Hjólað um perlur Suður-Frakklands
6. - 13. júní 2024 (8 dagar)
Í þessari einstöku hjólaferð um dásamlegar sveitir Provence héraðsins í Suður-Frakklandi munum við hjóla um hugguleg fjallaþorp, á kyrrlátum árbökkum og við frjósamar vínekrur sem laða fólk að svæðinu. Farið verður að ævintýralega klettabænum Le Baux de Provence þar sem stórbrotin fegurð umvefur staðinn og útsýnið yfir Alpilles fjöllin er óviðjafnanlegt. Hjólum einnig til St. Remy þar sem málarinn frægi Van Gogh málaði mörg sinna þekktustu verka. Við sjáum hina einkar áhugaverðu Pont du Gard brú, hæstu vatnsleiðslubrú sem Rómverjar byggðu og eitt af stórkostlegustu meistaraverkum þeirra tíma. Hjólum um kyrrlátt víðerni Camargue svæðisins sem er friðlýst vatnasvæði myndað af framburði Rhône og telst með fallegri náttúrusvæðum Evrópu. Við eigum frídag í aldagömlu virkisborginni Avignon og gaman er að rölta um miðbæinn en stór hluti hans er varðveittur á heimsminjaskrá UNESCO. Við hrífumst af landslaginu með fram friðsælum bökkum Durance árinnar á leiðinni til bæjarins Isle sur la Sorgue og það sama má segja þegar haldið verður með fram bökkum Rhône til vínþorpsins heimsfræga Châteauneuf du Pape. Þessi ferð gefur áhugasömum hjólagörpum frábært tækifæri til að upplifa hrífandi náttúrufegurð Suður-Frakklands og skoða helstu sögulegu minjar svæðisins.