Hreyfiferðir


Útivist er eitt okkar helsta áhugamál og því höfum við frá upphafi haft áhuga á að bjóða upp á spennandi ferðir þar sem helsti tilgangurinn væri að stunda útivist og hreyfingu.

Slíkar ferðir byrjuðum við að nefna hreyfiferðir og má segja að það hafi fest við ferðirnar. Við viljum hafa ferðir fyrir sem flesta, bæði léttari og erfiðari ferðir, til mismunandi áfangastaða þar sem menningin getur verið ólík okkar.  

Skíðaferðir - Gönguskíðaferðir - Hjólaferðir - Gönguferðir
Maraþonferðir - Tindaferðir     Allt eftir árstíma!

Bæklingur

Bændaferðir 2010
Bændaferðir 2010

 

 

Portofino og Cinque Terre

 


12. – 19. júní 2010     UPPSELT!
Fararstjórar: Guðrún Sigurðardóttir

Við kynnum hér spennandi gönguferð um tvær af fallegustu gönguleiðum Miðjarðarhafsins, Portofino-skagann og Cinque Terre-ströndina. Náttúrufegurðin er ólýsanleg. Brattir klettar og höfðar, þaktir ilmandi og litríkum miðjarðarhafsgróðri, spegla sig í túrkisbláum sjónum. Gangan er farin í byrjun sumars þegar gróðurinn er hvað fallegastur og hafgolan kælir í sólskininu. Allir helstu bæirnir eru skoðaðir, en dvalist er í einum þekktasta bænum, Santa Margherita Ligure, á 4* hóteli. Portofino-skaginn, sem dregur nafn sitt af þeim fræga bæ Portofino, er allur undir náttúruvernd sökum gróðurs og dýralífs og hér er náttúrufegurðin hvað mikilfenglegust. Gengið er um allan höfðann og komið í hina ævintýralegu bæi Camogli og San Fruttuoso-víkina. Seinni hluta ferðar er síðan gengið í Cinque Terre sem er þjóðgarður og er á heimsminjaskrá UNESCO sökum einstakra minja um líf fyrr á öldum sem einkenndist af fiskveiðum og vínrækt. Göngurnar eru við allra hæfi og ávallt á góðum göngustígum, en hlutar þeirra geta verið nokkuð brattir. Einungis er gengið með dagpoka.

Lesa meira >>

 

Dólómítarnir

 
7. – 14. júlí 2010   
Fararstjórar: Guðrún Sigurðardóttir

Fegurð Dólómítanna þarf varla að kynna, enda eitt vinsælasta göngu- og útivistarsvæði Evrópu og sumir hafa líkt því við að opna konfektkassa! Eftir flug til Mílanó er ekið í norðurátt upp í Pustertal sem er við landamæri Ítalíu og Austurríkis. Eftir gistingu þar hefst sjálft gönguævintýrið um þetta fallega svæði, 6 dagar á göngu þar sem gist er í fjallaskálum og á gistiheimilum. Útivist og ferskt loft eins og það gerist best. Gengið verður eftir helstu hryggjum um mikilvægasta hluta Dólómítanna að suðurrönd Alpanna við bæinn Belluno. Gengið er um ellefu stærri fjallgarða. Pragser- og Enneberg-Dólómítana, Fanes, Fanis, Nuvolàu, Croda da Lago, Rocchetta, Pelmo, Civetta, Moiazza, Pramper-Dólómítana, Schiara og þrjú þekkt skörð, Passo Falzarego, Passo Staulanza og Passo Duran. Gönguleiðin er samtals um 150 km en í loftlínu einungis 60 km og við göngum í um 2.000 m hæð. Eftir ánægjulega göngudaga er farið að suðurhluta Gardavatns og gist í 3 nætur á hóteli í bænum Peschiera del Garda. Það er því hægt að taka því rólega, skreppa til bæjarins Sirmione eða fara í siglingu áður en haldið er heim á leið.

Lesa meira >>

 

Trítlað um Tíról

2.  - 9. september 2010    UPPSELT!     
Fararstjóri: Guðlaug Sveinbjarnardóttir & Höskuldur Jónsson

Tíról er þekkt fyrir fjöllin og menninguna, sannkallaður draumur göngumannsins þar sem fegurðin blasir við nánast hvert sem litið er. Í þessari ferð blöndum við því saman léttum gönguferðum sem henta sérstaklega vel fyrir alla þá sem njóta þess að stunda útivist og einnig þá sem eru komnir af léttasta skeiði. Ferðin hefst á flugi til München, þaðan ekið til Lanersbach í Tuxertal, Tíról, og gistum þar á glæsilegu 4* fjallahóteli í um 1.300 m hæð í 7 nætur. Hótelið býður upp á þrjár gönguferðir daglega á meðan á dvölinni stendur, létta, miðlungs- og erfiða og eru reyndir gönguleiðsögumenn með í för. Fararstjóri hópsins mun velja ferð hvern dag og geta þeir sem vilja fylgt henni eða valið að fara í léttari eða erfiðari ferð, allt eftir því sem hentar hverjum og einum. Svæðið sem gengið er um er einstaklega spennandi, en einnig er hægt að velja nokkurs konar þemagönguferðir þar sem t.d. boðið er upp á fræðslu um ostaframleiðslu í seli, fjallaleiðir hér áður fyrr og svo er upplagt að fara upp á jökul, en einnig er hægt að fara í dagsferð yfir til Ítalíu. Tuxertal er dalurinn fyrir ofan Zillertal og er stutt að skreppa til næstu bæja, en þeirra þekktastur er Mayrhofen.

 

 

Flýtileiðir

Skipta um leturstærð