Hjólað um hlíðar Prosecco á Ítalíu

Í dag flytur rúta okkur til Borgo Valsugana sem er yndislegur bær og höfuðstaður samnefnds dals sem umkringdur er Ölpunum. Hjólum frá Borgo Valsugana um fallegan hjólastíg með fram Brenta ánni og njótum fallegs landslags ræktaðra túna og eplatrjáa allt í kringum okkur. Í Valstagna fræðumst við um fornar hefðir tengdar ánni og hjólum svo til baka á hótelið.

• Vegalengd: 55 km
• Hækkun: 200 m
• Erfiðleikastig: létt

Við hjólum af stað og tökum stefnuna á Marostica þar sem annað hvort ár er teflt manntafl, í orðsins fyllstu merkingu, á stóru taflborði á torgi miðbæjarins. Á sléttlendinu fyrir neðan sjást smáhallir af ýmsum gerðum. Hjólum áfram fram hjá lundum kirsuberjatrjáa til Breganze sem er þekkt fyrir frábær vín og þá sérstaklega hið fræga Torcolato dessertvín. Í Breganze bíður okkar vínsmökkun og snarl, að sjálfsögðu framleitt úr afurðum héraðsins, áður en haldið verður til baka á hótelið. Kvöldverður á eigin vegum.

• Vegalengd: 45 km
• Hækkun: 270 m
• Erfiðleikastig: létt

Nú liggur leið okkar um Grappa fjallsræturnar, á milli Bassano og Asolo. Hjólum upp að Borso del Grappa þar sem mikilfengleiki Monte Grappa tekur á móti okkur. Dáumst einnig að fallegu útsýninu yfir Asolo hæðirnar þar sem við stoppum hjá víngerð og gæðum okkur á glasi af dýrindis Asolo Prosecco. Tökum því næst stefnuna á litla þorpið Asolo. Þar hefur fornt yfirbragð bygginga og mannlífs varðveist í ótrúlega fallegu umhverfi sem öldum saman hefur veitt listamönnum, skáldum og rithöfundum innblástur.

• Vegalengd: 60 km
• Hækkun: 600 m
• Erfiðleikastig: meðalerfitt

Í dag er frjáls dagur sem hver og einn getur nýtt eins og honum líkar best. Það væri til dæmis hægt að fara til Feneyja en þangað er aðeins einnar klukkustundar lestarferð. Kvöldverður á eigin vegum.

Við hjólum í dag frá Bassano eftir sveitavegum þar til við komum að Ezzelini hjólastígnum en hann er tileinkaður Ezzelini fjölskyldunni sem var ein áhrifamesta fjölskylda svæðisins á miðöldum. Stígurinn liggur með fram Muson ánni og fljótlega erum við komin í fallega bæinn Castelfranco Veneto. Þetta er heimabær fræga endurreisnarmálarans Giorgione og tilvalið er að skoða meistaraverk hans, Castelfranco Madonna, sem staðsett er í dómkirkju bæjarins. Því næst höldum við að borginni Cittadella en þar eru einstakir miðalda virkisveggir sem hægt er að ganga á. Hér skoðum við okkur um áður en við hjólum til baka til Bassano.

• Vegalengd: 65 km
• Hækkun: nánast engin
• Erfiðleikastig: létt

Við ljúkum einstakri hjólreiðaviku á því að hjóla í rólegheitunum á Brenta hjólastígnum á milli Bassano del Grappa og Piazzola sul Brenta og upplifum sannkallaða náttúruvin með heillandi landslagi. Brenta áin hefur um áraraðir verið ein helsta samgönguleið á milli Alpanna og Adríahafsins, bæði fyrir fólk og vörur. Eitt það merkilegasta sem við sjáum í dag er hið glæsilega 17. aldar glæsihýsi Villa Contarini sem er gott dæmi um hýbýli aðalsmanna. Kvöldverður á eigin vegum.

• Vegalengd: 40 km
• Hækkun: nánast engin
• Erfiðleikastig: létt

Nú er komið að lokum en flogið verður heim með Play frá Feneyjum kl. 22:05. Lending á Íslandi kl. 00:40 að staðartíma.