Gardavatn & Feneyjar

Nú kveðjum við Austurríki og höldum að Gardavatni. Ekið verður yfir Brennerskarðið og leið okkar liggur til vínbónda og þar verður boðið upp á létt hádegissnarl áður en verður ekið áfram í gegn um Sarca dalinn í forna smábæinn Dro og lítum þar inn á einn stærsta skómarkað Norður-Ítalíu. Við komum til Riva del Garda við Gardavatn þar sem við munum gista í sex nætur á góðu hóteli.

Dagurinn verður rólegur en að loknum morgunverði förum við fótgangandi í skoðunarferð um bæinn Riva del Garda. Að henni lokinni er frjáls tími til að skoða sig um í þessum snotra bæ, ganga litlar og þröngar götur hans, staldra við í verslunum, rölta undir pálmatrjám með fram ströndinni eða skondra upp að virkinu Bastillione þaðan sem er einstakt útsýni yfir vatnið. Einnig er kjörið að njóta aðstöðunnar á hótelinu, annaðhvort í sundlaugargarðinum eða í heilsulindinni.

Fyrir höndum er langur en stórskemmtilegur dagur. Við leggjum snemma af stað og ökum
til Feneyja. Á rölti um borgina, með fram síkjum og yfir brýr, verður á vegi okkar allt það sem gerir Feneyjar að eftirsóttasta ferðamannastað álfunnar. Við Canal Grande gefur að líta einar 200 glæsilegar hallir og við Markúsartorgið stendur Markúsarkirkjan, ein merkilegasta kirkjubygging veraldar, sem byggð er í austrænum stíl og minnir helst á höllina úr ævintýrinu Þúsund og ein nótt. Síðdegis mun hverjum og einum gefast tími til þess að skoða þessa fallegu borg betur, njóta mannlífsins og jafnvel líta inn á söfn. Komið verður aftur á hótel undir kvöld.

Dagsferð til Veróna, elstu borgar Norður-Ítalíu, er einn hápunktur ferðarinnar. Veróna er borg menningar og lista en frægust er hún sem sögusvið leikrits Shakespeare um Rómeó og Júlíu. Farið verður í skoðunarferð um borgina og staldrað við helstu staði þessarar merku borgar. Þar má nefna þriðja stærsta hringleikahús veraldar, Arena, og Kryddtorgið en þar stendur fjöldi fagurra bygginga og minnisvarða. Miðbær borgarinnar eins og hann leggur sig er á skráður á heimsminjaskrá UNESCO og ekki að ástæðulausu.

Farið verður í ljúfa siglingu á Gardavatni. Haldið til Limone, eins fallegasta bæjarins við vatnið og þar áð í dágóða stund. Þaðan verður siglt yfir sægrænt Gardavatnið til Malcesine, sem er sögufrægur ferðamannabær við austurströnd vatnsins. Í Malcesine gefum við okkur góðan tíma, fáum okkur hressingu og skoðum okkur um í bænum. Áhugasamir geta farið með kláf upp á Monte Baldo, hæsta fjallið við Gardavatn, en þeir sem kjósa heldur að vera á jafnsléttu geta litið inn í mjög áhugaverðan gamlan kastala sem er að finna í bænum. Frá Malcesine verður siglt til baka til Riva.

Nú er upplagt að nota tímann í slökun og rólegheitum á þessum ljúfa degi í Riva del Garda. Nota aðstöðuna við hótelið eða skoða sig betur um í þessum heillandi bæ. Einnig er hægt að fara í skemmtilega göngu með ströndinni til næsta bæjar, Torbole, sem er enn einn hrífandi bærinn við vatnið. Þeir hressustu geta gengið upp í Santa Barbara kapelluna sem er í 625 m hæð yfir bænum.

Eftir indæla og skemmtilega ferð verður ekið til Mílanó. Brottför þaðan kl. 16:20 og lending í Keflavík kl. 18:35 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Seefeld - Hotel Bergland
Riva del Garda - Hotel Villa Niccoli