Páskar á Sikiley

Nú bíður okkar einn af fallegustu bæjum eyjunnar. Cefalú tekur á móti okkur með sínum arabíska blæ. Arabar voru við völd í Cefalú í rúm 200 ár á eftir Byzantínum sem höfðu þar yfirráð í tæp 500 ár. Farið verður í skemmtilega skoðunarferð m.a um gamla miðaldahluta borgarinnar. Að koma inn í dómkirkjuna er magnað en hún er ein áhugaverðasta miðaldabygging Sikileyjar. Einnig komum við að Porta di Pescara, sögulegu borgarhliði við gömlu höfnina, og virkisbyggingunni Bastione di Capo Marchiafava en þaðan er stórkostlegs útsýni yfir Tyrrenahaf og Eólíueyjar, eða Vindeyjarnar eins og þær eru kallaðar. Eftir það verður frjáls tími til að fá sér hressingu og njóta þess að kanna líf bæjarbúa áður en ekið verður á hótel.

Við yfirgefum Campofelice di Roccella og ökum til Agrigento, sem er ein hinna gömlu grísku borga. Í næsta nágrenni er hinn stórmerkilegi dalur hofanna eða Vall di Templi. Hér má sjá mjög áhugaverðar fornminjar, um 20 dórísk hof frá 6.-5. öld f. Kr. Þetta fornminjasvæði nær yfir 1.000 hektara og er stærsta fornminjasvæði í heimi en einnig er hér áhugavert fornleifasafn. Dalurinn umhverfis hofin er þakinn ólífulundum, sítrónutrjám og vínekrum og við tökum okkur góðan tíma til að skoða og njóta þessa merka svæðis. Áfram höldum við svo áleiðis til Agrigento þar sem gist verður í tvær nætur á góðu hóteli við ströndina, sem er með útisundlaug, sólarverönd og heilsulind sem er búin gufubaði, heitum potti og tyrknesku baði.
 

Þetta verður áhugaverður dagur í Agrigento sem er ein hinna gömlu grísku borga en hana prýða margar töfrandi byggingar, kirkjur, torg og litlar hallir. Í dag er föstudagurinn langi og á Sikiley eru miklar hefðir á þessum degi. Skrúðganga fer í gegnum bæinn með líkneski og er það mikil upplifun að sjá þessa göngu sem Sikiley er fræg fyrir. Einnig munum við skoða okkur um í bænum á eigin vegum og upplagt er að fá sér hressingu og upplifa líf bæjarbúa í þessari líflegu borg, sér í lagi á þessum degi.

Við kveðjum nú Agrigento og höldum til fjallabæjarins Enna, sem er í tæplega 1000 m hæð og var hjarta Sikileyjar í fornöld, sem má þakka staðsetningu bæjarins. Þar verður farið í stutta skoðunarferð og svo njótum við þess að skoða okkur um á eigin vegum. Eftir það verður sameiginlegt létt hádegissnarl. Því næst heldur ferð okkar áfram til Giardini Naxos strandarinnar þar sem gist verður í fimm nætur á hóteli með útisundlaug og fallegan garð við einkaströnd.

Nú verður farið í ævintýraferð á eldfjallið Etnu sem er eitt þekktasta eldfjall Evrópu. Ekið verður að rótum fjallsins en þaðan gefst áhugasömum tækifæri á að taka kláf upp í 2.918 m hæð. Þegar upp er komið heldur ferðin áfram með jeppum um svæðið. Þetta er mikil upplifun og ferð sem ekki má missa af. Eftir það verður farið í hádegishressingu til vínbónda í nágrenni fjallsins.

Taormina er undurfallegur bær sem situr hátt uppi á bjargi yfir Jóníska hafinu og er byggður uppi í brattri hlíð. Héðan er stórfenglegt útsýni út á hafið og litlu eyjuna fyrir framan, Isola Bella. Í gegnum aldirnar hafa margir rithöfundar skrifað hér fræg verk og slóst Halldór Laxness í þeirra hóp þegar hann skrifaði hér bókina Vefarann mikla frá Kasmír. Þessi skrif juku mjög á vinsældir bæjarins sem þótti áður ómissandi áfangastaður í Evrópuhringferð heldra fólks. Efst í bænum má sjá gamalt hringleikahús Grikkja og Rómverja sem enn er í notkun. Frjáls tími gefst að skoðunarferð lokinni til að skoða bæinn, fá sér hressingu og feta þessar skemmtilegu götur.

Nú njótum við sælunnar í þessari náttúrufegurð sem umvefur okkur. Dagur í rólegheitum og slökun. Upplagt að nota aðstöðuna við hótelið. Einnig er hægt að fara í gönguferð inn í bæinn sem er u.þ.b. 20 mín ganga eða njóta þess að ganga í flæðarmálinu við gullnu ströndina og baða sig í fegurð eyjunnar.

Tímalaus fegurð fornu borgarinnar Sýrakúsa heillar okkur í dag. Hvergi er eins mikið af forngrískum minjum eins og hér, enda var þetta ein stærsta borg Grikkja til forna, stærri en Aþena. Í mörg hundruð ár var þetta mikilvægasta borg eyjunnar. Hér má sjá stórkostlegar fornminjar, t.d. grískt leikhús sem var höggvið í klett með sætum fyrir 15.000 áhorfendur. Auðvitað skoðum við eyjaperluna Ortygia, sem geymir gamla bæjarhluta Sýrakúsa, og einnig verður frjáls tími til að kanna borgina á eigin vegum og fá sér hressingu að hætti íbúanna.

Nú er komið að heimferð eftir yndislega daga. Leið okkar liggur til Catania sem er önnur stærsta borg eyjunnar og stendur við rætur eldfjallsins Etnu. Í þessari yndislegu borg upplifum við skemmtilega blöndu af gamla og nýja tímanum. Eftir stutta skoðunarferð verður gefinn tími til að fá sér hressingu og kanna umhverfið á eigin vegum. Tilvalið er að smakka réttinn Spaghetti alla Norma en hann er nefndur í höfuðið á tónskáldinu Bellini sem fæddist hér í Catania. Því næst verður ekið út á flugvöll. Flugið er með Lufthansa og brottför frá Catanía kl. 15:20 og lending í München kl. 17:30. Brottför þaðan til Keflavík með Lufthansa kl. 22:10. Lending á Íslandi kl. 00:10 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

• Campofelice di Roccella - Hotel Mangai's Himera Resort
• Agrigent - Hotel Baia di Ulisse
• Gardini Naxos - Hotel Hellenia