Namibía - land hinna huguðu

Við erum árla á fótum þennan morgun, komin á ról fyrir dögun því hugmyndin er að fara út í eyðimörkina til að upplifa fyrstu sólargeislana leika um sandöldurnar. Sjónarspil gullins sands og dökkra skugga morgunsins er engu líkt. Léttur göngutúr upp á eina ölduna til að upplifa þessa einstöku dagrenningu, rölta svo áfram að Deadvlei sem er þurr og litlaus tjarnarbotn á þessum árstíma. Misþykkir trjástofnar standa upp úr sprungnum leirbotninum, hér finnst ekkert líf en myndefnið er dæmalaust. Allt um kring blasa við gullnar sandöldur, baðaðar í morgunsólinni. Við fáum hressingu, nokkurs konar miðmorgunmat, eftir þessa mögnuðu upplifun. Áfram heldur för og við komum til Sesriem Canyon, gljúfri sem geymir vatnsból, einn fárra staða í eyðimörkinni. Það er nokkuð liðið dags þegar við snúum til baka á náttstað eftir ævintýralegan dag.

• Morgunverður
• Kvöldverður

Við kveðjum Sossusvlei árla dags eftir morgunverð og höldum til hafnarbæjarins Swakopmund. Ekið verður í gegnum Walvis Bay, lítinn og fallegan bæ við hafið með rúmlega 60 þúsund íbúa. Þar má sjá ýmsar fuglategundir, s.s. flamingóa og pelíkana, selir skjóta upp kollinum úr sjónum og hnísur stökkva í öldurnar. Svæðið er einhvers konar vin milli eyðimerkur og sjávar. Gerum einnig stutt stopp við saltvinnslu áður en haldið er áfram til Swakopmund sem skartar allmerkilegum byggingum, sumar hverjar aldargamlar. Þjóðverjar eiga „heiðurinn“ af uppbyggingu á þessum stað en þeir voru athafnasamir seint á 19. öld á þessum slóðum. Bærinn varð til árið 1896 og bjuggu þýskir innflytjendur hér nokkuð fjölmennir lengi vel. Þess vegna heyrist þýska enn á stræti og torgum. Við innritum okkur inn á hótelið okkar og þeir sem hug hafa á skoðunarferðum eða annarri afþreyingu heimamanna ættu að grípa tækifærið það sem eftir lifir dags og finna eitthvað spennandi til að skoða af landi, hafi eða úr lofti. Gisting í tvær nætur.

• Morgunverður

Nafnið Swakopmund er dregið úr máli innfæddra. Xwaka merkir flóðhestur og op er á. Í dag gefst tækifæri til að skoða staðinn og allt það sem hann hefur upp á að bjóða. Þeir sem bókuðu skoðunarferð drífa sig af stað, aðrir sem ekkert sérstakt hafa í huga geta gengið eftir ströndinni, skoðað byggðarsafn eða sædýrasafn, litið við á einhverju hinna fjölmörgu kaffihúsa og kíkt á kaupmenn.

• Morgunverður

Í dag er frjáls dagur í Swakopmund og hver og einn getur notið hans á sinn hátt. Hægt er að rölta meðfram ströndinni, hlusta á brimið, fá sér kaffi og köku á notalegu kaffihúsi eða kíkja í verslanir.

• Morgunverður

Að loknum morgunverði liggur leiðin norður meðfram Skeleton Coast, þar sem mölbreiður og eyðimerkurlandslagið opnast fyrir augum okkar, með útsýni yfir úfið hafið. Við stoppum við selabyggðina á Cape Cross þar sem hávaði og lyktin af selunum yfirgnæfir allt og síðan er haldið inn til landsins framhjá Brandberg, hæsta fjalli Namibíu. Nú erum við komin til Damaralands en nafn þess er dregið af ættbálknum Damara sem hér bjó. Við hverfum aftur í tímann þegar við skoðum fornar steinristur og lærum heilmikið um það mannlíf sem eitt sinn þreifst á þessum stað. Að lokinni einkar áhugaverðri skoðunarferð ökum við á náttstað í Damara Mopane Lodge. Gististaðurinn er sjarmerandi með sundlaug, sólsetursútsýni og góðri stöðu til að kanna náttúru og sögu svæðisins. Gisting í tvær nætur.

• Morgunverður
• Kvöldverður

Í dag verður farið að skoða afar merkar steinaristur í Twyfelfontein, listaverk sem San ættbálkurinn gerði fyrr á öldum. Ekki langt frá Twyfelfontein má sjá eitt af jarðfræðilegum undrum Namibíu – Organ Pipes. Þar hafa náttúruöflin skapað ótrúlega formfegurð úr hrauni sem kólnaði fyrir um 120 milljón árum. Súlur rísa eins og pípur í risavöxnu kirkjuorgeli og mynda stórbrotna sjón sem virðist nánast manngerð. Hér nálægt er einnig Burnt Mountain, fjall sem líkist landslagi eftir eldgos eða stórbruna. Okkur gefst tækifæri til að sjá og upplifa hefðbundið líf Damaraættbálksins og menningu þeirra á lifandi safni, en þetta er einstakt í allri Namibíu. Fyrir utan merkar fornminjar er landslagið hér sérstakt og dýralífið áhugavert en fílar eru algengir á þessum slóðum svo og nashyrningar og auðvitað ýmsar smærri dýrategundir. Seinni hluta dags er frjáls tími á gististað en að auki er hægt að bóka sig í kvöldsafarí.

