur og skemmtilegur dagur er fyrir höndum. Ekin verður falleg leið inn í næsta dal og þjóðgarðurinn í Renchtal heimsóttur. Hér erum við umvafin töfrum Svartaskógar, hrífandi gönguleiðum og varla hægt að hafa það betra. Farið verður í stutta og þægilega göngu í kringum lítið stöðuvatn sem kallast Mummelsee, í 1.036 metra hæð. Þaðan er stórkostlegt útsýni yfir Svartaskóg og alla leið að Vogesen fjöllunum í Frakklandi. Djúpt í þessu vatni búa vatnaálfar í stórri höll og margar þjóðsögur tengjast þeim. Síðar ökum við til borgarinnar Baden Baden sem titluð var sumarhöfuðstaður Evrópu en á árum áður hittist hér hástéttin í spilavíti borgarinnar eða spásseraði um skrúðgarða til að sýna sig og sjá aðra í sumarorlofi sínu. Í borginni eru heitir hverir með u.þ.b. 68° heitu vatni og rústir rómversks baðhúss frá 2. öld e.Kr. Eftir stutta göngu um þennan fagra bæ verður frjáls tími til að kanna líf bæjarbúa á eigin vegum.

Að loknum morgunverði munum við aka eftir vínslóðinni í Alsace, einu þekktasta vínhéraði heims. Við þræðum ótal falleg smáþorp með heillandi bindingsverkshúsum, eins og Barr og Ribeauvillé og heimsækjum fallega og rómantíska bæinn Obernai, sem ákaflega gaman er að staldra við í og kynna sér nánar. Að sama skapi látum við hrífast af einstökum ævintýrablæ bæjarins Riquewihr, sem er með vinsælli ferðamannabæjum svæðisins. Bærinn er staðsettur í hjarta héraðsins, býr yfir einstökum arkitektúr og hefur staðið í nánast óbreyttri mynd síðan á 16. öld. Á svæðinu fer fram háklassa vínrækt svo afurðin drýpur af hverju strái.

Nú kveðjum við Svartaskóg og Alsace héraðið eftir góða daga. Að morgunverði loknum verður lagt af stað út á flugvöll og flogið heim kl. 14:00. Lending í Keflavík er kl. 15:45 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Hotel Renchtalblick