Aðventutöfrar í Tíról

1. – 6. desember 2026 (6 dagar)

Glæsileg og töfrandi aðventuferð í faðmi Alpafjallanna. Hér er einstakt að vera á aðventunni og Tíról í Austurríki er alger ævintýraheimur út af fyrir sig. Dvalið verður í Seefeld sem er yndislegur bær sem hvílir í sal Wetterstein, Mieminger og Karwendelfjalla. Við höldum í dagsferð til ævintýra bæjarins Mittenwald sem státar af litlum, myndskreyttum húsum og merkilegri hefð í smíði strengjahljóðfæra. Skíðabærinn Garmisch Partenkirchen í Þýskalandi, sem er einstaklega heillandi á aðventunni, verður sóttur heim ásamt höfuðborginni Innsbruck, sem er ein af ævintýraborgum aðventunnar. Kristalsheimur Swarovski í Wattens verður skoðaður og farið í verslun þeirra. Einnig heimsækjum við fallegu borgina Kufstein við ána Inn. Þar upplifum við einstakan jóla- og handverksmarkað og þar förum upp í miðaldakastalann sem gnæfir yfir borginni með hið fræga virkisorgel, stærsta útiorgel í heimi. Hér er á ferðinni einstök aðventuferð um yndislegt svæði sem skartar sínu fegursta á þessum árstíma.

Verð á mann 279.900 kr.

Aukagjald fyrir einbýli 17.500 kr.


Innifalið

  • 6 daga ferð.
  • Flug með Icelandair og flugvallaskattar.
  • Gisting í 2ja manna herbergi með baði.
  • Morgunverður allan tímann á hóteli.
  • Glæsilegur 4 rétta kvöldverður allan tímann á hóteli.
  • Allir drykkir á bar hótelsins og einnig með kvöldverði (að frátöldum drykkjum á sérseðli).
  • Aðgangur að glæsilegri heilsulind.
  • Sloppur og handklæði fyrir gufuböð.
  • Allar skoðunarferðir með rútu samkvæmt ferðalýsingu.
  • Íslensk fararstjórn.

Ekki innifalið

  • Aðgangseyrir inn í söfn, hallir og kirkjur.
  • Kláfar eða stólalyftur upp á fjöll.
  • Hádegisverðir.
  • Þjórfé.

Valfrjálst

  • Swarovski heimar u.þ.b. € 18.
  • Kufstein kastalinn u.þ.b. € 15. 

Nánari upplýsingar

Vert er að hafa í huga að þrátt fyrir að Bændaferðir séu alla jafna þægilegar rútuferðir er alltaf einhver ganga, t.d. í bæjarferðum. Margar evrópskar borgir eru bæði hæðóttar og ójafnar undir fæti og aðgengi að áfangastöðum þannig að leggja þarf rútunni mislangt frá. Ef þú hefur einhverjar vangaveltur varðandi þetta vinsamlegast ekki hika við að hafa samband við skrifstofu Bændaferða.

Kort af ferðinni

FerðalýsingPrenta ferðalýsingu

1. desember | Flug til München & Seefeld

Brottför frá Keflavík kl. 7:20. Mæting í Leifsstöð u.þ.b. 2,5 klst. fyrir brottför. Lending í München kl. 12:05 að staðartíma. Þaðan verður ekið til Tíról í Austurríki eða nánar tiltekið til Seefeld sem er í 1180 m hæð. Þetta er yndislegur bær inn á milli fjallanna og við gistum fimm nætur á góðu hóteli í miðbænum. Eftir að allir eru búnir að koma sér fyrir á herbergi förum við saman í stutta gönguferð um bæinn og kynnum okkur umhverfið og heimsækjum gotnesku kirkjuna St Oswald.

2. desember | Mittenwald & Garmisch-Partenkirchen

Þessi góði dagur byrjar í rólegheitum en síðan verður ekið til litla ævintýralega bæjarins Mittenwald sem á sér engan líka með fallegum, litlum, myndskreyttum húsum og skemmtilegum verslunum. Bærinn er frægur fyrir smíði strengjahljóðfæra og stendur minnisvarði af Matthias Klotz, upphafsmanni fiðlusmíði, fyrir utan fiðlusafn bæjarins. Nú verður stefnan tekin á Garmisch-Partenkirchen í Þýskalandi sem er einn þekktasti skíðabær landsins. Fyrir ofan hann stendur hæsta fjall Þýskalands, Zugspitze. Garmisch-Partenkirchen er töfrandi og skemmtilegur á þessum árstíma og ilmur jólanna svífur yfir aðventumarkaðinum. Einnig er hægt að líta inn á kaupmenn borgarinnar. Hér er upplagt að fá sér hressingu en það tilheyrir að fá sér heitt jólaglögg á göngu um jólamarkaðinn. Hægt er að fara með hestvagni eða sleða um bæinn og njóta um leið náttúrufegurðarinnar allt um kring.

