Íslendingaslóðir í Vesturheimi

2. – 12. ágúst 2018 (10 dagar)

Bandaríkin opnuðu gríðarlega mikið landsvæði í vestri fyrir innflytjendur á síðustu áratugum 19. aldar og um líkt leyti gerðist það sama í Kanada. Það var því engin tilviljun að íslenskir vesturfarar færu þangað til að nema lönd. Þar unnu þeir með öðrum þjóðabrotum að mótun nýs samfélags í Norður-Ameríku. Í harðri lífsbaráttu landnema gleymdu þeir aldrei uppruna sínum heldur kappkostuðu að minnast hans t.d. með árlegum sumarhátíðum. Þessi ferð snýst um að kynnast því hvernig afkomendur vesturfaranna rækta tengslin við Ísland og íslenska þjóð. Dagleiðin frá Minneapolis til Norður-Dakóta gefur okkur góða mynd af því landslagi sem beið vesturfaranna. Í Mountain dveljum við daglangt og fylgjumst með hátíð Íslendinga í Norður-Dakóta. Á Gimli í Manitoba er merkasta hátíð Íslendinga í Kanada haldin ár hvert og þar verður margt að sjá. Skoðunarferð um Nýja-Ísland er að venju á dagskrá og þá kynnumst við afkomendum vesturfaranna í heimsókn í Árborg, Riverton og Mikley. Snemma á Vesturfaratímabilinu varð Winnipeg höfuðból Íslendinga í Vesturheimi. Þar gefst okkur tækifæri til að kynnast þessari merku borg, því þar er gist í 4 nætur. Ferðinni lýkur á upphafsreit í Minneapolis þar sem gist er eina nótt á góðum stað gegnt Mall of America.

Verð á mann í tvíbýli 249.900 kr.

Aukagjald fyrir einbýli 75.500 kr.


Innifalið

  • 10 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgunverður níu morgna.
  • Einn kvöldverður í Mountain.
  • Einn hádegisverður í Árborg.
  • Aðgangur að safni í Árborg.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir á söfn önnur en í Árborg.
  • Máltíðir aðrar en þær sem tilgreindar eru að ofan.
  • Þjórfé.
  • ESTA heimild til Bandaríkjanna ca. $ 14.
  • Eta heimild til Kanada ca.$ 7.
  • Forfalla- og ferðatryggingar.

Athugið

Máltíðir eru almennt ekki innifaldar í ferðinni, nema morgunverður alla morgna. Gott er að hafa með sér nasl í bílnum, ávexti og annað slíkt. Í bílnum er til sölu vatn gegn vægu gjaldi svo enginn þarf að vera þyrstur. Stundum mun fararstjórinn panta sameiginlega máltíð eða taka frá borð á veitingastað þannig að hópurinn snæðir saman. Það er mjög mismunandi hvað kvöldverður kostar, allt miðað við hvort farþegar vilja fá sér einfalda máltíð eða fara fínt út að borða. Sem viðmiðun má gera ráð fyrir að kvöldverður kosti ekki undir 20 dollurum á mann (nema skyndibitamáltíð sem er ódýrari). 

Kort af ferðinni

Ferðalýsing

Prenta ferðalýsingu

2. ágúst | Flug til Minneapolis

Brottför frá Keflavík kl. 16:45. Mæting í Leifsstöð í síðasta lagi 2 klst. fyrir brottför. Lending í Minneapolis kl. 18:05 að staðartíma. Eftir útlendingaeftirlit og tollskoðun er haldið á hótel nærri flugvelli. Gist í eina nótt.

3. ágúst | Vestur á bóginn – Norður Dakóta

Að loknum morgunverði hefst ferðin á Íslendingaslóðir í þægilegri rútu. Ágætt bil er á milli sæta, bökum má halla aftur og rúður dökkna í sólinni. Á þessum árstíma getur hiti verið á bilinu 25-30 stig. Í rútunni verður ætíð hægt að fá vatn. Ekið í vestur uns komið verður til Clearwater, sem er smábær í miðju landbúnaðarhéraði og verður áð um hríð. Áfram er svo haldið uns komið er til Alexandria þar sem snæddur verður hádegisverður.

Þaðan er svo ekið vestur til Fargo í Norður-Dakóta og þar staldrað við áður en stefnan er tekin á náttstað í Grafton þar sem gist verður í tvær nætur.

4. ágúst | Íslendingahátíð á Mountain

Árið 1878 flutti all stór hópur úr Nýja-Íslandi suður til Norður-Dakóta. Ný nýlenda  Íslendinga varð til, efldist og stækkaði þegar árin liðu. Fyrsta þjóðminningarhátíðin var haldin í nýlendunni 1879 og hefur verið árlegur viðburður síðan. Ekið til Mountain í hjarta íslenska landnámsins þar sem hátíðin er haldin. Hér verður fylgst með viðburðum dagsins, farin skoðunarferð um byggðina og markverðir staðir athugaðir. Um kvöldið er snæddur kvöldverður áður en ekið er til baka á náttstað í Grafton.

Opna allt

5. ágúst | Winnipeg

Brottför af hóteli að loknum morgunverði og ekið að landamærum Bandaríkjanna og Kanada. Áð í smábænum Pembina þar sem tækifæri gefst til að kíkja í fríhöfn og fá sér eitthvað snarl, síðan er farið yfir landamærin og stefnan tekin á Winnipeg. Svipumst um í miðbænum áður en ekið verður að hóteli þar sem gist verður í fjórar nætur.

