Bilbao & Baskaland

Bilbao er ein helsta hafnarborg Spánar. Eitt frægasta kennileiti borgarinnar er hið fræga Guggenheim listasafn sem hannað var af Frank Ghery. Farið verður í fróðlega skoðunarferð en söguleg arfleið og menning sést vel á arkitektúr og glæsilegum byggingum sem skreyta elsta hluta borgarinnar. Að skoðunarferð lokinni er frjáls tími þar sem þeir sem áhuga hafa geta farið á Guggenheimsafnið (athugið að nauðsynlegt er að bóka með góðum fyrirvara) og aðrir geta notað tímann til að endurnærast á einum af vínbörunum eða tapas veitingastöðunum sem borgin er þekkt fyrir.

Heillandi náttúrufegurð mætir okkur í dagsferð með fram Cantabria ströndinni til Santander, sem er höfuðstaður héraðsins. Santander var á miðöldum mikilvæg hafnarborg en er í dag vinsæll baðstrandarbær. Á 19. öld fór aðallinn og ríkar fjölskyldur frá Spáni að sækja hér til strandarinnar og ber hverfið El Sardinero þess merki. Lúxushótel, spilavíti og litlar sumarhallir setja mark sitt á umhverfið og sjálfur Spánarkonungur, Alfons VIII, byggði hér einnig. Sumarhöll hans reis á tanganum La Magdalena en þar nú er starfræktur sumarháskólinn Ménéndes Palayo. Hafnarhverfið Barrio Pesquero á sér langa sögu og þangað er skemmtilegt að koma, jafnvel væri tilvalið að fá sér þar hádegisverð. Síðdegis verður ekið í litríkan og skemmtilegan bæ, Comillas, þar sem margt áhugavert er að skoða s.s. höllin Marqueser de Comillas en í garði hennar er fallegt lystihús eftir sjálfan Antoni Gaudí. Það hýsir nú einn þekktasta veitingastað bæjarins.

Í dag tökum við það rólega í Bilbao. Upplagt er að skoða borgina betur á eigin vegum og njóta þess að hafa nægan tíma til að rölta um götur hennar, sýna sig og sjá aðra. Áhugasamir gætu einnig farið á Guggenheimsafnið í dag (athugið að nauðsynlegt er að bóka með góðum fyrirvara) og eins er hægt að líta inn á kaupmenn og á eitthvert hinna fjölmörgu kaffi- og veitingahúsa.

Í ferð dagsins liggur leið okkar í hina áttina með fram þeirri fögru strönd til San Sebastian við Biscaya flóann. San Sebastian bærinn er svo sannarlega réttnefndur perla flóans en baðströndin Bahía de la Concha hefur verið einn þekktasti ferðamannastaður Baskahéraðs allt frá 19. öld. Lögun strandarinnar minnir á skel og gerir bæjarstæðið undurfagurt. Við förum í skoðunarferð um elsta hluta borgarinnar þar sem við fetum í fótspor kvikmyndastjarna sem dvelja hér ár hvert meðan á kvikmyndahátíð stendur. Að lokinni skoðunarferðinni gefst tími til að njóta lífsins og skoða sig betur um í borginni.

Heimferðardaginn kveðjum við Baskahérað eftir yndislega daga og höldum til Madríd. Á leiðinni verður ekið um hjarta Spánar, fallega héraðið Kastilia. Hvarvetna verðum við vitni að því hvernig stórfenglegir kastalar og hrífandi kirkjur setja svip sinn á borg og bæi en héraðið er fyrrum greifadæmi og var um tíma konungsríki. Að sjálfsögðu verður staldrað við á fallegum stað á leiðinni til að fá sér hressingu. Heimflug er frá Madríd kl. 22:25 og lending í Keflavík kl. 01:00 að staðartíma.

Fararstjóri getur fært dagskrárliði á milli daga eftir þörfum þegar komið er á staðinn.