Aðventudýrð í Nürnberg

Brottför frá Keflavík kl. 7:20. Mæting í Leifsstöð u.þ.b. 2,5 klst. fyrir brottför. Lending í München kl. 12:05 að staðartíma. Þaðan verður ekið til gömlu ríkisborgarinnar Nürnberg þar sem gist verður í fjórar nætur. Þegar allir eru búnir að koma sér fyrir á hótelinu röltum við saman að elsta aðventumarkaði Þýskalands þar sem gefinn verður frjáls tími til að kanna umhverfið og fá sér kvöldverð en einnig eru flestar verslanir opnar til kl. 20.

Nú verður farið í skoðunarferð um Nürnberg, þessarar gömlu ríkis- og virkisborgar, sem er önnur stærsta borg Bæjaralands. Þessi líflega og skemmtilega borg er með um 550.000 íbúa og þar er margt að skoða, borgarmúrinn, kirkjur, söfn og Kaiserburg kastalann. Svo má ekki gleyma elsta og stærsta aðventumarkaði landsins sem er sérlega glæsilegur. Það er ótrúlegt en satt að nærri 90% allra bygginga í borginni skemmdust í seinni heimsstyrjöldinni en stór hluti þeirra hefur verið endurbyggður í upprunalegri mynd. Farið verður í skoðunarferð um borgina, fyrst með rútu og síðan stutt ganga frá kastalanum að Albrecht Dürer húsinu, þar skoðum við íbúðarhúsið hans og myndir. Eftir það er stutt ganga niður á jólamarkaðinn þar sem er upplagt að við fáum okkar heitan jóladrykk saman. Því næst er frjáls tími til að kanna borgina á eigin vegum, fá sér hressingu og upplifa aðventustemninguna.

Eftir notalegan morgunverð verður ekin fögur leið til Bamberg sem byggð er á sjö hæðum en elsti hluti borginnar fór á heimsminjaskrá UNESCO árið 1993. Þetta er yndisleg borg sem við njótum og hrífumst af á aðventunni. Borgin er lítil en íbúar hennar eru um 72.000. Þetta er mjög falleg og lífleg borg og mikið um dýrðir á aðventunni. Þrátt fyrir smæðina prýða hana margar merkar byggingar s.s. dómkirkjan, höll biskupsins, Karmelitaklaustrið og gamla ráðhúsið. Ekki má gleyma reykbjórnum sem Schlenkerla kráin er fræg fyrir. Aðventumarkaðir borgarinnar eru töfrandi og jólastemningin alltumlykjandi. Eftir stutta skoðunarferð verður gefin frjáls tími til að kanna borgina á eigin vegum, fá sér hressingu og ekki láta kaupmenn sig vanta á þessum árstíma. Um kvöldið verður sameiginlegur kvöldverður á hótelinu okkar.