Flórens & Caprí

Hver kannast ekki við snillinga á borð við Leonardo da Vinci, Michelangelo, Botticelli, Galileo Galilei, Dante og Machiavelli? Allir mörkuðu þeir spor sín í menningar- og listasögu Flórens. Í dag er upplagt að skoða sig betur um í töfrandi borginni og verja t.d. drjúgum tíma á Galleria deglia Uffezi listasafninu, sem er eitt glæsilegasta listasafn landsins. Það var áður stjórnsýsluhús en er nú málverkasafn með 4.500 myndum sem sýna þróun menningar í Flórens og málaralistar í Feneyjum. Svo má ekki gleyma glæsilegustu höll borgarinnar, Palazzo Pitti, og yndislegum garði hennar. Kaupmenn borgarinnar eru á sínum stað og leggja sitt af mörkum til að gera þetta að ógleymanlegum degi.

Nú kveðjum við Flórens og ökum til Sorrento við Napólíflóa, eins fallegasta flóa landsins. Sorrento er hrífandi bær í bröttum hlíðum en þar vaxa ólífu-, appelsínu- og sítrónutré og þess má geta að Limoncello líkjörinn frægi kemur frá þessu svæði. Á þessum dásamlega stað verður gist í sex nætur á góðu hóteli en þaðan er glæsilegt útsýni yfir á Vesúvíus eldfjallið.

Við ætlum að eiga skemmtilegan dag í Sorrento en eftir góðan morgunverð býður fararstjórinn upp á skoðunarferð um bæinn og eftir það er upplagt að kanna dásamlegt umhverfið í Sorrento, eins eftirsóttasta ferðamannabæjarins á Sorrento skaganum. Í bænum er fjöldinn allur af einstaklega heillandi, þröngum, gömlum götum, fögrum kirkjum og glæstum byggingum.

Nú höldum við í siglingu til Caprí, perlu Napólíflóans. Við skoðum fallegu eyjuna, siglum að Bláa hellinum, Grotta Azzurra, og förum upp til Caprí og Anacapri þar sem við njótum stórfenglegs útsýnis. Áhugasömum gefst tækifæri til að fara með stólalyftu upp á fjallið Monte Solaro. Jafnframt verður hægt að fá sér hressingu og skoða alls kyns handunnar vefnaðarvörur eins og kniplinga, dúka, klæði og fatnað. 

Þennan dag gefst heill dagur til þess að slaka á og njóta þess að vera á þessum yndislega stað. Sorrento er líflegur og skemmtilegur bær, þar er margt að skoða og tilvalið að kíkja í verslanir og á kaffi- og veitingahús. Einnig er hægt að slaka á við sundlaug hótelsins eða ganga með strandlengjunni. 

Haldið verður í töfrandi dagsferð um Amalfíströndina þar sem fegurðin er svo sannarlega einstök. Við hefjum daginn á ferð með smárútum með fram ströndinni og hvarvetna gefur að líta dásamlegt landslag á þessari fallegu leið til bæjarins Amalfí, þar sem við stoppum og skoðum okkur um. Á rölti um bæinn sjáum við glæsilega dómkirkju frá 10. öld, heillandi veitinga- og kaffihús og litlar verslanir sem gaman er að kíkja inn í. Því næst verður farið í dásamlega siglingu með Amalfíströndinni til Sorrento en þaðan gefur að líta ægifagurt útsýni á fallegustu strandlengju Ítalíu og sjáum við þar hús, hótel og smábæi sem hanga utan í klettabrúninni. Á þessari ljúfu siglingu verður áð í Positano, einum þekktasta og vinsælasta ferðamannabæ Amalfístrandarinnar áður en siglt verður til Sorrento. Við mælum eindregið með því að gestir gæði sér á grilluðum sjávarréttum í hádeginu en þeir eru einn helsti sérréttur svæðisins.

Dagurinn er tilvalinn til afslöppunar. Skemmtilegt er að upplifa bæinn og hinar gróðursælu ólífu-, appelsínu-, og sítrónuhæðir fyrir ofan hann með því að taka litlu lestina. Einnig er tilvalið að kíkja í verslanir og á kaffi- og veitingahús. Eftir hádegi er upplagt er að nota aðstöðuna við hótelið eða fara niður að gömlu bátahöfninni en þar er úrval góðra veitingarstaða. Svo er líka hægt að fara á fallegu baðströndinna og taka sundsprett. 

Nú kveðjum við þennan yndislega stað eftir ljúfa daga og stefnan er tekin á Lido di Ostia, þar sem gist verður í nágrenni bæjarins í tvær nætur. Á leiðini þangað verður áð í Pompei þar sem skoðaðar verða einhverjar frægustu fornminjar veraldar. Rústir gömlu Pompei eru eitt stórkostlegasta dæmið um fornleifauppgröft heillar byggðar og mun heimamaður leiða okkur í allan sannleikann um söguna. Eftir það verður gefinn frjáls timi til að slaka á og fá sér hressingu áður en ferð heldur áfram.

Í dag upplifum við undurfagra leið um svæðið Castella Romani en þar er fræga Frascati vínhérað í Albaner fjöllum. Fyrr á tímum var þar athvarf fyrir rómverskt aðalsfólk á heitum sumarmánuðum en margar glæsilegar villur bera þess vitni enn þann dag í dag. Byrjað verður á að aka til Castel Gandolfo sem telst til fallegri bæja á Ítalíu og stendur í Albaner hæðunum við Albaner vatn. Hér hefur sumardvalarstaður páfanna í Róm verið frá 17. öld en núverandi páfi, Franziskus, opnaði hliðið fyrir gestum alls staðar að úr heiminum og gerði sumarhöll páfans að safni. Við skoðum okkur um í þessum fallega bæ en eftir það verður ekið til Frascati þar sem við förum í skemmtilega göngu um bæinn. Því næst er frjáls tími til að fá sér hressingu og njóta þess að vera á þessum fagra stað.

Nú er komið að heimferð eftir glæsilega ferð. Eftir góðan morgunverð verður ekið inn í Lido di Ostia sem er lítill og skemmtilegur strandbær. Það er gaman að fara í göngu með ströndinni en einnig eru litlar verslanir, kaffi -og veitingahús bæði með fram ströndinni og inni í bænum. Fyrir áhugasama er hægt að skoða Antika Ostia sem eru, á eftir Pompeii, umfangsmestu og glæsilegustu fornminjar Ítalíu. Á tímum Rómaveldis lá keisarahöfn Claudiusar og Trajans beint við sjóinn og hér eru leifar af varmaböðum, leikhúsum, hofum, verslunum, gistihúsum og íþróttamannvirkjum. Upplagt er að fá sér hádegishressingu í Lido di Ostia áður en ekið verður út á flugvöll í Róm og er brottför þaðan kl. 16:00. Áætluð lending í Keflavík kl. 18:45 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.