26. september - 3. október 2024 (8 dagar)
Það er draumi líkast að ferðast um eyjaperlur Króatíu úti fyrir Kvarner flóa og kynna sér menningu og lifnaðarhætti eyjarskeggja. Fyrstu nóttina verður gist í nágrenni Feneyja en síðan ekið til Króatíu og komið til bæjarperlunnar Crikvenica. Farið verður í töfrandi ferðir, m.a. yfir á eyjuna Krk þar sem fegurðin gælir við okkur og við heimsækjum höfuðstað eyjunnar Krk, samnefnda virkisbæinn en þessi fjölsótti bær er menningarmiðstöð eyjunnar. Siglum yfir til Cres, sem er ásamt Krk stærsta eyja Adríahafsins, en Cres er tengd við eyjuna Lošinj sem er blóma- og furuparadís. Þar skoðum við yndislega bæinn Mali Lošinj með sínum þröngu, hlykkjóttu hliðargötum og dýrðlegu útsýni. Við upplifum eina af glæsilegustu náttúruleiksýningum Austur-Evrópu í vatnaþjóðgarðinum Plitvička Jezera sem er þakinn vötnum, fossum, ám og lækjum. Farið verður í draumasiglingu yfir á Rab eyjuna en íbúar hennar eru sagðir hamingjusömustu íbúar landsins. Upplifum þar einnig miðaldabæinn Rab sem talinn er einn fallegasti hafnarbær Kvarner flóans.