Gengið í fjallasölum Madonna

Nú kynnumst við náttúrufegurð Brenta Dólómítanna. Við hefjum gönguna frá Campo Carlo Magno svæðinu og njótum þess að ganga í gegnum alpaskóga í fersku fjallalofti. Eftir því sem ofar dregur sjáum við betur yfir ægifagra Brenta Dólómítanna með sína háu tinda og hrikalegu klettabelti. Í þessu hrikalega en fallega landslagi höldum við ferð okkar áfram eftir grónum fjallastígum þar til við komum að fjallavatninu Malghette. Það má með sanni segja að það standi í fjallasal í 1900 metra hæð og allt um kring er fallegur barrskógur. Við höldum ofar og komum að fjallaskálanum í Vigo fjalli þar sem við stöldrum við um stund. Við tökum síðan kláf aftur niður til Campiglio.

• Göngutími: u.þ.b. 5 klst.
• Hækkum 450 m
• Miðlungs erfið ganga

Í dag gefst hverjum og einum tækifæri til þess að njóta þess að dvelja á þessum fallega stað. Hægt er að láta líða úr sér og njóta þess sem hótelið hefur upp á að bjóða. Einnig er urmull gönguleiða um svæðið í kring, meðal annars að vatninu Nambino. Fyrir áhugasama er lítill golfvöllur í Madonna di Campiglio svo eitthvað sé nefnt. 

Framundan er spennandi dagur en hann hefst á skemmtilegri ferð með kláfi upp á tindinn Grostè sem er einn sá glæsilegasti í Brentafjallgarðinum, um 2550 m á hæð. Úr kláfinum er fallegt útsýni yfir fjöllin um kring, gróðursæla dali og þétta skóga. Héðan eru fjölmargar gönguleiðir og við veljum eina þá vinsælustu sem liggur að Vallesinella fossunum. Hér er mikil fjölbreytni í undirlagi, malarstígar, skóglendi og víðáttumikil engi. Vallesinella fossarnir steypast um 60 m niður af stöllum en í kring eru barrskógar og alpaengi. Við höldum göngu okkar áfram og komum í Tuckett fjalakofann þar sem áð verður um stund. Við ferðumst til baka með strætisvagni sem gengur til Madonna di Campiglio.

• Göngutími: u.þ.b. 4 klst.
• Hækkun 600 m
• Miðlungs erfið ganga

Í dag bíður okkar ógleymanleg upplifun í hjarta Brenta Dólómítanna. Við göngum leið þar sem við sjáum fimm falleg fjallavötn, Ritorto, Lambin, Serodoli, Gelato og Nambino. Við fáum okkur far með kláfi upp að Fimm vatna kofanum og fylgjum þaðan fallegum stíg sem leiðir okkur að vötnunum. Við komum fyrst að Ritorto vatni en það er þekkt fyrir tærleika og á góðum degi er hægt að sjá fallega spegilmynd fjallanna um kring. Við höldum ferð okkar áfram og komum að Lambin vatni sem er heldur minna en engu síður fallegt. Næst komum við að hinu dimmbláa Serodoli vatni sem er aðeins úr hefðbundinni gönguleið og því er þar oft einstaklega friðsælt. Við höldum áfram og þá verður á vegi okkar Gelato vatn sem gjarnan er líkt við ís sökum þess að við ákveðnar aðstæður í sólskini glitrar það eins og ís eða kristall. Að lokum komum við að Nambino vatni sem stendur lægst af vötnunum fimm. Hér er gróðursælt og vatnið er gjarnan stillt og þá er hægt að sjá fallega spegilmynd af fjallahringnum umhverfis. Við ferðumst aftur til Madonna di Campiglio með kláfi.

• Göngutími: u.þ.b. 6 klst.
• Hækkun 500 m
• Miðlungs erfið ganga

Leið okkar liggur í Nambrone dalinn í Adamello Brenta þjóðgarðinum en garðurinn er stærsta verndarsvæðið í Trentino héraði. Við göngum fallega hringleið á einu fallegasta svæði Presanella fjallgarðsins en á henni sjáum við hin fögru Cornisello vötn sem mynduðust við framskrið jökla á svæðinu. Það rennur í vötnin frá tindum Presanella en jökulvatnið gefur þeim fallega blágrænan blæ, samt sem áður er vatnsyfirborðið tært. Umhverfi vatnanna þykir eitt það ósnortnasta þar um slóðir, hér er friðsæld og fallegt útsýni, meðal annars til tinda Presanella og yfir til toppanna á Brenta Dólamítunum. Svæðið í kring um vötnin er vel gróið og þar má sjá úrval villiblóma, maríuvendi, alparósir og ýmsan háfjallagróður.

• Göngutími: u.þ.b. 4 klst.
• Hækkun 150 m
• Létt til miðlungs erfið ganga

Nú er komið að heimferð eftir viðburðaríka göngudaga. Við tökum daginn snemma og ökum aftur til Mílanó. Brottför er þaðan kl. 15:30. Áætluð lending í Keflavík kl. 17:45 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.

Hotel Cristal Palace í Madonna Di Campiglio