Hjólað í Norður-Toskana

Eftir góðan morgunverð leggjum við upp frá miðaldaþorpinu Vicopisano og fylgjum lífæð Toskana héraðs, ánni Arno, en hún er 240 km löng og rennur meðal annars í gegnum Flórens og Pisa. Hér eru fjöllin Monte Pisano á aðra hönd og áin mikla á hina. Við höldum áfram meðfram ánni fram hjá ólífulundum, vínekrum og litlum bóndabæjum í fallegu landslagi Toskana héraðs. Næst stöldrum við í borginni Pisa þar sem hinn frægi Skakki turn hefur staðið síðan á 14. öld. Hann var um 200 ár í byggingu sem hófst á seinni hluta 12. aldar. Verkið var ekki langt komið þegar turninn tók að hallast og hann var nálægt falli árið 1990 þegar miklar björgunaraðgerðir hófust. Hér við Kraftaverkatorgið, Piazza dei Miracoli, sjáum við líka dómkirkjuna sjálfa sem turninn tilheyrir, Duomo di Pisa, ásamt stærstu kapellu Ítalíu, skrúðgarði og kirkjugarði sem öll eru á heimsminjaskrá UNESCO. Við fáum tíma til að skoða okkur um áður en við höldum leið okkar áfram. Við sjáum kirkjuna San Pietro a Grado, en hún er sögð staðsett þar sem Pétur postuli kom í land frá Arno ánni og flutti sína fyrstu messu á Ítalíu. Að lokum komum við að ströndum Toskana héraðs í þorpið Marina di Pisa þar sem áin Arno fellur í Týrennahafið.

• Hjólavegalengd u.þ.b. 41 km
• Hækkun u.þ.b. 120 m
• Erfiðleikastig: auðvelt til miðlungs

Við fáum far að bænum Tavarnelle en þaðan hjólum við út í sveitir Toskana héraðs og Chianti sem einkennast af háum síprus trjám, mjóum hvítum sveitavegum, vínekrum, bóndabæjum, kastölum og miðaldaþorpum. Við komum í fallega bæinn Certaldo. Hér mætast arkitektúr frá miðöldum, litlar steinilagðar götur og torg og hið hefðbundna líf Toskana búa í bland við fallegt landslag hæðanna í dalnum Val d’Elsa. Eftir stop í þessum skemmtilega bæ höldum við áfram til eins þekktasta og fallegasta miðaldarbæjar Toskana hérðas, San Gimignano. Hann stendur á hæð milli ánna Elsa og Arabia og er stundum kallaður bær turnanna því að eitt sinn bar þar 72 turna við himinn en í dag eru um 14 eftir. Þrátt fyrir að hafa fækkað talsvert eru þeir mjög ríkjandi í ásýnd bæjarins og sjást víða að. Hér gefst tími til að kanna bæinn á eigin vegum. Í San Gimignano meðal annars framleitt eitt þekktasta hvítvín Toskana, Vernaccia og hér er frábær ísbúð, Gelateria Dondoli. Við fáum far með rútu aftur að hóteli.

• Hjólavegalengd u.þ.b. 35 km
• Hækkun u.þ.b. 390 m
• Erfiðleikastig: miðlungs

Hjólaferð dagsins er til borgarinnar Lucca sem var upprunalega byggð Etrúskumönnum og síðar Rómverjum á tímum Júlíusar Sesars. Hún er gömul virkisborg og var á 13. og 14. öld ein af valdamestu borgum Evrópu. Hér hefur sögulegur og menningarlegur andi borgarinnar elst vel og þess vegna er hún gjarnan kölluð listaborgin, Città d'arte. Við munum hjóla eftir virkisveggjunum frá miðri 17. öld og njóta stórkostlegs útsýnis yfir borgina. Hér gefst góður tími til að skoða sig um í borg hinna hundrað kirkna, sem finna má meðal annars í rómönskum, gottneskum og barrokk stíl. Þessi fjöldi skýrist af því að auðugar fjölskyldur á miðöldum og seinna, reistu kirkjur til þess að sýna veldi sitt, öðlast virðingu og sýna hollustu við almættið. Piazza dell’Anfiteatro torgið er reist á grunni rómversks hringleikahúss, þar eru skemmtileg kaffihús og bakarí. Einnig er hægt að sjá æskuheimili Puccinis en það er í dag safn um skáldið. Það er gaman að fara um gamla bæinn í Lucca og götur borgarinnar en þar er einnig að finna sérverslanir, veitinga- og kaffihús. Ekið verður til baka á hótelið í rútu.

