Gardavatn & Feneyjar

23. september - 2. október 2023 (10 dagar)

Gardavatn hefur verið einn vinsælasti áfangastaður Íslendinga til margra ára, enda meðal allra fegurstu staða á Ítalíu. Sjálfur Goethe líkti staðnum við himnaríki og skal engan undra. Við hefjum ferðina á því að aka suður á bóginn upp í stórbrotin Alpafjöllin og gistum í bænum Bolzano í Suður-Tíról þar sem líkamsleifar fjallabúans og veiðimannsins Ötzi eru varðveittar en hann lá undir ís í rúm 5000 ár. Riva del Garda tekur á móti okkur við hið sægræna Gardavatn en bærinn stendur á fallegum stað við vatnið og er einn vinsælasti ferðamannastaður svæðisins. Í ferðinni munum við fara í áhugaverðar skoðunarferðir, yndislega siglingu á Gardavatni til bæjanna Limone og Malcesine, fara til Feneyja og heimsækja Veróna, eina elstu borg Norður-Ítalíu. Við höldum til Seefeld í Tíról eftir góða daga við Gardavatn og njótum þar náttúrunnar milli hárra og tignarlegra fjalla síðustu daga ferðarinnar. Við heimsækjum Innsbruck, höfuðstað Tíról og komum við í Mittenwald, þar sem við skoðum myndskreyttu húsin í þeim huggulega bæ.

Verð á mann í tvíbýli 335.500 kr.

Aukagjald fyrir einbýli 63.600 kr.

Innifalið

  • 10 daga ferð.
  • Flug með Icelandair og flugvallarskattar.
  • Gisting í 2ja manna herbergi með baði.
  • Morgun- og kvöldverður allan tímann á hótelum.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Borgarskattur í Feneyjum € 5.
  • Aðgangseyrir inn á söfn, hallir og kirkjur.
  • Kláfar eða stólalyftur upp á fjöll.
  • Siglingar og vínsmökkun.
  • Strætisvagnaferð inn í Veróna.
  • Hádegisverðir.
  • Þjórfé.

Valfrjálst

  • Kláfur upp á Pordoi u.þ.b. € 18.
  • Sigling í Feneyjum u.þ.b. € 20.
  • Sigling á Gardavatni u.þ.b. € 15.
  • Kláfur frá Malcesine upp á Monte Baldo u.þ.b. € 22.
  • Aðgangur að hringleikahúsinu í Veróna u.þ.b. € 10.
  • Hádegisverður og vínsmökkun í Rovereto u.þ.b. € 18.
  • Kláfur upp á Rosshütte u.þ.b. € 18.

Kort af ferðinni

FerðalýsingPrenta ferðalýsingu

23. september | Flug til München & Bolzano á Ítalíu

Brottför frá Keflavík kl. 7:20. Mæting í Leifsstöð um 2,5 klst. fyrir brottför. Lending í München kl. 13:05 að staðartíma. Þaðan verður ekið upp í Alpafjöllin í gegnum Brennerskarð til Bolzano í Suður-Tíról á Ítalíu og gist þar í eina nótt á hóteli í miðbænum.

24. september | Dagur í Bolzano & Riva del Garda á Ítalíu

Nú ætlum við að eiga góðan dag í Bolzano höfuðborg Bolzano héraðsins á Ítalíu. Förum í stutta skoðunarferð um elsta hluta borgarinnar með sínum sjarmerandi göngugötum og Walthertorginu en það er nefnt eftir þýska farandsöngvaranum Walther von der Vogelweide sem var í sínum tíma þekktur um alla Evrópu. Eftir hádegishressingu væri upplagt að líta inn á fornleifasafn Suður-Tíróls en þar eru líkamsleifar frummannsins Ötzi varðveittar. Ötzi fannst í Ölpunum þar sem hann er talinn hafa legið undir ís í rúm 5000 ár og er hann því ein elsta múmía í heimi. Eftir það kveðjum við borgina og leggjum af stað til Riva del Garda við Gardavatn þar sem við munum gista í fimm nætur.  

25. september | Skoðunarferð & frjáls dagur

Dagurinn verður rólegur en að loknum morgunverði förum við fótgangandi í skoðunarferð um bæinn Riva del Garda. Að henni lokinni er frjáls tími til að skoða sig um í þessum snotra bæ, ganga litlar og þröngar götur hans, staldra við í verslunum, rölta undir pálmatrjám með fram ströndinni eða skondra upp að virkinu Bastillione þaðan sem er einstakt útsýni yfir vatnið. Einnig er kjörið að njóta aðstöðunnar á hótelinu, annaðhvort í sundlaugargarðinum eða í heilsulindinni.

Opna allt

26. september | Dagsferð til Feneyja

Fyrir höndum er langur en stórskemmtilegur dagur. Við leggjum snemma af stað og ökum til Feneyja. Á rölti um borgina, með fram síkjum og yfir brýr, verður á vegi okkar allt það sem gerir Feneyjar að eftirsóttasta ferðamannastað álfunnar. Við Canal Grande gefur að líta einar 200 glæsilegar hallir og við Markúsartorgið stendur Markúsarkirkjan, ein merkilegasta kirkjubygging veraldar, sem byggð er í austrænum stíl og minnir helst á höllina úr ævintýrinu Þúsund og ein nótt. Síðdegis mun hverjum og einum gefast tími til þess að skoða þessa fallegu borg betur, njóta mannlífsins og jafnvel líta inn á söfn. Komið verður aftur á hótel undir kvöld.

