Vordagar við Gardavatn

Gardavatn hefur verið einn vinsælasti áfangastaður Íslendinga til margra ára, enda meðal allra fegurstu staða á Ítalíu. Sjálfur Goethe líkti staðnum við himnaríki og skal engan undra. Við hefjum þessa ljúfu ferð á því að aka upp í stórbrotin Alpafjöllin, suður til Brixen í Trentino á Ítalíu. Riva del Garda tekur á móti okkur við hið sægræna Gardavatn en bærinn stendur á fallegum stað við vatnið og er einn vinsælasti ferðamannastaður svæðisins.
Við munum fara í áhugaverðar skoðunarferðir, m.a. til Feneyja sem hefur löngum verið kölluð drottning Adríahafsins. Förum í yndislega siglingu á Gardavatni til bæjanna Limone og Malcesine og heimsækjum Veróna, eina elstu og fallegustu borg Norður-Ítalíu. Eftir dýrðina við Gardavatnið, höldum við til Seefeld í Tíról og njótum þar náttúrunnar milli hárra og tignarlegra fjalla en á leiðinni þangað verður komið við í Innsbruck, höfuðstað Tíról, sem er dásamleg borg. Í þessari ljúfu ferð ætlum við að njóta samverunnar í undurfögru umhverfi, borða, dansa og tralla saman.

Verð á mann 269.900 kr.

Aukagjald fyrir einbýli 34.800 kr.


Innifalið

  • Flug með Icelandair og flugvallarskattar.
  • Gisting í 2ja manna herbergi með baði.
  • Morgun- og kvöldverður allan tímann á hótelum.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Kláfar eða stólalyftur upp á fjöll.
  • Siglingar og vínsmökkun.
  • Hádegisverðir.
  • Þjórfé.

Valfrjálst

  • Sigling í Feneyjum ca € 20. 
  • Sigling á Gardavatni ca € 23.
  • Kláfur frá Malcesine upp á Monte Baldo ca € 23. 
  • Aðgangur að hringleikahúsinu í Veróna ca € 10.
  • Hádegishressing i Verona ca € 25. 
  • Kláfur upp á Rosshütte ca € 18.

Kort af ferðinni

FerðalýsingPrenta ferðalýsingu

29. apríl | Flug til München & Brixen í Suður-Tíról

Brottför frá Keflavík kl. 7:20. Mæting í Leifsstöð um 2,5 klst. fyrir brottför. Lent í München kl. 13:05 að staðartíma. Þaðan verður stefnan tekin suður á bóginn upp í stórbrotin Alpafjöllin, stoppað verður við Evrópubrúna og ekið yfir hið sögufræga Brennerskarð sem er ein lægsta og jafnframt mikilvægasta leiðin yfir Alpafjöllin. Endum í Brixen í Suður-Tíról á Ítalíu og gistum þar í eina nótt á skemmtilegu hóteli í miðbænum.

30. apríl | Brixen & Riva del Garda við Gardavatnið

Brixen er ein af perlum Suður-Tíról. Eftir morgunverð verður farið í stutta gönguferð um elsta hluta borgarinnar, en hún er höfuðstaður Eisackdalsins og liggur við rætur fjallsins Plose. Í þessum 20.000 manna, huggulega bæ finnast gamlar götur, brýr, kirkjur og söfn. Þar mætast árnar tvær Eisack og Rienz sem ásamt umlykjandi vínekrum og aldingörðum gera Brixen að einstaklega heillandi og fallegum stað. En nú bíður bærinn Riva del Garda við Gardavatn eftir okkur þar sem við munum gista í sex nætur á góðu hóteli í miðbænum.

1. maí | Dagsferð til Feneyja

Fyrir höndum er yndislegur og stórskemmtilegur dagur. Við leggjum snemma af stað og ökum til Feneyja. Við byrjum á ljúfri siglingu inn í borgina frá bílastæðinu. Auður og íburður blasir hvarvetna við í borginni og á vegi okkar verða stórfenglegar sögulegar byggingar eins og hertogahöllin sem er ein glæsilegasta bygging borgarinnar. Við skoðum líka Markúsartorgið þar sem Markúsarkirkjan stendur. Hún er ein merkilegasta kirkjubygging veraldar, byggð í austrænum stíl og minnir á höllina úr ævintýrinu 1001 nótt. Við komum að hinni frægu Rialto brú sem liggur yfir Grand Canal skurðinn en hann mun vera 3,8 km langur og 900 m breiður og við hann standa hvorki fleiri né færri en 200 hallir. Síðdegis mun hverjum og einum gefast tími til þess að skoða þessa fallegu borg betur, njóta mannlífsins og jafnvel líta inn á söfn. Komið verður aftur á hótel undir kvöld.

