Kastalar & klettastrendur Suður-Englands

Í Torquay má finna eina merkilegust steinaldarhella Evrópu, Kents hellana. Þegar við göngum í gegnum víðáttumikið völundarhús hellanna upplifum við sterkt þá tíma þegar þeir voru heimili forfeðra okkar sem kveiktu hér elda, smíðuðu verkfæri og drógu inn hin ýmsu ísaldar dýr í skjóli fyrir aftakaveðrum. Eftir að hafa skoðað hellana höldum við í bæinn Cockington en það er eins og að fara aftur í tímann að heimsækja hann og ganga eftir þröngum götunum og fram hjá húsum með hálmþökum. Sagan drýpur af hverju strái en hér er vatnsmylla, járnsmiðja og jafnvel krikketvöllurinn var á miðöldum dádýragarður. Við upplifum í Cockington dæmigerðan enskan smábæjarsjarma, röltum um og fáum okkur hádegishressingu áður en haldið verður aftur til Torquay.

Þessi dagur er tileinkaður Dartmoor svæðinu en ekið er um þjóðgarðinn í hæðóttu landslagi með sérkennilegum klettamyndunum. Svæðið er heillandi með ám, grösugum engjum og fallegum þorpum og bæjum. Margar kvikmyndir hafa verið teknar á þessu svæði enda umhverfið einstaklega leyndardómsfullt. Við munum sjá fallega fossa og stöðuvötn, fornminjar allt frá bronsöld og aldrei er að vita nema það bregði fyrir sjaldgæfum fuglum og fiðrildum. Svo má geta þess að í Dartmoor búa stærstu sniglar í heimi. Við förum í rólegheitum um garðinn og njótum þess sem fyrir augu ber og fáum okkur te og skonsur i einhverju af hinum rótgrónu sveitaþorpum sem eru innan þjóðgarðsins.

Nú yfirgefum við Torquay og stefnum í átt að Stonehenge. En þessi leyndardómsfulli steinhringur sem mörg þúsund árum eftir að hann var reistur veldur enn ófáum sérfræðingum heilabrotum. Á leiðinni til Stonehenge skoðum við hinn heimsfræga Stourhead lystigarð sem fyrst var opnaður fyrir almenning árið 1740 og var þá lýst sem lifandi listaverki. Við endum daginn í Brighton þar sem við gistum síðustu tvær nætur ferðarinnar.  

Eftir morgunverð verður farið í stutta gönguskoðunarferð með fararstjóra um Brighton. Við njótum þess svo að slaka á í þessari líflegu borg en hér er mikið úrval markaða, verslana og veitingastaða, ásamt hinum þekkta Pier við ströndina. Það er einnig áhugavert að skoða stórbrotna höll George IV, The Royal Pavilion, sem sumir flokka sem eina af mest töfrandi og framandi byggingum Bretlandseyja.

Nú höldum við frá Brighton og ökum til Winchester sem er höfuðborg gamla konungsríkisins Wessex. Þar getum við ekki aðeins dáðst að dómkirkjunni heldur einnig að hringborði Artúrs konungs og riddara hans í Great Hall. Síðan er ekki úr vegi að rölta um götuna High Street þar sem finna má fjöldann allan af verslunum og kaffihúsum. Því næst er ferðinni haldið að Windsor kastala en breska konungsfjölskyldan, sem bar þýska ættarnafnið Saxe-Coburg-Gotha, tók upp nafn kastalans árið 1917. Þar í nágrenninu er Eton College en í skólann hafa gengið hvorki meira né minna en 20 breskir forsætisráðherrar sem og prinsarnir William og Harry. Við fáum okkur snemmbúinn kvöldverð í Windsor áður en við höldum á flugvöllinn í London. Flug til Íslands kl. 21:25 og lending í Keflavík kl. 23:40 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.