27. september | Sigling, Limone & Malcesine

Farið verður í ljúfa siglingu á Gardavatni. Haldið til Limone, eins fallegasta bæjarins við vatnið og þar áð í dágóða stund. Þaðan verður siglt yfir sægrænt Gardavatnið til Malcesine, sem er sögufrægur ferðamannabær við austurströnd vatnsins. Í Malcesine gefum við okkur góðan tíma, fáum okkur hressingu og skoðum okkur um í bænum. Áhugasamir geta farið með kláf upp á Monte Baldo, hæsta fjallið við Gardavatn, en þeir sem kjósa heldur að vera á jafnsléttu geta litið inn í mjög áhugaverðan gamlan kastala sem er að finna í bænum. Frá Malcesine verður ekið til baka á hótelið.

28. september | Dagsferð til Veróna

Dagsferð til Veróna, elstu borgar Norður-Ítalíu, er einn hápunktur ferðarinnar. Veróna er borg menningar og lista en frægust er hún sem sögusvið leikrits Shakespeare um Rómeó og Júlíu. Farið verður í skoðunarferð um borgina og staldrað við helstu staði þessarar merku borgar. Þar má nefna þriðja stærsta hringleikahús veraldar, Arena, og Kryddtorgið en þar stendur fjöldi fagurra bygginga og minnisvarða. Miðbær borgarinnar eins og hann leggur sig er á skráður á heimsminjaskrá UNESCO og ekki að ástæðulausu.

29. september | Rovereto & Seefeld

Nú kveðjum við Gardavatn og höldum til Austurríkis. Á leiðinni komum við í forna smábæinn Dro og lítum þar inn á einn stærsta skómarkað Norður-Ítalíu. Þaðan liggur leið okkar í kastala fyrir ofan Rovereto þar sem við fáum stutta leiðsögn um höllina, snæðum léttan hádegisverð að hætti íbúanna í dalnum og aldrei að vita nema við fáum smá smakk af afurðum vínbænda héraðsins. Áfram verður ekið yfir Brennerskarðið til Seefeld í Austurríki þar sem við gistum næstu þrjár nætur.

30. september | Frjáls dagur í Seefeld

Í dag tökum við það frekar rólega, hefjum daginn á staðgóðum morgunverði og höldum síðan í stutta skoðunarferð um Seefeld, sem er með eftirsóttustu ferðamannabæjum Tíról. Bærinn er umkringdur þverhníptum fjöllum en áður fyrr var hér mikið vatnasvæði og ber nafn bæjarins það með sér. Eftir stutta göngu með fararstjóranum er frjáls tími það sem eftir lifir dags. Hér er margt hægt að gera, fara með hestvagni um bæinn, ganga hringinn í kringum vatnið eftir þægilegri gönguleið eða fara með kláfi upp í Rosshütte sem er í 1.784 m hæð. Þar er að finna gott veitingahús og er upplagt að fá sér kaffi og svo sem eina tertusneið.

1. október | Dagsferð til Innsbruck & Mittenwald

Á dagskránni í dag er heimsókn til Innsbruck, höfuðstaðar Tíról, sem er umvafinn mikilli fjalladýrð. Innsbruck var ein af borgum Habsborgaranna, einnar valdamestu ættar Evrópu um aldir, og ber miðaldahluti borgarinnar þess greinilega merki. Blómatími Habsborgaranna var á 15. öld undir stjórn Maximilians I en hann lét byggja eitt helsta aðdráttarafl borgarinnar, húsið með gullþakinu, sem stendur við eitt fallegasta torgið í Tíról. Við höldum í stutta skoðunarferð um borgina en að henni lokinni verður hægt að kanna borgina á eigin vegum, líta inn til kaupmanna í Maria-Theresien-Straße eða setjast inn á kaffihús. Á bakaleiðinni verður komið við í bænum Mittenwald sem á sér engan líka en þar er að finna ótal lítil myndskreytt hús, dásamlegan bæjarlæk og skemmtilegar verslanir. Bærinn er frægur fyrir smíði strengja- og plokkhljóðfæra og stendur minnisvarði af Matthias Klotz, upphafsmanni fiðlusmíði í Mittenwald, fyrir utan fiðlusafn bæjarins.

2. október | Heimferð

Eftir indæla og skemmtilega ferð verður ekið til München. Brottför þaðan kl. 14:05 og lending í Keflavík kl. 16:00 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Sigrún Valbergsdóttir

Sigrún Valbergsdóttir er fædd í Hafnarfirði og alin upp í Reykjavík. Sem barn dvaldi hún öll sumur í Svarfaðardal en á unglingsárunum rak móðir hennar sumarhótel í Grundarfirði og þar gekk hún um beina á daginn en upp til fjalla þegar kvöldaði. Sigrún hefur verið fararstjóri hjá Bændaferðum í aðventuferðum til Þýskalands og Austurríkis, einnig í Gardavatnsferðum og gönguferðum um Austurríki, Suður-Tíról og Færeyjar. 

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir