Hjólað & siglt um perlur Dónár

Hjólaleið dagsins hefst á mjóum stígum á svæði þar sem járntjaldið varnaði leið hér áður. Við hefjum ferðina við Devin virki og hjólum að glæsilegum barrokkgarði kastalans Hof sem er einn tilkomumesti lystigarður Evrópu. Áfram er haldið um óspillta náttúru en skömmu seinna komum við inn í ys og þys Bratislava. Áhugasamir geta farið í skoðunarferð um borgina. Vegalengd dagsins er um 43 km.

Þegar siglt er inn til Búdapest blasir við okkur stórkostleg sýn yfir allar frægustu byggingar borgarinnar. Dóná aðskilur borgarhlutana tvo, hallarhverfið og borgarhlutann, Búda og Pest, en fjöldi voldugra og fallegra brúa tengja þá saman og setja sterkan svip á þessa fallegu borg. Þegar akkerum hefur verið kastað er möguleiki að fara í skoðunarferð um borgina. Frá Búdapest hjólum við með fram skógum og eyrum á árbakka Dónár uns við komum að listamannabænum Szentendre. Bærinn á sér meira en 1.000 ára sögu og bera þröng stræti og lítil torg þess merki. Í Búdapest verður hægt að njóta kvöldsins og m.a. fara á sýningu heimamanna með hefðbundnum söng og dansi, þar sem skipið fer ekki frá borginni fyrr en eftir miðnætti. Vegalengd dagsins er um 54 km.

Á þessu svæði er Dóná umvafin snarbröttum fjöllum og aflíðandi hólum í heillandi umhverfi sem við njótum í hjólaferð dagsins. Við höldum til bæjarins Esztergom þar sem við stígum aftur um borð í fljótaskipið. Bærinn er einn af elstu bæjum Ungverjalands en basilíkan þar var vígð árið 1869 með flutningi tónverks sem var sérstaklega samið við þetta tilefni og stjórnað af Franz Liszt. Vegalengd dagsins er um 43 km.

Í dag eigum við frídag í hinni dásamlegu Vínarborg. Það er upplagt að taka lestina inn í bæ og njóta þessarar fögru borgar en fallegar byggingar skreyta borgina og má þar til að mynda nefna Schönbrunn höllina, eina íburðarmestu höll landsins, Belvedere höllina og hið þekkta hús Hundertwasser. Áhugasamir geta líka hjólað eftir Dounauinsel, bíllausri 22 km langri eyju sem liggur mitt í Dóná og er algjör útivistarparadís. Um kvöldið er hægt að panta miða á tónleika í Schönbrunn höllinni áður en skipið leysir landfestar og siglir sem leið liggur til Wachau.

Síðasta hjólaleið þessarar ferðar er kölluð konungsleiðin. Hjólað er milli notalegra þorpa sem kúra í hæðóttu landslaginu, fram hjá fornum virkjum og glæstum höllum. Svæðið er þekkt fyrir ávaxtarækt og þá sérstaklega vínrækt og þekja vínekrurnar hæðirnar í stöllum eins langt og augað eygir. Tilvalið er að staldra við og hvíla lúin bein á einni af þeim fjöldamörgu vínkrám sem standa við veginn og bragða á framleiðslu heimamanna. Vegalengd dagsins er um 37 km.

Að morgunverði loknum leggst skipið að bryggju í Passau. Eftir stutt stopp í Passau verður haldið til Bad Griesbach þar sem gist verður í eina nótt. Hér er tilvalið að nýta eftirmiðdaginn í glæsilegri heilsulind hótelsins.

Nú er ferðin á enda og að loknum morgunverði munum við aka út á flugvöll í München. Brottför er þaðan kl. 14:05 og er áætluð lending í Keflavík kl. 16:00 að staðartíma.