Útivist við Zell am See

Brottför frá Keflavík kl. 7:20 en mæting í Leifsstöð u.þ.b. 2,5 klst fyrir brottför. Lending í  München kl. 13:05 að staðartíma. Frá flugvellinum í München eru rúmir 200 km til Kaprun þar sem gist verður næstu sjö nætur á fjölskyldureknu 4* hóteli. Kaprun tilheyrir Zell am See-Kaprun svæðinu sem er eitt það vinsælasta til útivistar í austurrísku ölpunum. 

Í dag göngum við upp að Krimmler fossunum sem staðsettir eru í Hohe Tauern þjóðgarðinum. Þeir renna úr Krimmler Kees jöklinum og eru hæstu fossar Austurríkis og fimmtu hæstu fossar í heimi. Fallhæðin er 385 m og rennslið er að meðaltali 5,6 m³/sek. Farið verður með almenningsvagni til þorpsins Krimml og síðan gengið sem leið liggur upp með hinum svokallaða Wasserfallweg, fossaleiðina, upp að efsta fossinum. Leiðin er þakin þéttum alpaskóg og fagurgrænum engjum með útsýni til tignarlegra fjallstoppa. Við komum fljótlega að neðstu fossunum, þar sem nálægðin er mikil við vatnsflauminn. Við miðjufossana er fallegt útsýni yfr dalinn fyrir neðan og efst sjáum við jökulánna steypast í mikilfenglegt gljúfur. 

• Lengd: u.þ.b. 6 km
• Göngutími: u.þ.b. 2,5 klst.
• Hækkun u.þ.b. 500 m
• Erfiðleikastig: létt - miðlungs

Við hefjum göngu dagsins frá hótelinu okkar í Kaprun, þessum yndislega alpabæ, þar sem fallegir fjallakofar standa með tignarlega fjallstinda allt um kring. Við komum að Sigmund Thun Klamm gljúfrinu sem Kapruner Ache áin hefur mótað í gegnum árþúsund en gangan í gljúfrinu er einstök upplifun. Hér eru mjög öruggar en djarflega byggðar göngubrýr meðfram þröngum klettaveggjum og flaumur leysingavatns rennur til hliðar og undir. Hér er gott að vera í regnfötum. Ef vel er að gáð má sjá gljúfranorn í klettaveggnum á leiðinni. Gljúfrið, sem myndaðist á síðari hluta síðustu ísaldar, er 320 m langt og 32 m djúpt og mjög áhrifamikið. Efst við brún gljúfursins er hið fallega Klammsee vatn. Við göngum áfram upp að Maiskogel skálanum, hér er fallegt útsýni yfir Kaprun dalinn og Kitzsteinhorn jökulinn, grösug engi með villtum blómum og kýr á beit.

• Lengd: u.þ.b. 10 km
• Göngutími: u.þ.b. 3 klst.
• Hækkun: u.þ.b. 780 m
• Erfiðleikastig: létt - miðlungs

Í dag verður hjólaður hluti af geysilega fallegri leið, svokölluðum Tauern hjólreiðavegi sem í heild sinni nær yfir um 300 km frá Krimml fossum til Passau í Bæjaralandi. Leið okkar liggur frá hótelinu að hinu fagra Kitzlochklamm gljúfri, sem með sínum hrikalegu klettum og kröftugu fossum telst til fallegustu gljúfra austurrísku Alpanna. Það myndaðist við lok ísaldar þegar áin Rauriser Ache braut sér leið í gegnum bergið. Hjólaleiðin liggur að hluta til með fram ánni Salzach og á vegi okkar verða lítil þorp og ólýsanleg náttúrufegurð hvert sem litið er. Við hjólum meðal annars í gegnum tírólabæinn Bruck og fallega þorpið Taxenbach. Við gefum okkur góðan tíma til að skoða og njóta hinnar mikilfenglegu náttúru við og í kringum gljúfrið. Hjóluð verður sama leið til baka að hótelinu.

• Lengd: u.þ.b. 23 km
• Erfiðleikastig: létt - miðlungs

Í dag slökum við á og njótum þess sem hótelið og nágrenni þess hefur upp á að bjóða. Upplagt að slaka á í heilsulind hótelsins eða kanna svæðið á eigin vegum. Kaprun er heillandi bær sem á sér langa sögu. Hér er svipmikill kastali sem byggður var á 12. öld sem virki og bústaður valdhafa á svæðinu. Fyrir áhugasama er stór og glæsileg heilsulind í Kaprun sem býður upp á flotta aðstöðu úti sem inni fyrir þá sem vilja eyða deginum í slökun og dekri. Zell am See vatnið er aðeins örfáa kílómetra frá Kaprun og þar eru óteljandi möguleikar til útivistar. Í kring um vatnið eru fallegir stígar, garðar og friðsælar strendur. Það er gaman að rölta í bænum Zell am See, um þröngar litlar götur með hefðbundnum alpahúsum, litlum verslunum og kaffihúsum. 

Við ferðumst með kláfi upp á Kitzsteinhorn jökullinn sem stendur í yfir 3000 m hæð. Frá útsýnispalli á toppinum, Top of Salzburg, er stórkostlegst útsýni yfir alpana, Hohe Tauern fjöllin og Pinzgau svæðið. Á björtum degi má sjá glitta í hæsta topp Austurrríkis, Grossglockner. Héðan fáum við notið stórfenglegs og ólýsanlegs útsýnis allt um kring. Farið verður með Kitzsteinhorn kláfnum að Alpincenter. Þaðan verður gengið eftir Alexander Enzinger leiðinni en þar er frábært útsýni yfir Kitzsteinhorn jökulinn, Pinzgau og Grossglockner. Hér er skemmtilegt samspil snævi þakinna tinda, kletta og grænna alpaengja, greniskóga, alparósa, maríuvanda og lyngrósa og gott tækifæri til þess að njóta stórkostlegrar náttúru. Hægt verður að taka Maiskogel kláfinn til baka til Kaprun.

• Lengd: u.þ.b. 8 km
• Göngutími: u.þ.b. 4 klst.
• Hækkun: u.þ.b. 66 m
• Lækkun: u.þ.b. 953 m (nema ef kláfurinn er tekinn til baka)
• Erfiðleikastig: miðlungs

Í dag liggur leið okkar frá litla þorpinu Niedernsil upp í grösugt fjallendið fyrir ofan, í gegnum greni- og furuskóga. Á leiðinni glittir í Pinzgau dalinn og Zell am See. Katzsteinalm er áfangastaðurinn okkar, fjallaskáli sem er kærkominn staður til að hvíla lúin bein og njóta veitinga úr héraði. Hér er fagurt útsýni yfir fjöll og dali úr 1550 m hæð í Kitzbühel ölpunum. Skálinn er þekktur fyrir að bjóða upp á mjög bragðgóða osta frá bóndabæjum í kring sem eru algjörlega dagleiðarinnar virði. Einnig er algengt að boðið sé upp á reyktar pylsur eða skinku, kássur, eplabökur og pönnukökur sem gjarnan er boðið upp á í fjallaskálum (Kaiserschmarrn). Farið verður með almenningsvagni til Niedernsill þar sem ganga dagsins hefst. Gengið verður sömu leið til baka. 

• Lengd: u.þ.b. 14 km
• Göngutími: u.þ.b. 5 klst.
• Hækkun: u.þ.b. 1000 m
• Erfiðleikastig: miðlungs

Nú er komið að heimferð eftir góða daga í austurrísku Ölpunum. Við leggjum snemma af stað út á flugvöll í München og flogið verður heim kl. 14:05. Lending á Íslandi kl. 16:00 að staðartíma.