• Hjólavegalengd u.þ.b 52 km
• Hækkun u.þ.b. 270 m
• Erfiðleikastig: miðlungs

Nú gefst tækifæri til að slaka á og njóta þessa dásamlega bæjar, Montecatini Terme. Hér eru að minnsta kosti 11 heitar uppsprettur sem nýttar eru í heilsulindir bæjarins en hann er á heimsminjaskrá UNESCO yfir merkilegustu heilsulindarbæi heims. Í bænum eru fallegir göngustígar og fjöldi grænna svæða og rétt fyrir ofan hann er miðaldaþorpið Montecatini Alto en þangað er hægt að komast með toglest. Það er upplagt að skoða sig um, líta inn í litlar, forvitnilegar verslanir og kynna sér líf bæjarbúa. Fyrir þá sem vilja skoða sig um hjólandi, þá verða rafhjólin tiltæk. Svo er alltaf hægt að slaka á og láta fara vel um sig á hótelinu og nýta góða aðstöðu þess, meðal annars heilsulindina.

Eftir notalegan frjálsan dag höldum við hjólaferð okkar áfram. Í dag njótum við fegurðar hæða og hóla í sveitum Toskana, fyrst í bænum Montecarlo en þar er frábært útsýni. Þaðan höldum við áfram í gegnum vínekrurnar í Chianti Classico þar sem vínviðurinn liðast um brekkurnar. Hér eru ótal ólífulundir og litlir bóndabæir. Seinni hluta dags komum við í litla bæinn Vinci, fæðingarbæ Leonardo da Vinci. Hér fáum við tíma til þess að skoða okkur um í bænum en í honum frábært safn um líf og starf þessa merka manns og þar er hægt að sjá teikningar, málverk og tæki sem hann fann upp. Við endum ferðina okkar á huggulegri vínsmökkun í sveitasælunni með eðalvíni og góðgæti úr héraði. Við ökum síðan aftur til baka á hótelið.

• Hjólavegalengd u.þ.b 42 km
• Hækkun u.þ.b. 360 m
• Erfiðleikastig: miðlungs

Í dag ferðumst við með rútu til litla bæjarins Signa. Við hjólum meðfram árbakkanum, í gegnum lítil þorp þar til við sjáum móta fyrir hinni fallegu Flórens, höfuðborg menningar og lista. Þar ber hæst dómkirkjan Santa Maria del Fiore, Duomo, sem var verk margra frábærra listamanna, meðal annars Filippo Brunelleschi sem hannaði og byggði hina frægu hvelfingu. Hér gefst góður tími til að skoða sig um á eigin vegum. Á torginu Piazza della Signoria er skemmtilegt safn höggmynda og í ráðhúsi borgarinnar Palazzo Vecchio er hægt að dást að fallegum veggmyndum sem fanga sögu Flórensborgar. Uffizi listasafnið stendur við ánna og hægt er komast yfir hana um hina frægu brú Ponte Vecchio. Í Oltrarno hverfinu er mikið af sérverslunum með leður, keramik, textíl og fleira. Boboli garðurinn handan árinnar er líka skemmtilegur með sínum víðáttumiklu svæðum, gróðri, tjörnum, gosbrunnum og lystihúsum. Við hjólum aftur til Signa sömu leið.

• Hjólavegalengd u.þ.b 35 km
• Hækkun u.þ.b. 180 m
• Erfiðleikastig: auðvelt

Þá er þessi frábæra ferð á enda eftir yndislega daga og skemmtilega samveru. Ekið verður til Mílanó en brottför þaðan er kl. 16:20 og lending í Keflavík kl. 18:35 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Hotel Adua & Regina di Saba - Montecatini Terme