Bled vatn & króatískar strendur

Þennan dag ætlum við að njóta þess að vera á þessum undurfagra stað. Tilvalið er að nýta sér aðstöðu hótelsins til afslöppunar og einnig er dásamlegt að ganga með fram Bled vatninu.

Nú kveðjum við dásemdina við Bled vatn og tökum stefnuna á Istríaskagann í Króatíu. En á leiðinni þangað verður stoppað í Ljubljana, höfuðborg Sóveníu og stærstu borg hennar, sem telst ein grænasta og líflegasta höfuðborg Evrópu. Borgin er hrífandi og Ljubljanica áin rennur um hjarta hennar. Þar verður farið í skemmtilega skoðunarferð og eigum við frjálsan tíma til að fá okkur hressingu áður en ekið verður suður til Poréc í Króatíu sem er yndislegur bær við Istríaströndina en þar verður gist í sex nætur á góðu hóteli. Á hótelinu er gott útisvæði með sundlaugum og sólbekkjum. Einnig er þar heilsulind með saunum, nuddpotti og hvíldarsvæði og hægt að bóka sér ýmsar heilsumeðferðir gegn gjaldi.

Umhverfið er dásamlegt og við njótum þess á skemmtilegri göngu eftir ströndinni inn í miðbæ Poreč, sem er einn elsti bærinn við ströndina. Farið verður í stutta skoðunarferð um þennan yndislega bæ sem skartar marmaralögðum götum og fögrum byggingum. Þar er að finna áhugaverða basilíku sem kennd er við himnaför Maríu. Hún er frá 6. öld og var skráð á heimsminjaskrá UNESCO árið 1997. Auðvelt er að finna skemmtilegar verslanir, þar á meðal fjölmargar skartgripaverslanir. Eftir skoðunarferðina verður frjáls tími til að kanna líf bæjarbúa og fá sér hressingu.

Skemmtilegur dagur í Króatíu sem byrjar á því að aka fagra leið um Istríaskagann. Á leiðinni verður stoppað fyrir ofan Limski Canal en þar þrengir fjörðinn svo mjög að hann minnir heldur á skurð. Síðan verður ekið til Rovinj í Króatíu. Rovinj er yndislegur, litríkur listamannabær við Istríaströndina sem iðar af mannlífi. Hér verður farið í stutta skoðunarferð um elsta hluta bæjarins, gengið verður upp að barokkkirkju heilagrar Euphemíu en þaðan er glæsilegt útsýni yfir eyjarnar og gamla bæinn. Úti fyrir Rovinj eru 22 eyjur, stærst þeirra er eyjan Sveta Katharina og sést hún vel frá gamla bænum. Einnig munum við halda niður listamannagötuna. Eftir góðan tíma þar verður ekið til Pazin þar sem vínbóndi verður sóttur heim og borðaður hjá honum léttur hádegisverður. Þar verður eflaust sungið og trallað.

Nú verður ekið til litla bæjarins Fazana en þaðan verður farið í skemmtilega siglingu út í eyjuna Veliki Brijuni, sem er stærsta eyja Brijuni eyjaklasans úti fyrir Istríaströndinni. Eyjaklasinn samanstendur af 14 eyjum en þar er ótrúleg náttúrufegurð og gróðursæld. Tító, einræðisherra Júgóslavíu, fundaði hér á árum áður með valdamestu kommúnistaleiðtogum heims og þá var það ekki á færi margra að vera boðið á þennan eðalstað. Sjálfur dvaldi hann oft og tíðum hér með merka gesti víðsvegar að úr heiminum. Upphafið að fjölskrúðugu dýralífi eyjunnar er frá tímum Tító en m.a. má finna muflon sauðfé, sebrahesta, lamadýr og fíla svo eitthvað sé nefnt. Eyjan var opnuð almenningi árið 1983 eftir dauða Títós. Við höldum í fróðlega skoðunarferð um eyjuna en hér má til að mynda sjá mjög áhugavert myndasafn frá tíma Títós í einni villu eyjunnar.

Pula er stærsta og elsta borgin á Istríaskaganum. Hún á sér viðburðaríka sögu en með því að fullkomna samspil rómverskrar menningar, fallegra baðstranda og nútíma ferðaþjónustu laðar bærinn til sín ferðamenn alls staðar að úr heiminum. Frægust er borgin fyrir forna hringleikahúsið frá tímum rómverska heimsveldisins í Króatíu en borgina prýða einnig glæstar byggingar frá tímum Habsborgaraveldisins. Hér ætlum við að dvelja góða stund, skoða og fræðast ásamt því að njóta dásamlegs umhverfis við ströndina.

Í dag verður rólegur dagur í Poreč. Upplagt er að fara í göngu með ströndinni og kanna betur líf bæjarbúa. Einnig eru í boði töfrandi siglingar frá höfninni í Poreč m.a. inn í Limski Canal.

Nú er komið að því að kveðja Slóveníu og taka stefnuna á hina fornu háskólaborg Padua á Ítalíu. Borgin er sérlega lífleg og andrúmsloftið afslappað. Áður en farið verður á hótelið tökum við stutta göngu um borginni með innlendan leiðsögumann í broddi fylkingar og fræðumst um viðburðaríka sögu einnar elstu borgar Ítalíu. Margar glæstar byggingar prýða borgina, þ.á m. Basilíka heilags Antoníusar, risastóra torgið Prato della Valle og glæsilega höllin Palazzo della Ragione á markaðstorginu. Eftir góðan tíma verður haldið á hótel þar sem gist verður tvær síðustu næturnar.

Í dag ætlum við að eiga frjálsan dag í Padua. Upplagt er að njóta borgarinnar á eigin vegum, fá sér hressingu og líta inn á kaupmenn borgarinnar sem eru fjölmargir. Kvöldverður á eigin vegum.

Það er komið að heimferð eftir góðan morgunverð og ljúfa ferð. Nú er stefnan tekin á flugvöll í Feneyjum. Brottför þaðan kl. 16:10 og lending í Keflavík kl. 18:50 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Salzburg – Hotel Europa Austria Trend
Bled - Rikili Balance Hotel
Porec - Hotel Valamar Diamant
Padua - Hilton Garden inn Padova City center