• Morgunverður
• Kvöldverður

Í dag höldum við í hinn einstaka þjóðgarð Etosha, þar sem dýr merkurinnar hafa þraukað öldum saman, lært á duttlunga náttúrunnar, veður og vinda. Etosha þjóðgarðurinn er vin í eyðimörk, fyrst og fremst vegna vatnsbóla sem sjaldan eða aldrei þorna, en þangað leita dýrin í brennandi hita bæði til að kæla sig og líka til að svala þorsta. Hundruð ólíkra tegunda spendýra standa hlið við hlið í sömu erindum. Komið er síðdegis að Okaukuejo Camp. Þar er hægt að njóta sólseturs og fylgjast með dýralífinu við þetta fræga upplýsta vatnsból. Gisting í þrjár nætur.

• Morgunverður
• Kvöldverður

Farið verður í safaríferð snemma morguns til þess að ná dýrunum á ferðinni áður en þau láta undan sólarhitanum og skríða í skugga. Hér fer saman merkileg jarðfræði, ótrúleg náttúruundur og einstakt dýralíf en Etosha þjóðgarðurinn er einn merkilegasti þjóðgarður í sunnanverðri Afríku. Hér finnast m.a. ljón, fílar, nashyrningar, sebrahestar, gíraffar, antilópur, blettatígrar auk um 340 tegunda fugla.

• Morgunverður
• Kvöldverður

Í dag gefst aftur tækifæri til að skoða þjóðgarðinn og einstakt dýralíf hans nánar. Það er mikil upplifun að fylgjast með dýrunum í sínu náttúrulega umhverfi, hvort sem um er að ræða dramatísk augnablik þegar rándýr læðast um eða rólega stund þar sem sebrahestar og gazellur safnast saman við vatnið. Allt er þetta þó vitanlega heppni háð í hvert og eitt skipti. Eftir ógleymanlegan dag er ánægjulegt að fylgjast með kvöldsólinni hverfa bak við víðáttumikið landslag Etosha.

• Morgunverður
• Kvöldverður

Aftur förum við snemma af stað til að sjá dýrin áður en verður of heitt. Skoðum svæði í miðjum þjóðgarðinum kallað Etosha Pan sem er sérstakur staður sem minnir í raun um margt á pönnu, því botn þessa láglendis er svo þurr eða nánast skrælnaður. Samt finnast hér dýr sem einhvern veginn draga fram lífið og hafa aðlagast þessum sérstöku aðstæðum. Stöku skugga á hreyfingu bregður fyrir sjónir, þar er dýr á ferð í fjarska. Nú kveðjum við Etosha þjóðgarðinn og stefnum í átt að Otjiwarongo, snotrum litlum bæ þar sem við getum fengið okkur hressingu áður en haldið verður á Okapuka Safari Lodge. Þar upplifum við sannkallað afrískt safarí og höfum möguleika á að sjá gíraffa, strúta, hvíta nashyrninga og fjölmargar antilóputegundir. Gisting í tvær nætur.

• Morgunverður
• Kvöldverður

Snemma morguns er í boði safaríakstur til að leita að sjaldgæfari tegundum dýra, áður en snæddur er ríkulegur brunch við heimkomu. Seinni hluta dags eru valfrjálsar ferðir í boði upp til fjalla eða sérstök sólsetursferð.

• Morgunverður
• Kvöldverður

Nú verður haldið til höfuðborgarinnar Windhoek. Hér gefst tækifæri til að njóta síðustu stundanna í rólegheitum, hvort sem er við sundlaugina á hótelinu eða í rólegri gönguferð um miðbæinn. Windhoek er litríkur og líflegur staður með áhugaverða blöndu af afrískum og evrópskum áhrifum sem endurspeglast í byggingarstíl, menningu og matargerð. Um kvöldið er sameiginlegur kveðjukvöldverður. Gisting í eina nótt.

• Morgunverður
• Kvöldverður

Í ferðalok er ljúft að geta tekið því rólega en ferðalangar geta ráðstafað fyrrihluta þessa dags að eigin vild áður en haldið verður á flugvöllinn í Windhoek. Brottför með Lufthansa kl. 19:20.

• Morgunverður

Lent í Frankfurt kl. 05:25 um morguninn. Flogið áfram heim kl. 11:20 að staðartíma og áætluð lending í Keflavík kl. 13:05.

Fararstjóri getur fært dagskrárliði á milli daga eftir þörfum þegar komið er á staðinn.