Fegurð landsins fjalla

Nú er komið að því að kveðja Stresa eftir yndislega daga og verður stefnan tekin á svissnesku Alpafjöllin yfir Simplon skarðið. Á leiðinni þangað verður komið til Täsch og þaðan farið í stutta lestarferð til Zermatt bæjar. Leið lestarinnar liggur á milli þriggja hæstu fjalla Evrópu, Dom, Matterhorn og Monte Rosa. Útsýnið úr bænum yfir á Matterhorn fjallið er hreint stórfenglegt. Í Zermatt er engin bílaumferð og gömlum húsum hefur verið haldið mjög vel við en fjósin hafa vikið fyrir Rolex- og Gucciverslunum. Við komum til með að eiga góðan tíma í þessum yndislega bæ áður en haldið verður áfram en gist verður í fjórar nætur á góðu hóteli í bænum Saint-Léonard sem er örstutt frá fjallabænum Sion.

Eftir góðan morgunverð verður ekið inn í miðaldabæinn Sion sem er í suðvesturhluta Sviss í kantónunni Wallis, einu sólríkasta svæði Sviss. Bærinn hrífur alla, ekki síst staðsetning hans því hann byggðist upp á milli tveggja kletta. Á öðrum eru rústir Tourbillon kastalans en á hinum trónir Valere, gömul pílagrímakirkja sem skartar einu elsta orgeli heims. Það er ekki bara staðsetning bæjarins sem hrífur heldur einnig miðaldabærinn með sínum litlu, þröngu götum, glæstum byggingum og litskrúðugu mannlífi. Eftir stutta skoðunarferð verður frjáls tími til að sýna sig og sjá aðra. Upplagt að fá sér dæmigerðan rétt Sion og Wallisbúa, osta raclette fondú. Þegar líða fer á daginn verður ekið til baka á hótelið þar sem hægt er að fara í göngu eða njóta náttúrufegurðar Alpafjallanna úr hótelgarðinum.

Einn af hápunktum ferðarinnar er að koma til Chamonix sem stendur við rætur hæsta fjalls Vestur-Evrópu, Mont Blanc. Chamonix er bær fjalladýrkenda og þekktur skíðabær en fyrstu vetrarólympíuleikarnir voru haldnir hér árið 1924. Frá miðbænum gengur útsýniskláfur upp í 3.842 m hæð á Aiguille du Midi en þaðan er stórkostlegt útsýni yfir á Mont Blanc, Chamonix og dalinn fyrir neðan. Byrjað verður á því að taka kláfinn upp og njóta útsýnisins yfir Alpafjöllin. Eftir það verður gefinn tími til að rölta um og njóta bæjarins áður en ekið verður til baka á hótel.

Nú ætlum við að eiga þennan morgun í rólegheitum og njóta þess að vera á þessum fagra stað. Um hádegisbil er upplagt að fá sér stutta göngu með farastjóranum að lestarstöðinni þar sem við förum í örstutta lestarferð inn í Sion. Í Sion er hægt að fá sér smá hressingu og líta inn á kaupmenn borgarinnar. Einnig er hægt að skoða sig betur um í þessum fallega bæ, fara í göngu upp að Tourbillon kastala eða upp að gömlu pílagrímakirkjunni Valere. En frá báðum stöðum er fagurt útsýni yfir borgina og vínhéraðið en hér í Wallis héraði eru hæstu víngarðar Mið-Evrópu.

Þá er þessi glæsilega ferð á enda runnin. Ekið verður til Genf en brottför þaðan er kl. 14:00 og lending í Keflavík kl. 15:50 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.