6. - 18. september 2024 (13 dagar)
Sumarævintýri á undurfögru og sólríku eyjunni Sikiley. Fornar minjar bera vitni um 3.000 ára sögu hennar og menningu þeirra þjóða sem hér hafa ríkt í gegnum tíðina. Ferðin hefst í hrífandi borginni Napólí sem er höfuðborg Campania héraðs við Napólíflóa. Gamli hluti Napólí er einstaklega sjarmerandi og er á heimsminjaskrá UNESCO. Siglt verður til Palermo, höfuðborgar Sikileyjar, en hún stendur við fallegasta flóa eyjunnar. Ásamt því að skoða Palermo verður farið til Monreale, töfrandi bæjar sem státar af stórkostlegri dómkirkju, klaustri og fyrrum konunghöll. Á leið til Marina di Ragusa upplifum við Agrigento, sem er ein hinna gömlu grísku borga, og Vall di Templi eða dal hofanna þar sem sjá má mjög áhugaverðar fornminjar og eitt stærsta fornminjasvæði í heimi. Við sækjum einnig heim Ragusa sem er heillandi bær í barokkstíl. Síðasti náttstaður Sikileyjar verður við hina fögru Giardini Naxos strönd. Á leið þangað munum við eiga töfrandi dag í forngrísku borginni Sýrakúsa en tímalaus fegurð hennar heillar enn í dag. Komum til Taormina sem er yndislegur bær en þar skrifaði Laxness Vefarann mikla frá Kasmír. Einnig förum við í ævintýralega ferð að Etnu, þekktasta eldfjalli Evrópu, og við rætur Etnu verður í boði létt hádegissnarl að hætti eyjarskeggja. Á leið í skip í Palermo verður komið við í Cefalú, bæ með hrífandi arabískum blæ. Þessari glæsilegu ferð lýkur með heimflugi frá Róm.