Hjólaferðir

 
  
 

Á bökkum Dónár

12. - 21. júní 2012
Fararstjóri: Þórður Höskuldsson 

Í þessari skemmtilegu hjólaferð munum við ferðast um bakka Dónár, við landamæri Austurríkis, Slóvakíu og Ungverjalands.  Flogið til München og farið með lest þaðan til Vínar þar sem gist verður fyrstu nóttina.  Næstu daga hjólum við eftir góðum hjólaleiðum um suðurbakka Dónár sem liggja mestmegnis á flatlendi. Meðal þess sem á vegi okkar verður er 17 brúa bær sem ber hið óþjála nafn Mosonmagyarovar. Síðan er stefnan tekin frá Dóná og inn í láglendar sveitir Ungverjalands. Hjólað verður til borgarinnar Györ og yfir hæðir en þar skapast líka tækifæri til að horfa yfir láglendið sem liggur að baki. Leiðin liggur því næst um sveitavegi og stefnan tekin að ánni en komið er að henni við hina frægu beygju sem er við bæinn Esztergom norðvestur af Búdapest og ánni svo fylgt til hinnar fornu rómversku virkisborgar Visegrad.  Síðasti hjóladagurinn endar við hótel hópsins í miðborg Búdapest. Frjáls dagur til að skoða borgina en síðasta daginn fljúgum við svo til Frankfurt og þaðan til Keflavíkur.
 

Útivist við Achensee

21. - 28. júní 2012
Fararstjóri: Steinunn H. Hannesdóttir 

Dalurinn Achental er umlukinn tignarlegum fjöllum á nánast alla vegu og er þekktur fyrir einstaka náttúrufegurð. Í þessari ferð er áhersla lögð á að njóta útivistar á þessu yndislega alpasvæði. Við munum gista á hóteli í bænum Pertisau, eins þriggja bæja við Achensee vatnið. Þaðan er stórglæsilegt útsýni yfir vatnið, dalinn og fjöllin allt í kring, en vatnið og dalurinn mynda mörkin á milli Karwendel fjallgarðsins til vesturs og Brandenberg Alpanna til austurs. Þetta umhverfi býður upp á fjölbreytta útivistarmöguleika og hreyfingu. Byrjað verður hvern dag á léttri leikfimi og teygjum við allra hæfi. Áhugaverðar gönguferðir munu skipa mikilvægan sess en einnig verður kennd stafganga sem eykur styrk í efri hluta líkamans meira en hefðbundin ganga. Til að ná meiri yfirferð verður farið í hjólaferðir um svæðið og við hótelið verður síðan boðið upp á vatnsleikfimi svo eitthvað sé nefnt. Meðal staða sem verða skoðaðir er Gramai-Alm þjóðgarðurinn í Karwendel fjöllunum sem er í 1263 m hæð, en þar er tilvalið að fá sér léttan hádegisverð og skoða osta- og pylsusel frá 16. öld. Þessi ferð hentar öllum sem vilja njóta hressandi útvistar í einstöku umhverfi!
 
 

Hjólað og siglt

28. júlí – 4. ágúst 2012
Fararstjóri: Sverrir Gíslason 

Við kynnum hér glæsilega 8 daga hjólaferð og siglingu þar sem árnar Neckar og Rín munu leika aðalhlutverk. Flogið verður til Frankfurt en þaðan ökum við sem leið liggur til Bad Wimpfen, þar sem fljótaskipið„MS Patria“ tekur á móti okkur. Skipið býður uppá fjölmörg þægindi, má þar nefna veitingahús sem býður gestum uppá góðan og vel útilátinn kvöldverð ásamt gestastofu með litlum bar. Sóldekk er yfirbyggt, að hluta með sætum og reiðhjólastöndum. Allar káetur eru með loftkælingu og sérbaðherbergi. Þegar við höfum notið morgunverðar dag hvern, þá hjólum við um undurfagurt landslag tveggja hrífandi fljótasvæða, þar sem við skoðum menningarperlur, kirkjur, hallir og vínekrur. Heidelberg, Mainz og Koblenz eru borgir sem þetta fallega svæði hefur m.a. uppá að bjóða. Hjólað verður á vel byggðum hjólastígum þar sem farið verður í skoðunarferðir sem tryggja ógleymanlegt frí. Fyrir þá sem ekki hafa áhuga á að hjóla daglega er yndislegt að dvelja um borð og njóta landslagsins sem líður hjá. Það má með sanni segja að hér er um að ræða spennandi nýjung sem vert er að skoða! 
 
 

Við rætur Alpanna

2. – 9. ágúst 2012
Fararstjóri: Rúnar Helgason 

Í þessari skemmtilegu hjólaferð eftir einni fallegustu hjólaleið Þýskalands frá Bad Tölz til Salzburg  í Austurríki upplifum við sannkallað víðsýni yfir Alpana. Flogið verður til München og þaðan farið til Bad Tölz þar sem við gistum í eina nótt. Frá Bad Tölz liggur hjólaleiðin við rætur Alpanna og um mikilfenglegan fjallgarð, um mýrar og falleg stöðuvötn til Salzburgar, en þess má geta að leiðin nefnist útsýnisleiðin eða „Panorama hjólaleiðin“. Meðal þess sem við komum til með að sjá er heilsubærinn Bad Feilnbach og þorpið Neubeuern sem þykir eitt það fallegasta í Bæjaralandi. Við njótum einnig fegurðar alpavatnanna Tegernsee og Schliersee og hjólum um klassískt alpasvæði sem notað hefur verið sem tökustaður fyrir fjölmargar kvikmyndir og sjónvarpsþætti. Hjólaleiðin liggur við Chiemsee, stærsta vatn Bæjaralands, en þar er að finna höllina Herrenchiemsee sem Ludwig II lét byggja að fyrirmynd Versala-hallarinnar. Ferðin endar í Salzburg en gamli miðbærinn þar hefur að geyma fjölmargar perlur enda fæðingarbær Mozarts og er borgin einnig á heimsminjaskrá UNESCO.  Síðustu tvær næturnar er gist í Salzburg og flogið frá München aftur heim.
 
 

Garmisch Partenkirchen - Bad Tölz

9. – 16. ágúst 2012
Fararstjóri: Rúnar Helgason 

Þessi skemmtilega hjólaleið sem liggur frá München, í áttina að Ölpunum og til Mittenwald er sennilega ein af vinsælustu hjólaleiðum Bæjaralands. Þetta er tiltölulega auðveld hjólaleið og hún liggur að mestu á góðum og vel merktum hjólastígum um stórbrotið landslag, meðfram fallegum vötnum og litlum bæjum þar sem þýsku Alparnir gnæfa yfir. Eftir flug til München er farið með lest beint til Herrsching þar sem hjólaferðin hefst daginn eftir. Hjólað er til Murnau sem liggur við hið fallega vatn Staffelsee og til vetrarólympíubæjarins Garmisch-Partenkirchen. Áfram er hjólað til Mittenwald, þaðan meðfram ánni Isar til bæjarins Bad Tölz þar sem hjólað verður að hinu fallega vatni Tegernsee og síðan endað í München. Þessi hjólaferð er blanda skemmtilegrar tengingar við náttúruna og snertingar við lífið í bæjunum sem leiðin liggur um. Ferðahraðinn er ekki meiri en svo að auðvelt er að upplifa umhverfið og njóta þess sem fyrir augu ber, en leggja samt að baki 50 - 60 km dag hvern. Heildarvegalengd ferðarinnar er um 330 km.
 
 

Flýtileiðir

Skipta um leturstærð