6. ágúst | Íslendingadagshátíð á Gimli

Þessum degi er varið við hátíðarhöldin á Gimli í Nýja-Íslandi. Fyrsta þjóðminningarhátíð  Íslendinga í Norður-Ameríku var haldin í Milwaukee 2. ágúst 1874. Tilefni hennar var ný stjórnarskrá sem afhent var Íslendingum á Þingvöllum þennan sama dag. Íslendingar í Winnipeg urðu fyrstir til að gera hátíðina að árlegum viðburði og var hún haldin í almenningsgörðum borgarinnar til ársins 1932. Þá var ákveðið að flytja hana til Gimli og þar hefur hún verið síðan. Enginn íslenskur viðburður í Norður-Ameríku er eins vel þekktur og Íslendingadagurinn á Gimli. Árlega sækja hátíðina þúsundir alls staðar að úr álfunni. Hvernig minnast afkomendur Vesturfaranna upprunans á Íslandi? Það er gaman að fylgjast með heimamönnum, taka þá tali og heyra með þeirra orðum hvaða hug þeir bera til Íslands og íslensku þjóðarinnar. Tryggðin við land og þjóð er ótrúleg. 

7. ágúst | Nýja-Ísland & skoðunarferð

Skoðunarferð um þessa merkilegu nýlendu Íslendinga í Vesturheimi. Frá Winnipeg er ekið  í norður til Árborgar, en bærinn sá stendur við Íslendingafljót. Þar er skemmtilegt byggðasafn sem minnir um margt á Árbæjarsafn. Allmargar byggingar sem fluttar hafa verið úr sveitunum í kring mynda lítið þorp sem gaman er að skoða með íslenskumælandi safnvörðum. Þar verður snæddur hádegisverður en svo heldur ferðin áfram. Farið verður til Riverton, sem einnig stendur við Íslendingafljót. Hér eru áhugaverðir minnisvarðar sem allir tengjast íslensku landnámi. Loks er haldið til Mikleyjar sem nú kallast Provincial Park. Hér settust Íslendingar að árið 1876 og þeim sem það gerðu vegnaði vel. Þeir komust upp á lag með að veiða í vatninu og gerði það gæfumuninn. Kvöldverður snæddur á veitingahúsi í garðinum áður en snúið verður til baka á hótel í Winnipeg.

8. ágúst | Frjáls dagur í Winnipeg

Í dag gefst tækifæri til að kynnast borginni betur eða eyða stund með vinum og vandamönnum. Upplagt að skoða Manitoba Museum þar sem saga sléttunnar er sögð á einkar áhugaverðan hátt, eða fara á nýja mannréttindasafnið. Rölta að svo búnu niður í The Forks sem er mikið svæði við ármót Assiniboine og Rauðár. Hér stunduðu frumbyggjar viðskipti öldum saman og hér myndaðist fyrsti byggðarkjarni hvítra á sléttunni. Á svæðinu eru söfn, ótal smáverslanir og fjöldi veitingastaða. 

9. ágúst | Fargo í Norður-Dakóta

Í dag verður Kanada kvatt og ekið til Fargo í Norður-Dakóta í Bandaríkjunum. Við ökum í suður og komum við í fríhöfn við landamærin. Hér verður dvalið í stutta stund, tækifæri
gefst til að skipta kanadískum peningum í bandaríska og kannski kaupa einhvern minjagrip áður en farið verður yfir landamærin. Komum til Grand Forks þar sem snæddur verður hádegismatur. Ökum suður sléttuna til Fargo og gistum eina nótt.

10. ágúst | Minnesota & Minneapolis

Við kveðjum Norður-Dakóta þennan morgun og ökum inn í Minnesota. Förinni er heitið í bæinn Alexandria þar sem við byrjum á að fara á safn. Þetta er nokkuð norrænt byggðarsafn, því margir fyrstu íbúar héraðsins voru norrænir Vesturfarar, flestir norskir og sænskir. Þar er að finna afar umdeildan stein, The Kensington Runestone. Á honum eru rúnir sem greina frá ferð norrænna manna á þessar slóðir á 14. öld. Af safni er farið á matstað í grenndinni og þar snæddur hádegisverður. Að honum loknum er ekið til Minneapolis þar sem gist verður eina nótt.

11. ágúst | Heimferðardagur

Flug heim til Íslands er um kvöldið þannig að ýmislegt má gera þennan lokadag ferðar. Rýma þarf herbergi kl. 11:00 en þá er hægt að koma töskum fyrir í læstum sal. Hótelið er beint á móti Mall of America. Skutlur hótels byrja að selflytja hópinn á flugvöll kl.16:00. Flug til Íslands er kl. 19:30.

12. ágúst | Lending í Keflavík

Flugvél Icelandair frá Minneapolis lendir um kl. 6:30 að morgni í Keflavík.

Fararstjóri getur fært dagskrárliði á milli daga eftir þörfum þegar komið er á staðinn.

Myndir úr ferðinni

Fararstjórn

Jónas Þór

Jónas Þór er fæddur í Reykjavík. Hann lauk prófi frá Háskóla Íslands árið 1977 og flutti það ár til Winnipeg í Manitoba. Að loknu framhaldsnámi í sagnfræði frá Manitobaháskóla var Jónas ráðinn ritstjóri Lögbergs-Heimskringlu og kenndi um leið við íslenskudeild Manitobaháskóla. Hann bjó Í Kanada í tíu ár. Jónas hefur um árabil skipulagt ferðir sem á einn eða annan hátt tengjast sögu íslensku vesturfaranna í Vesturheimi. Hann hefur farið með hópa á nánast alla staði í Norður-Ameríku þar sem Íslendingar settust að á vesturfaratímabilinu. Þá hefur hann skipulagt ferðir til Íslands fyrir afkomendur vesturfaranna.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 09:30-16:00

 

Tengdar ferðir