Hjólað um perlur Suður-Frakklands

Í þessari fyrstu hjólaferð okkar förum við um fallegu borgina Arles við bakka Rhône en hún er stútfull af sögu og menningarlífi. Við hjólum um heillandi götur og sjáum rómverskar rústir og aðrar leifar fortíðarinnar. Þegar við fjarlægjumst Arles breytist landslagið smám saman í kyrrlátt víðerni Camargue svæðisins sem er friðlýst vatnasvæði myndað af framburði Rhône og telst með fallegri náttúrusvæðum Evrópu. Hér er hjólað um mýrlendi og víðáttumiklar saltsléttur og kyrrð ósnortinnar náttúru heillar öll skilningarvit. Hjólum að lokum til baka til Arles.

• Vegalengd: u.þ.b. 45 km
• Aðallega flatlendi

Nú förum við frá Arles og hjólum um gamalt vatnsveitusvæði Rómverja og áfram upp að ævintýralega klettabænum Le Baux de Provence, sem var hreinlega byggður inn í klettana og er án efa einn af áhugaverðustu bæjum landsins. Hrikafagurt landsvæðið umvefur staðinn og héðan er óviðjafnanlegt útsýni yfir Alpilles fjöllin, sérstaklega frá kastalarústunum en þær eru einkar áhugaverðar. Bærinn býr yfir miklum miðaldasjarma með sínum þröngu götum en hér var einnig miðstöð trúbadora og mótmælenda til forna. Hér eru líka áhugaverð listasöfn og handverksverslanir. Við hjólum svo áfram til bæjarins St. Remy sem er í hinni mögnuðu Alpilles fjallaþyrpingu. Listmálarinn frægi, Vincent Van Gogh, eyddi sínum síðustu árum í bænum og festi þetta undurfagra landslag á striga. Hjólum að lokum til baka um stórbrotið umhverfi Provence héraðs.

• Vegalengd: u.þ.b. 60 km
• Hækkun/lækkun: u.þ.b. 400 m/ 400 m 

Frá hótelinu liggur leið okkar út í stórkostlega náttúrufegurð Provence héraðsins, sem er með bestu vínhéruðum landsins. Við komum að Pont du Gard, sem er hæsta vatnsleiðslubrú sem Rómverjar byggðu. Þessi tilkomumikla brú er 49 m há, 279 m löng og var byggð á 1. öld eftir Krist til þess að flytja vatn um 50 km leið frá uppsprettu í nágrenni við Uzés, til rómversku borgarinnar Nimes. Brúin er eitt merkasta sögulega mannvirki rómverska tímans og er í dag á heimsminjaskrá UNESCO. Við skoðum bæði brúna og nánasta umhverfi áður en rúta sækir okkur og flytur á næsta gististað í Avignon.

• Vegalengd: u.þ.b. 45 km
• Hækkun/lækkun: tiltölulega slétt

Í dag hvílum við hjólin og njótum þess að rölta um þessa fögru og söguríku vrikisborg, Avignon. Virkisveggir borgarinnar eru virðulegir og brúin fræga St. Bénezet og gamli bærinn með höll páfans blasa við okkur en allt er þetta varðveitt á heimsminjaskrá UNESCO. Mjög gaman er að skoða elsta hluta borgarinnar sem er rétt hjá ráðhústorginu. Þar eru spennandi verslanir, notaleg kaffihús og heillandi götur. Einnig er skemmtilegt að fara út á St. Bénezet brúna og ganga virkisveggina.

Við hjólum í dag í fallegu landslagi með fram friðsælum bökkum Durance árinnar og í gegnum gróðursælar sveitir prýddar aldingörðum og vínekrum. Komum að bænum Isle sur la Sorgue sem er þekktur fyrir síki sín, enda stundum kallaður eyja bærinn, og skemmtilega antíkmarkaði. Hér er gaman að rölta um og detta jafnvel inn á markað eða bara dást að vatnsmyllum og heillandi brúm bæjarins. Það er líka tilvalið að setjast niður og smakka á kræsingum svæðisins á einu af fallegu kaffihúsunum með fram Sorgue ánni eða upplifa listrænt andrúmsloft bæjarins í einu af galleríi þess.

• Vegalengd: u.þ.b. 60 km
• Hækkun/lækkun: tiltölulega slétt

Þessi dagur verður fullur af stórkostlegu útsýni og fróðleik um hin heimsfrægu vín Rhône dalsins. Áfangastaður dagsins er hrífandi þorpið Châteauneuf du Pape en til að komast þangað hjólum við með fram hægri bakka árinnar Rhône þar sem fagurt landslag og vínekrur fylgja okkur. Héraðið Châteauneuf du Pape er einmitt með þekktari vínhéruðum landsins. Í vínþorpinu Châteauneuf du Pape er
auðvelt að heillast af sögulegum miðbænum og gaman að skoða vínkjallara og læra um þessar ríku víngerðarhefðir sem hafa gert þorpið frægt um allan heim. Eftir góða stund hjólum við aftur til baka til Avignon.

• Vegalengd: u.þ.b. 50 km
• Hækkun/lækkun: ein brött brekka sem er u.þ.b. 100 m upp og 100 m niður

Nú er komið að lokum en flogið verður heim frá Nice kl. 23:30. Lending á Íslandi kl. 01:50 að staðartíma, aðfaranótt 14. júní.