Madeira - blómaeyjan fagra

Eftir viðburðaríka og skemmtilega daga um þessa fögru eyju er kærkomið að fá frjálsan tíma. Það er upplagt að njóta þeirrar glæsilegu aðstöðu sem hótelið okkar býður upp á, kanna umhverfið betur eða fara í gönguferð. Hægt er að taka strætisvagn inn í Funchal, rölta um og skoða þessa undurfögru blómaborg, slaka á í einum af hinum fallegu almenningsgörðum, kíkja í verslanir eða tylla sér á eitt af fjölmörgum snotrum kaffihúsum borgarinnar.

Við hefjum þennan dásamlega dag á að aka til elsta borgarhluta Funchal þaðan sem við förum með kláfi upp að hitabeltisgarðinum Monte Tropical. Alfredo Guilherme Rodrigues reisti sér þar höll seint á 19. öld að fyrirmynd þeirra sem hann hafði séð á ferðum sínum um Evrópu. Árið 1910 var höllinni breytt í glæsihótel sem naut vinsælda fyrirfólks og auðmanna frá Evrópu en eftir miðja 20. öld var hótelinu lokað og eignin fór í niðurníðslu. Portúgalinn José Berardo keypti eignina árið 1987 með það að markmiði að breyta svæðinu umhverfis í grasagarð á heimsmælikvarða og það tókst honum en garðurinn er einn vinsælasti áfangastaðurinn á Madeira. Þar er myndarlegt safn plantna alls staðar að úr heiminum og má meðal annars finna svæði sem helgað er austurlenskum plöntum og menningu og afrískri list. Á göngu okkar um garðinn sjáum við einnig safn flísalistaverka sem sýna okkur minni úr portúgalskri sögu og menningu. Garðurinn er skreyttur fallegum tjörnum, fossum og lækjum og þar er úrval skrautfiska og ýmissa fugla eins og flamingóa, páfugla og svana. Eftir að hafa skoðað okkur um í þessum friðsæla og undurfagra garði geta þeir sem vilja farið í skemmtilega körfusleðaferð að bænum Livramento sem er rétt fyrir neðan garðinn. Við höldum síðan til fallega sjávarþorpsins Camara de Lobos sem er einn elsti landnámsstaður eyjunnar en landkönnuðurinn João Gonçalves Zarco gaf þorpinu nafn vegna sæljóna sem hann sá í flóanum. Höfnin þykir einstaklega falleg, marglitir bátar, snarbrattir klettar í kring og grænar vínekrur í fjarska. Við snæðum hér saman hádegisverð og njótum líðandi stundar.

Í dag höldum við til Cabo Girão, einna hæstu sjávarhamra heims, um 580 metra yfir sjávarmáli. Árið 2012 var byggður glerpallur út yfir hamrana og fyrir áhugasama er magnað að fara út á hann, útsýnið þaðan er ægifagurt og tilkomumikið að geta horft lóðbeint niður klettana, en kannski ekki fyrir lofthrædda. Við höldum ferð okkar áfram í suðvesturátt til Lugar de Baixo en þar komum við á eitt stærsta bananaræktunarsvæði eyjunnar í Ponta do Sol héraðinu. Þar göngum við í gegnum bananaplantekru og fræðumst um ræktun bananans. Á leið okkar um Paul da Serra hásléttuna sjáum við hin undurfögru og grösugu Rabaca gljúfur sem eru á heimsminjaskrá UNESCO. Í bænum Porto Moniz snæðum við hádegisverð en þar fáum við að smakka á einum vinsælasta fiski eyjunnar, Espada. Þetta er hvítur og matmikill fiskur, ekki ósvipaður þorsknum góða en matreiddur að hætti heimamanna, þar sem þeir nota m.a. banana við eldamennskuna. Hér gefst einnig tækifæri fyrir áhugasama að baða sig í náttúrulaugum sem myndast hafa við eldsumbrot og fyllst af kristaltærum sjó. Við virðum fyrir okkur lífið í bænum São Vicente en þar er fjölbreytileiki gróðurs og dýralífs mikill og margar fagrar gönguleiðir. Hér má einnig finna fræga eldfjallahella sem mynduðust fyrir 890 þúsund árum. Á leið okkar til baka verður keyrt í gegnum Serra de Agua dalinn og upp að Encumeada skarðinu en þaðan er stórkostlegt útsýni yfir bæði norður- og suðurströndina á heiðskýrum degi.

Í dag er tilvalið að njóta náttúrufegurðarinnar við Atlandshafið frá hótelinu og nýta sér aðstöðuna þar, rölta af stað í gönguferð eða skoða sig betur um inni í höfuborginni. Um kvöldið snæðum við saman dýrindskvöldverð þar sem við gæðum okkur m.a. á Espetada sem er nautakjöt á teini, marinerað í hvítlauk, salti og lárviðarlaufum og er þessi réttur ásamt steiktum maísbitum afar vinæll hér á eyjunni. Yndslegu kvöldi ljúkum við svo með því að smakka á hinum vinsæla drykk heimamanna, poncha.

Nú er þessari glæsilegu ferð um blómaeyjuna Madeira að ljúka. Brottför frá Madeira flugvelli er kl. 14.55 og lending í Keflavík kl. 20:20 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Á þessu fallega 5* hóteli er allt innifalið í mat og drykk. Hótelið er staðsett í útjaðri höfuðborgarinnar Funchal. Á hótelinu er bæði inni- og útisundlaug, sauna, líkamsrækt og heilsulind þar sem hægt er að kaupa sér hinar ýmsu meðferðir. Öll herbergin eru með sjávarsýn og svölum.