Hjarta Ítalíu - Umbria & Toskana

Nú eigum við rólegan dag í Passignano Sul Trasimeno. Tilvalið er að fara í gönguferð við vatnið eða í gamla bæinn en þar er hægt að fara upp í turninn á Rocca di Passignano miðaldavirkinu og njóta þar stórkostlegs útsýnis yfir vatnið, eyjarnar og sveitir Umbria héraðs. Þessi litli bær er einstaklega heillandi og gaman er að rölta um götur bæjarins, setjast inn á lítil kaffihús og kíkja í áhugaverðar handverksverslanir.

Þessi ljúfi dagur hefst í fallega bænum Orvieto í Umbria héraði sem byggðist upp á flötum móbergsstapa, umkringdur vínekrum og ólífutrjám. Bærinn er frægur fyrir stórkostlega dómkirkju frá 13. öld, Pozzano di San Patrizio brunninn frá 16. öld og hvítvínið sem er af mörgum talið eitt besta hvítvín landsins. Farið verður í stutta skoðunarferð um gersemar bæjarins og síðan er upplagt að fá sér hressingu. Háborg miðaldana í Toskana héraði, Montepulciano, er næst á dagskrá. Hún hvílir á kríthvítri hæð þar sem dalirnir Val d‘Orcia og Val die China mætast. Allt um kring, hvert sem litið er, blasa við vínakrar, þetta er fullkomið landslag fyrir póstkort. Við ljúkum deginum með vínsmökkun og snarli.

Kveðjum Passignano Sul Trasimeno eftir yndislega daga og tökum stefnuna á Marche héraðið en á leiðinni þangað verður áð í Pesaro við Adríahafsströndina. Pesaro er þekktastur fyrir að vera fæðingarstaður Gioachino Rossini og er vinsæll ferðamannastaður. Gullnar náttúrustrendur og fjölmargar sögulegar byggingar prýða borgina og gaman er að rölta um litrík torgin. Þá verður haldið til Gradara en miðalda borgarmúrinn sem umlykur borgina og kastalinn eru þeir best varðveittu á Ítalíu. Virkisveggirnir voru oft leiksvið bardaga sem voru háðir á milli kirkjuríkisins og íbúa Marche héraðs. Gradara er einnig þekkt fyrir sorgarsögu elskenda, sem þjóðskáldið Dante skrifaði um í Hinum guðdómlega gleðileik. Hér verður farið í skemmtilega skoðunarferð um þennan yndislega bæ. Eftir það verður ekið til Gabicce Mare þar sem gist verður í fjórar nætur á hóteli við ströndina. Á hótelinu er sundlaug og heilsulind. Gabicce Mare er heillandi strandbær við Adríahafið sem þekktur er fyrir hreinar, gylltar sandstrendur.

Í dag er spennandi ferð á dagskrá. Við ætlum að heimsækja elsta lýðveldi í heimi, San Marínó, smáríkið sem er í 643 m hæð yfir sjó við jaðar Apenninafjalla. Náttúrufegurðin umvefur borgina sem hringar sig upp fjallið Monte Titano en hæsti tindur þess er 749 m. Þar tróna þrír kastalar á toppi fjallsins og útsýnið yfir héraðið er ægifagurt. Hér er margt að upplifa, tilkomumiklar og virðulegar byggingar setja mikinn svip á borgina og á göngu um smáríkið verða m.a. á vegi okkar stjórnarhöllin, Basilica di San Marino og kastalinn La Rocca, að ógleymdum virkisveggjunum. Síðdegis verður haldið til kastalabæjarins San Leo sem stendur á háum kletti. Útsýnið eitt og sér er þess virði að leggja leið þangað. Í miðbæ San Leo gefst frjáls tími til að skoða sig um og eins er hægt að skoða virki bæjarins en þar er í dag safn.

Eftir ys og þys undanfarinna daga er kærkomið að slaka á við hótelið, kanna umhverfið og rölta niður í líflegan miðbæ Gabicce Mare.

Eftir góðan morgunverð verður stefnan tekin á hina fornu borg Cervia sem er þekkt fyrir saltvinnslu sína. Saltið frá Cervia hefur verið kallað „il sale dolce“ eða hið ljúfa salt og þykir það sérstaklega hreint og gott. Á miðöldum var borgin frá náttúrunnar hendi umlukin síki sem bæði þrengdi að henni og var uppsprettan að mörgum sjúkdómsfaröldrum. Vegna þessa gaf páfinn út skipun árið 1697 að borgin skyldi færð austar og þar stendur hún í dag. Í bænum er turn sem kenndur er við heilagan Michael en turninn var reistur til að verja bæinn og verðmæta saltvinnslu hans fyrir árásum sjóræningja.

Nú er komið að heimferð eftir góða daga á Ítalíu. Lagt verður snemma af stað út á flugvöll í Róm. Brottför er þaðan kl. 16:20 og áætluð lending í Keflavík kl. 19:10 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

• Lake Trasimeno – Hotel Villa Paradiso
• Cabicce Mare – Hotel Sans Souci