Costa del Azahar & Valencia

Nú er upplagt að njóta þessarar glæsilegu borgar en fáar borgir vekja eins mikla aðdáun og söguríka Róm. Ein af perlum borgarinnar eru Spænsku tröppurnar og Trevi brunnurinn sem er einnig frægur fyrir hið ljúfa líf kvikmyndar Fellínís, La dolce vita. Það er líka dásamlegt að stoppa á yndislega torginu Piazza Navona þar sem listamenn sitja og bjóða verk sín og finna má fjöldann allan af skemmtilegum veitingahúsum. Svo má ekki gleyma Piazza della Rotonda torginu við best varðveittu fornbyggingu Rómar, Pantheon. Kaupmenn láta sig ekki heldur vanta í borginni, fínar verslanir eru við Spænsku tröppurnar en aðalverslunargöturnar eru Via del Corso og Via dei Condotti. Seinnipartinn verður stefnan tekin á hafnarborgina Civitaveccia þar sem við stígum um borð í skip sem siglir með okkur til Barcelona. Gist verður í tveggja manna klefum með baðherbergi.

Í dag verðum við á siglingu til Barcelona. Við komuna þangað verður stefnan tekin á Costa del Azahar eða Costa dels Tarongers eins og Katalóníubúar kalla hana, Appelsínuströndina. Við gistum í átta nætur í Peñíscola sem er á lista yfir fallegustu bæi Spánar og er einnig sögulegt verndarsvæði. Við hótelið er útisundlaug, heitur pottur og sólbekkir. Á hótelinu eru einnig líkamsrækt, heilsulind með sánu og tyrkneskt bað.

Við ströndina er ólýsanlega fagurt, röð pálmatrjáa og rómantískur miðaldablær svífur yfir. Við sjáum fyrrum páfahöllina, Castell Papa Luna, og vita sem stendur í 67 m hæð uppi á háum kletti. Stórbrotið landslagið hefur þjónað sem umgjörð í kvikmyndum og sjónvarpsþáttum og má þar m.a. nefna El Cid með Sophiu Loren og Charlton Heston og Game of Thrones. Gamli bærinn er heillandi með litlum kalkhvítum húsum sem lokuð eru af með borgarmúrum og kastala frá miðöldum. Við förum í töfrandi skoðunarferð um bæinn og kastalann eftir hádegi og njótum náttúrufegurðar staðarins. Eftir það verður gefin tími til að skoða bæinn, njóta aðstöðunnar við hótelið eða taka sér sundsprett í Miðjarðarhafinu.

Þessi frábæra dagsferð leiðir okkur aftur til miðalda um Maestrazgo svæðið með sínum ólífu- og möndlutrjám. Við heimsækjum Morella en þessi miðaldabær tilheyrir takmörkuðum fjölda borga um allan heim sem hafa varðveist nær fullkomlega sem sögulegt safn. Er hann eitt besta dæmi um uppbyggingu miðaldabæja, umkringdur miklum borgarmúr með turnum og hliðum en Morella er einnig á heimsminjaskrá UNESCO. Eftir það verður ekið í skemmtilega heimsókn til ólífubónda þar sem boðið verður upp á hádegissnarl, m.a. tortilla de papas, skinku, ost og vín en einnig verður ólífuræktunin skoðuð. Héðan fara allir saddir og sælir heim á hótel eftir yndislegan dag. 

Nú ætlum við að aka til bæjarins Tírig og á Valltorta hellasafnið þar sem við fræðumst um stórmerkileg hellamálverk sem fundist hafa í Valltorta og Gasulla giljunum sem eru í um 500 metra fjarlægð frá bænum. Þessi málverk eru mikil menningarverðmæti og svæðið er komið á heimsminjaskrá UNESCO. Við skoðum þetta áhugaverða, litla safn og förum í stutta göngu til að skoða heillandi hellamálverk í þessu fallega umhverfi. Eftir það verður ekið til miðaldarbæjarins San Mateo í héraðinu Castello en þar í nágrenninu er rómverski vegurinn Via Augusta sem er í dag þekkt hjóla- og gönguleið. Hér ætlum við að njóta lífsins og kynna okkur líf bæjarbúa. Einnig verður gefin frjáls tími til að fá sér hressingu og líta á kaupmenn bæjarins. 

Þessum dag ætlum við að eyða í sögufrægu borginni Valencia en tímalaus fegurð hennar heillar. Á göngu okkar um elsta hluta borgarinnar komumst við í tæri við meira en 2000 ára sögu hennar, þ.á m. gotnesku bygginguna La Lonja, fyrrum skiptimarkað með silki, sem er nú komin á heimsminjaskrá UNESCO. Rétt eins áhrifamikil er dómkirkjan sem byggð er á rústum mosku. Í meira en þúsund ár hefur fundur hins einstaka vatnadómstóls (Tribunal de les Aigües de València) sem ráðstafar vatnsréttindum, verið haldinn vikulega við inngang dómkirkju Valencia, hjá styttunum af tólf lærisveinum Jesú, Los Aposteles. Við reikum um þröngar götur borgarinnar og töfrar hennar hrífa okkur með sér. Auðvitað verður gefinn frjáls tími til að fá sér hressingu og upplifa borgina á eigin vegum. Endum daginn í lista-, menningar- og vísindahverfinu, með nútímabyggingum og skúlptúrum, en hverfið er orðið eitt mesta aðdráttarafl borgarinnar og einn af 12 fjársjóðum landsins.  

Þjóðgarðurinn Sierra del Espadán tekur á móti okkur í dag og nú verður ekið til La Vall d'Uixó. Farið verður á bátum í gegnum neðanjarðarhella þar sem lengsta neðanjarðará í Evrópu, San José, rennur um. Ótrúlegt náttúrufyrirbæri. Við líðum áfram á kristaltæru bláu ánni, um leðurblökusalinn og um sal djöflavatnsins eins og hann er kallaður. Eftir það verður ekið til bæjarins Vilafamés sem talinn er með fallegustu smábæjum Spánar og hefur að geyma miðaldakastala sem varðveitir fornar leifar frá rómverskum, maurískum og kristnum tíma. Einnig verður gaman að rölta um á eigin vegum, fá sér hádegishressingu og njóta dagsins.

Nú er komið að því að slaka á eftir annasama daga á þessum fagra stað. Hægt er að nýta sér aðstöðuna á hótelinu eða ganga með pálmaströndinni inn í Peñíscola, kanna þennan fallega bæ betur og líta inn á kaupmenn bæjarins. Og síðast en ekki síst er auðvitað nauðsynlegt að fá sér sundsprett í Miðjarðarhafinu seinnipart dags. 

Góður dagur í rólegheitum og við njótum samverunnar á þessum fagra stað. Við flatmögum við sundlaugina og þeir sem vilja, geta tekið litla smálest, hop on hop off, um svæðið. Boðið er upp á fjórar leiðir, tvær um nágrennið, útsýnisferð og ferð um Peñíscola. Bátsferðir eru einnig í boði frá litlu bátahöfninni.

Nú er komið að því að kveðja þennan draumfagra stað og aka á flugvöll í Barcelona. Brottför þaðan kl. 15:45 og lent í Keflavík kl. 18:20 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.