Aðventutöfrar í Tíról

Í faðmi fjallanna er einstakt að vera á aðventunni og er Tíról í Austurríki alger ævintýraheimur út af fyrir sig.

Við hefjum ferðina í heimsborginni München á aðaljólamarkaði borgarinnar áður en við höldum áfram til Seefeld, yndislegs bæjar í fjöllum Austurríkis. Bærinn hvílir í sal Wetterstein-, Mieminger- og Karwendelfjalla og verður hann okkar dvalarstaður í þessari aðventuferð. Heimsækjum miðaldaborgina Brixen, elstu borg Tíróls á Norður-Ítalíu, þar sem stórfenglegur barokk arkitektúr liggur við fætur töfrandi leiksviðs Alpanna. Farið verður til hinnar einstaklega heillandi Alpaborgar Innsbruck sem er á sama tíma lífleg, þróttmikil, alþjóðleg, aðlaðandi og hefðbundin. Kristalsheimur Swarovski í Wattens verður skoðaður og eins heimsækjum við borgina Kufstein, upplifum einstakan jólamarkað þar, förum í miðaldakastalann sem gnæfir yfir borginni með hið fræga virkisorgel, stærsta útiorgel í heimi. Hér er á ferðinni einstök aðventuferð um yndislegt svæði sem skartar sínu fegursta á þessum árstíma. 

Verð á mann 169.900 kr.

Aukagjald fyrir einbýli 28.800 kr.


Innifalið

  • 6 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgun- og kvöldverður allan tímann á hóteli.
  • Allir drykkir á bar hótelsins og einnig með kvöldverði
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Kláfar eða stólalyftur upp á fjöll.
  • Hádegisverðir.
  • Þjórfé.

Valfrjálst

  • Swarovski heimar ca. € 17.
  • Kufstein kastalinn ca. € 8.

Kort af ferðinni

FerðalýsingPrenta ferðalýsingu

27. nóvember | Flug til München & Seefeld

Brottför frá Keflavík kl. 7:20. Mæting í Leifsstöð í síðasta lagi 2 klst. fyrir brottför. Lending í München kl. 12:05 að staðartíma. Við ökum inn í miðborg München og heimsækjum stærsta og gamalgrónasta jólamarkað borgarinnar, Christkindlmarkt á Marienplatz torginu. Eitt helsta kennileiti borgarinnar er gotneska dómkirkjan Marienkirche sem stendur einmitt á þessu torgi. Þar er einnig eitt fallegasta ráðhús landsins, en úr turni ráðhússins hljómar fagurt klukknaspil tvisvar sinnum á dag. Góður tími gefst til að fá sér hressingu og upplifa ljósum prýdda aðventuna. Síðar verður ekið til Tíról í Austurríki eða nánar tiltekið til Seefeld sem er í 1180 m hæð. Þetta er yndislegur bær inn á milli fjallanna og við gistum fimm nætur á góðu hóteli í miðbænum.

28. nóvember | Brixen

Á dagskrá okkar í dag er bærinn Brixen eða Bressanone í Suður-Tíról á Ítalíu. Í þessum 20 þúsund manna snotra bæ mætast borg og fjall, menning og náttúra en þessi árstími er töfrandi og stemning jólamarkaðarins hefur heillað margan manninn. Mikilfenglegt torg leiðir inn í fallegan miðaldakjarna elsta hluta bæjarins og þröngir stígar liðast með fram ánni Eisack (Isarco). Farið verður í skemmtilega gönguferð um þennan fallega miðaldabæ þar sem bæði er að sjá stórfenglega dómkirkjuna, aðalkennileiti Brixen og Hofburg, fyrrum aðsetur biskupa Bolzano-Brixen. Góður tími gefst til að fá sér hressingu og kanna líf borgarbúa. 

29. nóvember | Aðventudýrð í Swarovski & Innsbruck

Við hefjum daginn á að aka til Wattens þar sem Swarovski kristalssafnið er til húsa, en þar glitrar á ýmis djásn. Áfram höldum við til Innsbruck, höfuðborgar Tíról, sem er umvafin fjöllum og tindrandi náttúrufegurð. Innsbruck var ein af borgum Habsborgaranna, einnar mikilvægustu valdaættar Evrópu. Blómatími hennar var á 15. öld undir stjórn Maximilian I. af Habsborg. Hann lét byggja helsta kennileiti borgarinnar, húsið með gullþakinu, sem stendur við eitt fallegasta torgið í Tíról. Farið verður í stutta göngu með fararstjóranum en eftir það verður frjáls tími til að kanna borgina á eigin vegum og ylja sér á heitu Glühwein á aðventumarkaði borgarinnar. Borgin er sérstaklega ævintýraleg á aðventunni því borgarbúar nota gjarnan Grimmsævintýrin sem þema í skreytingunum. Tilvalið er að líta inn til kaupmanna í Maria-Theresien götunni en þar er einnig mikil jólastemning. 

Opna allt

30. nóvember | Kufstein & kastalinn

Bærinn Kufstein er sérlega spennandi bær og státar bæði af fallegum jólamarkaði í almenningsgarði borgarinnar og einnig við miðaldakastalann Kufstein sem trónir yfir borginni. Kastalinn er frægur fyrir tilkomumikið útiorgel, svokallað hetjuorgel, en á hverjum degi í hádeginu er leikið á orgelið til minningar um þá sem féllu í heimsstyrjöldunum tveimur og óma orgelhljómarnir frá turni kastalans og endurkastast í þverhníptum fjöllunum í kring. Mögulegt er að fara í skoðunarferð um kastalann og hverfa um hríð aftur í aldir. Í kastalagarðinum má svo sjá skapandi handverk sem unnið er að á aðventunni.

1. desember | Aðventumarkaður & huggulegur dagur í Seefeld

Í dag höfum við það notalegt í fjalladýrðinni í yndislega bænum Seefeld. Áður fyrr var þetta mikið vatnasvæði eins og nafn bæjarins ber með sér. Þennan dag er aðventumarkaður í bænum, lifandi tónlist og mikið um dýrðir. Hér er margt hægt að gera, t.d. fara með hestvagni í rómantíska ferð um nágrennið eða ganga hringinn í kringum vatnið eftir góðum göngustíg. Mögulegt er að fara upp á Rosshütte fjallið með kláfi sem fer upp í 1784 m hæð. Þarna uppi er gott veitingahús og upplagt að fá sér kaffi og tertusneið. 

2. desember | Heimferð frá München

Nú er komið að heimferð eftir ljúfa ferð. Eftir morgunverð verður ekið til München. Brottför þaðan kl. 13:05 og lending í Keflavík kl. 16:00 að staðartíma.

Fararstjóri getur fært dagskrárliði á milli daga eftir þörfum.

Myndir úr ferðinni

Fararstjórn

Inga Ragnarsdóttir

Leiðsögu- og myndlistamaðurinn Inga Ragnarsdóttir hefur starfað fyrir Bændaferðir frá árinu 2004. Hún hefur farið í fjölda ferða um mið-Evrópu þar sem hún er á heimavelli en Asía hefur verið hennar kærasta sérsvið frá upphafi. Ferðir Ingu um lönd eins og Indland, Nepal, Tíbet, Víetnam, Kambódíu, Búrma, Laos og Japan hafa notið mikilla vinsælda en Kína hefur hún sótt heim á hverju ári, oft tvisvar, síðustu 15 árin. Inga segir töfra Kína vaxa eftir því sem maður kynnist landinu nánar en það hefur heillað hana allt frá því á unglingsárunum.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Opnunartími þjónustusíma:
Mán.-fös. 08:30-16:00

 

Tengdar ferðir