3. desember | Aðventudýrð í Swarovski & Innsbruck

Við hefjum þennan góða dag á að aka til Wattens þar sem Swarovski kristalssafnið er til húsa en þar glitrar á ýmis djásn. Ferðin endar í verslun þeirra. Áfram höldum við á vit ævintýranna og í jóladýrðina í Innsbruck, höfuðborg Tíról, sem er umvafin fjöllum og tindrandi náttúrufegurð. Innsbruck var ein af borgum Habsborgaranna, einnar mikilvægustu valdaættar Evrópu. Blómatími hennar var á 15. öld undir stjórn Maximilian I. af Habsborg. Hann lét byggja helsta kennileiti borgarinnar, húsið með gullþakinu, sem stendur við eitt fallegasta torgið í Tíról. Farið verður í stutta göngu en eftir það verður frjáls tími til að kanna borgina á eigin vegum. Borgin er sérstaklega ævintýraleg á aðventunni því borgarbúar nota gjarnan Grimmsævintýrin sem þema í skreytingunum. Tilvalið er að líta inn til kaupmanna í Maria-Theresien götunni en þar er einnig mikil jólastemning.

Opna allt

4. desember | Aðventumarkaður & huggulegur dagur í Seefeld

Í dag höfum við það notalegt í fjalladýrðinni í yndislega bænum Seefeld. Áður fyrr var þetta mikið vatnasvæði eins og nafn bæjarins ber með sér. Þennan dag er aðventumarkaður í bænum og mikið um dýrðir. Hér er margt hægt að gera, t.d. fara með hestvagni í rómantíska ferð um nágrennið eða ganga hringinn í kringum vatnið eftir góðum göngustíg. Mögulega er að fara upp á Rosshütte fjallið með kláfi sem fer upp í 1784 m hæð (ef búið er að opna). Þarna uppi er gott veitingahús og upplagt að fá sér kaffi og tertusneið.

5. desember | Jólastemmning í Kufstein

Kufstein sem er sérlega fallegur bær og státar bæði af hrífandi jólamarkaði í almenningsgarði borgarinnar og einnig uppi við miðaldakastalann Kufstein sem trónir yfir borginni. Kastalinn er frægur fyrir tilkomumikið útiorgel, svokallað hetjuorgel, en á hverjum degi í hádeginu er leikið á orgelið til minningar um þá sem féllu í heimsstyrjöldunum tveimur og óma orgelhljómarnir frá turni kastalans og endurkastast í þverhníptum fjöllunum í kring. Við förum upp í kastalann en þar er mjög fallegur jóla- og handverksmarkaður. Hér er hægt að hverfa um hríð aftur í aldir. Eftir það er frjáls tími til að líta inn á kaupmenn borgarinnar sem eru ófáir og fá sér hressingu.

6. desember | Heimferð frá München

Nú er komið að heimferð eftir ljúfa daga. Eftir morgunverð verður ekið til München. Brottför þaðan kl. 13:00 og lending í Keflavík kl. 16:00 að staðartíma.

Fararstjóri getur fært dagskrárliði á milli daga eftir þörfum.

Myndir úr ferðinni

Fararstjórn

Hólmfríður Bjarnadóttir

Hólmfríður heiti ég, alltaf kölluð Hófý, og er fædd á Patreksfirði en ólst upp í Reykjavík. Ég er móðir þriggja drengja og er búsett í Bæjaraskógi í Þýskalandi. Ég er búin að starfa hjá Bændaferðum síðan 2004 í skipulagningu á utanlandsferðum og sem fararstjóri. Þetta hefur verið dásamlegur tími með frábæru fólki, yndislegu samstarfsfólki og vinum. 

Hótel

Hotel Bergland Aðventuferð

Gist verður allar næturnar á 4* hóteli í miðbæ Seefeld, Hótel Bergland. Innifalið er morgunverðarhlaðborð og kvöldverður er vel útilátin fjögurra rétta máltíð með salathlaðborði. Flestir drykkir frá 11:00 á morgnanna til 22:00 á kvöldin eru innifaldir. Notaleg heilsulind er á hótelinu með sundlaug, sauna, eimbaði með salt- og ilmstillingu, innrauðum hitaklefa og köldum kerum. Boðið er upp á ýmsar heilsumeðferðir gegn gjaldi. Herbergin eru öll með baði/sturtu, hárþurrku, síma, sjónvarpi og öryggishólfi. Gestir fá baðslopp til afnota á meðan á dvölinni stendur. Ókeypis þráðlaust net er á hótelinu. Sjá nánar á vefsíðu hótelsins.

Senda fyrirspurn um ferð

bokun@baendaferdir.is
Síðumúla 2, 108 Reykjavík
Sími: 570 2790

Póstlisti

Skrá á póstlista