Suðræn sveifla við St. Tropez
5. - 17. júní 2024 (13 dagar)
Franska rivíeran eða Côte d’Azur í Provence héraðinu tekur á móti okkur í allri sinni dýrð í þessari glæsilegu ferð. Við hefjum þó ferðina í yndislega bænum Tossa de Mar við Costa Brava ströndina á Spáni sem býr yfir merkum minjum og fornum borgarmúrum í hinum dulúðlega bæjarhluta Vila Vella. Héðan förum við í töfrandi skoðunarferðir m.a. til heimsborgarinnar Barcelona, höfuðborgar Katalóníu, sem er með fegurstu borgum álfunnar. Hún er þekkt fyrir byggingar arkitektsins Gaudí en glæstar byggingar skreyta borgina hvert sem litið er. Við bregðum okkur til Figueres, fæðingarbæjar Salvador Dalí og skoðum safnið með ævintýralegu verkunum hans. Því næst bíður bærinn Sainte-Maxime eftir okkur en hann stendur við hinn hrífandi St. Tropez flóa. Sækjum heim Aix-en-Provence sem er með glæsilegustu, en einnig dýrustu, borgum Frakklands. Suðrænn blær frönsku rivíerunnar leikur um okkur í furstadæminu Mónakó sem ógleymanlegt er að sækja heim. Við upplifum töfrandi fegurð flóans einnig á siglingu til listamannabæjarins St Tropez, sem er einn frægasti bærinn við frönsku rivíeruna. Svo er alltaf ljúft að koma til Cannes sem iðar af mannlífi en bærinn er frægastur fyrir alþjóðlegu kvikmyndahátíðina sem haldin er þar ár hvert. Endum þessa glæsilegu ferð í Nice við Côte d’Azur í Provence héraði.