Opna allt

2. maí | Frjáls dagur í Riva del Garda & stutt skoðunarferð

Dagurinn verður rólegur en að loknum morgunverði förum við fótgangandi í stutta skoðunarferð um bæinn Riva del Garda. Að henni lokinni er frjáls tími til að skoða sig um í þessum snotra bæ, ganga litlar og þröngar götur hans, staldra við í verslunum, rölta undir pálmatrjám með fram ströndinni eða upp að virkinu Bastillione, þaðan sem er einstakt útsýni yfir vatnið. Einnig er kjörið að njóta aðstöðunnar á hótelinu, annaðhvort í garðinum við sundlaugina eða í heilsulindinni. Upplagt væri að fá sér létta hádegishressingu saman á Hótel Central, sem er á aðaltorgi bæjarins.

3. maí | Dagsferð til Veróna

Nú verður ekið til Veróna, elstu borgar Norður-Ítalíu, og er þetta einn hápunktur ferðarinnar. Veróna er borg menningar og lista en frægust er hún sem sögusvið leikrits Shakespeare um Rómeó og Júlíu. Farið verður í skoðunarferð um borgina og staldrað við helstu staði þessarar merku borgar. Þar má nefna þriðja stærsta hringleikahús veraldar, Arena, og Kryddtorgið en þar stendur fjöldi fagurra bygginga og minnisvarða. Allur miðbær borgarinnar eins og hann leggur sig er á skráður á heimsminjaskrá UNESCO og ekki að ástæðulausu. Um hádegi ætlum við að fá okkur létta hádegishressingu að hætti Ítala, á einum af elsta „trattoria“ veitingastað borgarinnar.

4. maí | Sigling á Gardavatni, Limone & Malcesine

Farið verður í ljúfa siglingu á Gardavatni. Haldið til Limone, eins fallegasta bæjarins við vatnið og þar áð í dágóða stund. Þaðan verður siglt yfir sægrænt Gardavatnið yfir til Malcesine sem er sögufrægur ferðamannabær við austurströnd vatnsins. Í Malcesine gefum við okkur góðan tíma, fáum okkur hressingu og skoðum okkur um í bænum. Áhugasamir geta farið með kláf upp á Monte Baldo, hæsta fjallið við Gardavatn, en aðrir geta litið inn í mjög áhugaverðan gamlan kastala sem er að finna í bænum.

5. maí | Frjáls dagur í Riva del Garda

Dagur í slökun og rólegheitum. Upplagt að nota aðstöðuna við hótelið eða skoða sig betur um í þessum töfrandi bæ. Einnig er hægt að fara í skemmtilega göngu með ströndinni til næsta bæjar, Torbole sem er enn einn hrífandi bærinn við vatnið. Þeir hressustu geta gengið upp í Santa Barbara kapelluna sem er í 625 m hæð yfir bænum.

6. maí | Riva del Garda, Innsbruck & Seefeld í Tíról

Nú kveðjum við þennan draumastað og höldum til ekki síðri áfangastaðar, fjallabæjarins Seefeld í Tíról í Austurríki þar sem gist verður í tvær nætur umkringd fjalladýrð. Á leiðinni þangað verður stoppað í Innsbruck, höfuðstað Tíróls, sem er fjórða stærsta borg landsins og oft skilgreind af íbúum hennar, með miklu stolti og ást, sem óvenjustórt þorp. Hún er stundum sögð smækkuð útgáfa af öllu Austurríki, en borgin hefur allt sem nútímaborgir hafa upp á að bjóða en þó tekur einungis 10 mínútur að komast úr miðbænum með kláfi upp í yfir 2000 m há fjöllin þar sem kúabjöllur óma allt um kring. Yndisleg borg!

7. maí | Frjáls dagur í Seefeld & stutt ganga með fararstjóra

Í dag tökum við það frekar rólega, hefjum daginn á staðgóðum morgunverði og höldum síðan í stutta gönguferð um Seefeld sem er með eftirsóttustu ferðamannabæjum Tíról. Bærinn er umkringdur þverhníptum fjöllum en áður fyrr var hér mikið vatnasvæði og ber nafn bæjarins það með sér. Eftir stutta göngu með fararstjóranum er frjáls tími það sem eftir lifir dags. Hér er margt hægt að gera, fara með hestvagni um bæinn, ganga hringinn í kringum vatnið eftir þægilegri gönguleið eða fara með kláf upp í Rosshütte sem er í 1.784 m hæð. Þar er að finna gott veitingahús og er upplagt að fá sér kaffi og svo sem eina tertusneið.

8. maí | Heimferð frá München

Eftir glæsilega og skemmtilega ferð verður ekið til München. Brottför þaðan kl. 14:05 og lending í Keflavík kl. 16:00 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Hólmfríður Bjarnadóttir

Hólmfríður Bjarnadóttir (Hófý) heiti ég og er fædd árið 1960 á Patreksfirði. Ég er móðir þriggja drengja og er búsett í Bæjaraskógi í Þýskalandi um þessar mundir með yngsta drenginn, Gabríel Daða. Eiginmaður minn er Norbert Birnböck sem er einn af bílstjórum Bændaferða.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00