Ljúfir dagar í Napólí & Róm

Nú verður frjáls dagur til að skoða sig betur um í þessari líflegu borg. Áhugasamir geta t.a.m. skoðað þjóðminjasafn Ítalíu en þar má meðal annar sjá heilmikið af hlutum sem grafnir hafa verið upp eftir eldgosið í Pompei. En svo er líka hægt að rölta um borgina, skoða sig um á Via Toledo verslunargötunni eða staldra við á fallegu torgum borgarinnar og horfa á mannlífið sem er ansi litríkt og skemmtilegt. Kirkjur og hallir borgarinnar eru líka ófáar. Sameiginlegur kvöldverður á hóteli.

Nú kveðjum við Napólí og leið okkar liggur til hinnar einstöku og yndislegu Rómaborgar. Hún var byggð á sjö hæðum og var á blómaskeiði sínu fyrsta borg heims til að ná einni milljón íbúa. En við byrjum á að aka til Pompei þar sem skoðaðar verða einhverjar frægustu fornminjar veraldar. Rústir gömlu Pompei eru eitt stórkostlegasta dæmið um fornleifauppgröft heillar byggðar og mun heimamaður leiða okkur í allan sannleikann um söguna. Gist verður í fimm nætur á góðu hóteli í miðborg Rómar. Sameiginlegur kvöldverður á hótelinu.

Á dagskránni í dag er fróðleg skoðunarferð um borgina eilífu, Róm, og munum við staldra við á helstu stöðum borgarinnar. Engin borg í heiminum er eins rík af fornminjum og fögrum stöðum eins og Róm. Meðal þess sem skoðað verður er Piazza Venezia, Kapítólhæð, Forum Romanum, Palatínhæð, Pantheon, Colosseum, Treví brunnurinn, Navona torgið og Spænsku tröppurnar. Einnig verður frjáls tími til að kynnast borginni og mannlífinu eins og hvern og einn lystir. Kvöldverður á eigin vegum.

Eftir morgunverð verður haldið að Péturskirkjunni og Vatíkaninu, meistaraverkum síns tíma. Við förum í skoðunarferð um Péturskirkjuna og þeir sem vilja geta farið upp í kúpul kirkjunnar en þaðan er stórkostlegt útsýni yfir borgina og Péturstorgið. Eftir það verður frjáls tími og nú geta þeir sem ætla sér farið inn á safn Vatíkansins sem er eitt mikilvægasta safn menningar- og listaverðmæta í heiminum og hýsir listaverk páfans. Frægasta safnið í Vatíkaninu er Sixtínska kapellan en þar málaði einn frægasti listamaður endurreisnartímans, Michelangelo, eitt þekktasta listaverk í heimi á loft kapellunnar. Það er þó einnig vel þess virði að skoða veggmyndirnar, þær voru unnar af þekktum listamönnum endurreisnartímans eins og Botticelli, Perugino, Rosselli og fleirum. Kvöldverður á eigin vegum.

Nú er upplagt að skoða sig betur um í Róm en engin önnur borg í heiminum býður upp á eins mikið að skoða og upplifa. Hægt er að fara t.d. inn í Colosseum hringleikahúsið, ganga um Forum Romana eða upp á minnisvarðann sem var byggður til heiðurs Viktorio Emanuele ll konungi. Eins er heillandi að koma inn í Castel Sant´Angelo grafhýsi Hadrianusar keisara svo eitthvað sé nefnt. Kvöldverður á eigin vegum.

Nú er upplagt að njóta þessarar glæsilegu borgar en fáar borgir vekja eins mikla aðdáun og söguríka Róm. Ein af perlum borgarinnar eru Spænsku tröppurnar og Trevi brunnurinn sem er einnig frægur fyrir hið ljúfa líf kvikmyndar Fellínís, La dolce vita. Það er líka dásamlegt að stoppa á yndislega torginu Piazza Navona þar sem listamenn sitja og bjóða verk sín og finna má fjöldann allan af skemmtilegum veitingahúsum. Svo má ekki gleyma Piazza della Rotonda torginu við best varðveittu fornbyggingu Rómar, Pantheon. Kaupmenn láta sig ekki heldur vanta í borginni, fínar verslanir eru við Spænsku tröppurnar en aðalverslunargöturnar eru Via del Corso og Via dei Condotti. Sameiginlegur kvöldverður á hóteli okkar.

Í dag er komið að heimferð eftir yndislega daga en eftir morgunverð ætlum við samt að skoða katakomburnar sem eru fornir grafreitir kristinna manna á tímum Rómarveldis og því helgir staðir. Frægasta katakomban, San Callisto, er við forna veginn Via Appia og er kennd við heilagan Callíxtus. Eftir þetta verður ekið út á flugvöll. Brottför þaðan kl. 16:00 og lent í Keflavík kl. 18:50 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.