Strandperlur Eystrasaltsins

Í dag ætlum við að kynnast Rügen aðeins betur. Eyjan er rómuð fyrir sínar fögru strendur og hvíta kalksteinskletta við Jasmund þjóðgarðinn og þar ber hæst Königsstuhl kletturinn, sem einn og sér er næg ástæða til að heimsækja Rügen. Á leið okkar um Rügen sjáum við Prora, reist af nasistastjórninni og sennilega eitt umdeildasta mannvirki Þýskalands. Byggingin, sem er um 4,5 km á lengd, var hönnuð sem sumardvalarstaður fyrir um 20 þúsund manns og aðhylltust nasisma. Sturluð framkvæmd, sem á sér enga hliðstæðu í sögunni. Prora náði lítið að sanna notagildi sitt því síðari heimsstyrjöldin braust út á svipuðum tíma og byggingu búðanna lauk. Sameiginlegur kvöldverður á hóteli.

Eftir góðan morgunverð höldum við yfir til Stralsund. Þessi fagra borg sem stendur við Eystrasaltið byggðist að stórum hluta á tímum Hansakaupmannaveldisins og var mikilvæg verslunarmiðstöð á tímum Hansasambandsins og varð hluti af Sænsku Pommern eftir Vestfalíufriðinn árið 1648. Borgarbúar geta líka státað sig af fallegri höfn og skemmtilegri baðströnd. Gamli bærinn í Stralsund er á heimsminjaskrá UNESCO og þar má sjá glæsilegar gotneskar byggingar, steinkirkjur og verslunarhús sem bera vitni um gullöld borgarinnar. Söguáhugafólk kemur ekki á þessar slóðir án þess að skoða Peenemünde, staðinn þar sem Þjóðverjar þróuðu V-1 og V-2 eldflaugarnar á tímum seinni heimsstyrjaldarinnar. Þessi rólega strandbyggð varð miðstöð tæknibyltingar og hernaðarleyndar og í dag hýsir hún Peenemünde safnið sem varpar ljósi á dramatíska sögu svæðisins og áhrif þess á þróun geimferða og vopnatækni. Hægt er að fara um borð í kafbát frá síðari heimsstyrjöldinni. Sameiginlegur kvöldverður á hóteli.

Í dag gefst tækifæri til að kynnast eyjunni betur á eigin vegum. Það er t.d. stutt til Sellin sem er einn skemmtilegasti strandbærinn á eyjunni Rügen með úrvali vandaðra veitingastaða og verslana. Hér er gaman að kynnast strandmenningu sem er svo skemmtilega öðruvísi en menn eiga að venjast frá Suður-Evrópu. En einnig er hægt að njóta aðstöðunnar á hótelinu og strandarinnar. Sameiginlegur kvöldverður á hóteli.

Við kveðjum nú Rügen og ökum til eyjunnar Usedom, sögufrægrar eyju við Eystrasaltið og landamæri Þýskalands og Póllands. Eyjan er næststærsta eyja Þýskalands og er þekkt fyrir fallegar sandstrendur og strandbæi og því afar vinsæll áfangastaður ferðamanna. Skoðum Heringsdorf, þar sem Wilhelm Þýskalandskeisari sótti í náttúrufegurð og heilnæmt sjávarloft. Þarna má segja að norður-þýsk strandmenning hafi orðið til en hún rekur sögu sína aftur til 19. aldar. Strandbæjararkitektúrinn þarna er einstakur, bryggjur og gangstéttar nær upprunalegar og svo ekki sé talað um strandkörfurnar. Austasti hluti Usedom eyjunnar tilheyrir Póllandi og þangað höldum við þegar líður á daginn. Við stoppum á landamærunum Póllands megin, en þar er einn stærsti sölumarkaður Póllands. Þar er keppst um að selja allt milli himins og jarðar og gaman að sjá óvenjulegt úrval söluvarnings. Við ökum svo á hótelið okkar í strandborginni Świnoujście eða Swinemünde þar sem við borðum saman kvöldverð.

Í dag kynnumst við Świnoujście betur með heimamanni. Borgin, sem liggur á þremur eyjum Usedom, Wolin og Karsibór, fór mjög illa í síðari heimstyrjöldinni og ber þess enn merki. Við förum stuttlega í gegnum stórbrotna og átakanlega sögu Póllands og tökum stöðu mála þar í landi nú þegar yfir 30 ár eru liðin frá falli járntjaldsins. Staldrað verður við í miðborg Świnoujście þar sem menn geta fengið sér pólska pylsu og Tyskie bjór. Ströndin við Świnoujście þykir ein sú fallegasta í Póllandi. Hér má finna fjölda veitingastaða og kaffihúsa og því vel hægt að mæla með göngutúr um þessa fegurstu strönd landsins sem er rétt við hótelið okkar. Sameiginlegur kvöldverður á hóteli.

Eftir frábæra ferð er komið að heimferð. Við ökum til Berlínar en brottför frá flugvellinum í Berlín er kl. 14:05 og lending í Keflavík kl. 15:50 að staðartíma. 

Fararstjóri getur fært dagskrárliði á milli daga eftir þörfum þegar komið er á staðinn.

• Waren am Müritzsee – Seehotel Ecktannen
• Rügen – Aja Hotel
• Świnoujście – Platino Mare Spa & Resort