Nú bíður okkar borgin Como sem er staðsett á einum fallegasta staðnum við Comovatnið. Hér upplifum við fegurð nánast sama hvert litið er, fallegt landslag umlykur okkur, líkt og mynd á póstkorti. Meðal fegurstu staða og kennileita í Como er strandgöngustígurinn við vatnið með Volta hofinu og Cattedrale Santa Maria Assunta kirkjan. Þar að auki er gamli bærinn yndislegur en hann á rætur sínar að rekja til forn Rómar. Einnig er upplifun að taka lyftu upp í úthverfið Brunate með Faro Voltiano vitanum, þaðan sem hægt er að njóta óviðjafnanlegs útsýnis yfir Comovatnið. Borgin er litrík og skemmtileg og byrjað verður á stuttri skoðunarferð um borgina en síðan er dásamlegt að njóta lífsins í þessari skemmtilegu borg í kring um fallegar verslanir, veitinga- og kaffihús.

Nú kveðjum við Stresa og höldum til Lerici sem er yndislegur bær á austurhluta ítölsku rivíerunnar við La Spezia flóann. Þessi fallegi flói ber viðurnefnið Skáldaflóinn. Þar verður gist í þrjár nætur á góðu hóteli. Við komuna til Lerici fer fararstjóri með hópinn í stutta gönguferð en glæstar byggingar og kastalavirki frá veldi Pisa- og Genúabúa prýða bæinn.

Í dag heimsækjum við gömlu virkisborgina Lucca í Toscana héraði sem er rómað fyrir fegurð, en á 13. og 14. öld var Lucca ein valdamesta borg Evrópu. Tilkomumiklir virkisveggir hennar standa enn frá því á miðri 17. öld, vitnisburður um glæsta tíma. Tónskáldið Puccini er fæddur í borginni og hefur fæðingarstaður hans verið gerður að áhugaverðu safni. Við höldum í stutta skoðunarferð um helstu staði og að henni lokinni gefst tími til að kanna borgina á eigin vegum. Á leið aftur á hótel munum við heimsækja vínbónda í bænum Montecarlo í nágrenni Lucca, þar sem boðið verður upp á dæmigert ítalskt snarl og auðvitað fáum við að bragða á framleiðslu bóndans.

Þessi dagur er heilt ævintýri því nú verður farið í ótrúlega siglingu úti fyrir brattri Cinque Terre ströndinni, einu stórfenglegasta svæði ítölsku rivíerunnar þar sem litríkum húsunum er tyllt utan í klettana. Siglt verður til bæjanna Porto Venere, Riomaggiore, Manarola, Corniglia, Vernazza og Monterosso. Auðvitað verður stoppað einhvers staðar til að fá sér hádegishressingu og til að kanna líf bæjarbúa í nokkrum bæjum.

Það er komið að heimferð eftir ljúfa daga. Ekið verður út á flugvöll í Mílanó og brottför þaðan kl. 15:10 og lending í Keflavík kl. 17:25 að staðartíma

Fararstjóri getur fært dagskrárliði á milli daga eftir þörfum þegar komið er á staðinn.

• Stresa - Hotel Regina Palace
• Lerici - Hotel Grand Europa